Diarios de Hitler

De Wikipedia
Saltar a navegación Saltar a la gueta
Diarios de Hitler
Datos
Autor Konrad Kujau
Editorial orixinal Stern
Cambiar los datos en Wikidata

Los Diarios de Hitler (Alemán: Hitler-Tagebücher) son un conxuntu de sesenta pequeños llibros escritos por Konrad Kujau y publicaos pol periódicu alemán Stern en 1983, que pretendíen pasar pol auténticu diario de Adolf Hitler, y que finalmente fueron identificaos como una falsificación. En 1985, Konrad Kujau y Gerd Heidemann seríen sentenciaos a 42 meses de prisión pola estafa.[1]

Afayu y publicación[editar | editar la fonte]

Mientres el mes d'abril de 1983, la revista alemana Stern publicó estractos d'unos documentos que supuestamente yeren el diariu de Hitler, y qu'adquiriera por 10 millones de marcos alemanes (o 4,8 millones de dólares).[2] Los diarios cubríen un periodu entendíu ente 1932 y 1945, ya incluyíen dos "entregues especiales" sobre'l vuelu de Rudolf Hess a Reinu Xuníu.

Gerd Heidemann, un periodista, dixo recibir los escritos dende Alemaña Oriental, llográndolos gracies al doctor Fischer, quien supuestamente consiguiera pasalos al traviés de la frontera, introduciéndolos n'Occidente. Los diarios, según el relatu de los estafadores, yeren parte d'una colección de documentos recuperaos d'ente los restos d'un accidente aereu en Börnersdorf, cerca de Dresde, n'abril de 1945.

Falsa autentificación[editar | editar la fonte]

Gerd Heidemann unvió los documentos a dellos espertos en Hestoria de la Segunda Guerra Mundial por qu'acotaren la so autenticidá. Ente ellos, destaquen Hugh Trevor-Roper, Eberhard Jäckel y Gerhard Weinberg, quien nuna rueda de prensa celebrada'l 25 d'abril de 1983, confirmaron que yeren auténticos. Magar que los diarios de Hitler nun fueren entá sometíos a un analís científicu, Trevor-Roper afirmaría lo siguiente:

"I am now satisfied that the documents are authentic; that the history of their wanderings since 1945 is true; and that the standard accounts of Hitler's writing habits, of his personality and, even, perhaps, of some public events, may in consequence have to be revised".
"Agora puedo dicir con prestu qu'estos documentos son auténticos; que la hestoria sobre'l so paradoriu dende 1945 ye cierta; y que la forma na que se narra anguaño los vezos d'escritura y la personalidá de Hitler, ya inclusive quiciabes dalgunos de los sos actos públicos, tienen de ser, arriendes d'ello, revisaos". (Traducción averada)

Naquel momentu, Trevor-Roper yera unu de los direutores de Times Newspapers, y magar que negó cualquier actuación deshonesta, hubo quien lu acusó d'entrar nun claru conflictu d'intereses, pos el The Sunday Times, periódicu pal que davezu realizaba collaboraciones, yá pagara una enorme suma polos derechos pa publicar los diarios nel Reinu Xuníu.

Fraude[editar | editar la fonte]

Dos selmanes dempués de la "autentificación", l'exame forense reveló que los Diarios de Hitler fueren impresos sobre papel modernu y utilizando tinta moderna, fabricada muncho depués de la muerte de Hitler. Amás, tenía gran cantidá de datos históricos inesactos, ente los que destacaba'l monograma de la primer páxina, onde se lleía "FH", en llugar de "AH" (Adolf Hitler), pos nos antiguos calteres alemanes, tales lletres resultaben similares.

Finalmente, el conteníu del llibru resultó ser una copia d'un llibru de discursos de Hitler al que s'añedieren "comentarios personales", siendo que la caligrafía de los presuntos "Diarios" omitía detalles importantes de la caligrafía personal de Hitler, lo cual xeneraba mayores duldes sobre l'autenticidá. La investigación concluyó que los Diarios de Hitler yeren un grotescu y superficial fraude.[3]

Consecuencies[editar | editar la fonte]

Amás de los cuatro años y mediu de prisión que s'impunxeron al falsificador Konrad Kujau y al periodista Heidemann, l'escándalu supunxo la dimisión de Peter Koch y Felix Schmidt, dos editores del Stern. Los enemigos del Sunday Times fixeron risión con mapa al periódicu, y la reputación como historiador de Trevor-Roper quedaría seriamente estropiada.

El sucesu quedaría reflexáu nuna mini-serie británica producida en 1991 y que recibiría'l nome de Selling Hitler. Taba basada nel llibru que Robert Harris escribió rellatando la hestoria del fraude. Amás, nel añu 1992, estrenóse Schtonk!, película del direutor alemán Helmut Dietl, que magar tener una gran parte ficticia, amosaba munchos de los fechos qu'arrodiaron al casu de los falsos Diarios de Hitler.

Referencies[editar | editar la fonte]

  1. Hamilton, Charles (1991). The Hitler diaries: fakes that fooled the world (en inglés). Kentucky: University Press of Kentucky, 211. ISBN 978-08-1311-739-3.
  2. Ehrman, Bart D. (2009). Cristianismo Perdíos. Editorial Critica, 416. ISBN 978-84-9892-042-0.
  3. Camacho, Santiago (2008). Venti grandes fraudes de la hestoria. Editorial EDAF, 288. ISBN 978-84-4142-056-4.





Diarios de Hitler