Dennis Quaid

De Wikipedia
Dennis Quaid
Vida
Nacimientu Houston[1]9 d'abril de 1954[2] (69 años)
Nacionalidá Bandera de Estaos Xuníos d'América Estaos Xuníos
Llingua materna inglés
Familia
Casáu con P.J. Soles (1978 – div. 1983)
Meg Ryan (1991 – div. 2001)
Kimberly Quaid (2004 – div. 2018)
Pareyes Meg Ryan
Shanna Moakler
Fíos/es Jack Quaid
Hermanos/es
Estudios
Estudios Universidá de Houston
Escuela Preparatoria Bellaire (es) Traducir
Escuela Secundaria John J. Pershing (es) Traducir
Llingües falaes inglés[3]
Oficiu actor de cine, actor, aviador, actor de voz, actor de televisión, guionistacompositor
Premios
Creencies
Relixón Ilesies bautistes
Partíu políticu políticu independiente
IMDb nm0000598
Cambiar los datos en Wikidata

Dennis William Quaid (9 d'abril de 1954Houston) ye un actor y direutor d'Estaos Xuníos de cine y televisión. Candidatu a los Globos d'Oru, Premios Emmy y Premios del Sindicatu d'Actores, siendo acreedor del Premiu del Sindicatu d'Actores al meyor repartu.[4] Intervieno en películes como The Right Stuff (1983), Enemy Mine (1985), Innerspace (1987), Muertu al llegar (1988), Great Balls of Fire! (1989), Wyatt Earp (1993), Dragonheart (1996), The Parent Trap (1998), Traffic (2000), Far from Heaven (2002), The Day After Tomorrow (2004) o G.I. Joe: Rise of Cobra (2009) ente otres.

Ye consideráu como unu de los meyores actores de la so xeneración y sicasí, nunca recibió una candidatura a los Premiu Óscar.[5] Tuvo casáu mientres diez años cola actriz Meg Ryan, dixebrándose dramáticamente el 16 de xunetu de 2001.[6] Tamién ye cantante ocasional, na so propia banda moteyada "Dennis Quaid and the Sharks".[7]

Biografía[editar | editar la fonte]

Nació en Houston, Texas, Estaos Xuníos el 9 d'abril de 1954. Fíu d'un lletricista, William Quaid, y de una axente inmobiliaria, Nita Quaid.[8] Allegó a la "Bellaire High School" en Bellaire, Texas. Estudió arte dramáticu nel colexu y nel institutu, pero decidió dexar los sos estudios y camudase a Los Angeles, California, col fin d'empezar una carrera nel cine. El so hermanu mayor, Randy Quaid, yá yera un conocíu actor sicasí, Dennis, tuvo dificultaes nos sos entamos pa poder atopar trabayu.[8]

Carrera[editar | editar la fonte]

Tres una serie de pequeños trabayos en cine y televisión unu de los primeros papeles relevantes de Quaid en cine foi cola comedia dramática Breaking Away (1979). Depués el so trabayu foi constante, participó al pie del so hermanu Randy Quaid, los hermanos Carradine y los hermanos Keach nel western The Long Riders (1980) y xunto a Ringo Starr na comedia Caveman (1981), ente otros filmes, onde trabayó con actores de la talla de Gene Hackman, Barbra Streisand o Mickey Rooney. Darréu vendríen producciones como Jaws 3 (1983) o l'aclamada The Right Stuff (1983), xunto a Ed Harris y Scott Glenn, cinta que foi candidata al Óscar a la meyor película.[9]

En 1984 protagonizó con Max Von Sydow el thriller Dreamscape y al añu siguiente protagonizaria el filme de ciencia ficción Enemigu mio xunto a Louis Gossett Jr. (1985). Dos años dempués compartió cartelu con Meg Ryan y Martin Short n'otra aventura de ciencia ficción entemecida con comedia Innerspace de (1987). Tamién en 1987 estrenó'l drama xudicial Suspect al llau de Cher y Liam Neeson y amás The Big Easy un drama criminal xunto a la sensual Ellen Barkin. Dempués actuó en Muertu al llegar un remake del filme de suspensu de 1950, trabayando de nuevu cola so futura pareya Meg Ryan. Pa 1989 interpretó la vida del famosu cantante Jerry Lee Lewis en Great Balls of Fire! xunto a Winona Ryder.

En 1991 protagoniza'l drama bélicu Come See the Paradise, onde narra les peripecies d'un norteamericanu y la so familia xaponesa en plena segunda guerra mundial, depués protagonizó la comedia Undercover Blues 1993 na qu'él y Kathleen Turner interpretaben a un matrimoniu d'espíes, esi mesmu añu trabayo con James Caan y nuevamente con Meg Ryan nel drama de suspensu [Flesh and Bone]]. Gene Hackman y Kevin Costner fueron los sos compañeros de repartu nel western Wyatt Earp (1994) onde interpretó magistralmente a Doc Holliday, y en 1995 trabayó con Julia Roberts en Something to Talk About. En 1996 llegó a los cines la película de ciencia ficción empobinada por Rob Cohen, Dragonheart, na que compartía pantalla con un dragón. A finales de los años 90 apaeció na comedia familiar The Parent Trap (1998),[10] formó parte del repartu de la comedia coral Playing by Heart (1998) y actuó a les órdenes d'Oliver Stone nel drama deportivu Any Given Sunday (1999) con un repartu de luxu: Al Pacino, Cameron Diaz, Jamie Foxx, James Woods, ente otros grandes actores .

Nel añu 2000 ganó'l Premiu del Sindicatu d'Actores al meyor repartu pol drama Traffic, dirixíu por Steven Soderbergh.[4] Tamién este mesmu añu interpretó al padre de James Caviezel en Frequency.[11]

En 2002 foi candidatu al Globu d'Oru y al Premiu del Sindicatu d'Actores -como meyor actor de repartu- pola so interpretación d'un homosexual nos años 50, casáu col personaxe interpretáu por Julianne Moore.[4] Peter Travers señaló pa Rolling Stone que: "Moore y Quaid realicen les meyores interpretaciones de les sos carreres".[12] En 2004 participó nel remake de The Alamo y nel ésitu de taquilla sobre'l cambéu climáticu empobináu por Roland Emmerich, The Day After Tomorrow, convirtiéndose, hasta la fecha, nel filme más esitosu de la so carrera con 544 millones de dólares recaldaos internacionalmente.[13]

Más tarde llegaríen los remakes de El vuelu del Fénix (2004) y Mios, tos y nuesos (2005), xunto a Rene Russo y so la batuta de Raxa Gosnell.[14] En 2008 rodó na ciudá española de Salamanca Vantage Point, na que daba vida a un guardaespaldes del presindente de los Estaos Xuníos. En 2009 llegó a los cines la cinta empobinada por Stephen Sommers G. I. Joe: The Rise of Cobra.[15] Pola so actuación de Bill Clinton nel telefilme The Special Relationship foi candiato nuevamente al Globu d'Oru y al Premiu del Sindicatu d'Actores -como meyor actor de miniserie o telefilme-, y recibió la so primer candidatura al Premiu Emmy na mesma categoría enantes citada.[4] La prensa cinematográfica describió la producción televisiva como "inmensamente entretenida, pero la mayor sorpresa ye'l Clinton al que da vida Quaid, va muncho más allá del encantu".[16] En 2011 fueron estrenaos el drama Soul Surfer, con Helen Hunt, y el remake de Footloose.[17]

Vida privada[editar | editar la fonte]

Casóse cola actriz P. J. Soles en 1978, divorciándose en 1983.

Darréu a raigañu del rodaxe de Innerspace empecipió una rellación cola actriz Meg Ryan en 1987, resultando en matrimoniu en 1991. Con Ryan tuvo un fíu, Jack Henry Quaid.[8] En 2001 dixebráronse por cuenta de los rumores, darréu confirmaos, d'una rellación ente Ryan y el so compañeru de repartu en Proof of Life, Russell Crowe.[18] Esta situación sumió a Quaid na depresión y les adicción a les drogues de la que pudo recuperase so tratamientos médicos.

En 2004 l'actor empecipió un nuevu matrimoniu con una corredora de propiedaes, Kimberly Kathryn Buffington, a quien conoció productu de les actuaciones de la so banda y con quien foi padre de mellizos en 2008, de nombre Thomas Boone y Zoe Grace, nacíos en California.[19]

Tuvo problemes coles drogues, siendo adictu a la cocaína dende 1989. Quaid declaró en numberoses ocasiones que "el tratamientu y la recuperación fueron bien difíciles".[20] Na década de los 90 tuvo un trestornu alimenticiu (anorexa), que lo llevó a pesar en redol a 40 kg, anque se recuperó gracies a numberosos tratamientos.[21]

Tien la llicencia de pilotu d'aviación, capacitáu pa pilotar una Cessna Citation, daqué que realiza davezu hasta la so residencia de Montana.[8]

Filmografía[editar | editar la fonte]

Dennis Quaid nel set de rodaxe de Smart People (2008).

Premios[editar | editar la fonte]

Globu d'Oru
Añu Categoría Película Resultáu
2011 Meyor actor de miniserie o telefilme The Special Relationship Candidatu
2003 Meyor actor de repartu Far from Heaven Candidatu
Premios Emmy
Añu Categoría Película Resultáu
2010 Meyor actor de miniserie o telefilme The Special Relationship Candidatu
Premios del Sindicatu d'Actores
Añu Categoría Película Resultáu
2011 Meyor actor de miniserie o telefilme The Special Relationship Candidatu
2003 Meyor actor de repartu Far from Heaven Candidatu

Referencies[editar | editar la fonte]

  1. Afirmao en: Gemeinsame Normdatei. Data de consulta: 11 avientu 2014. Llingua de la obra o nome: alemán. Autor: Biblioteca Nacional d'Alemaña.
  2. Afirmao en: Gemeinsame Normdatei. Data de consulta: 27 abril 2014. Llingua de la obra o nome: alemán. Autor: Biblioteca Nacional d'Alemaña.
  3. Identificador CONOR.SI: 7546211. Afirmao en: CONOR.SI.
  4. 4,0 4,1 4,2 4,3 «Awards for Dennis Quaid» (inglés). IMDb. Consultáu'l 4 de payares de 2011.
  5. «Óscars: the best actors never to have been nominated» (inglés). The Guardian. Consultáu'l 4 de payares de 2011.
  6. «Dennis Quaid: “Meg y yo falamos cuasi tolos díes y ella conozme como naide”» (castellanu). ¡Hola! (18 de xunetu de 2001). Consultáu'l 4 de payares de 2011.
  7. «Dennis Quaid & the Sharks Live in Niagara Falls» (inglés). Clifton Hill (2 de setiembre de 2011). Consultáu'l 4 de payares de 2011.
  8. 8,0 8,1 8,2 8,3 «Biography for Dennis Quaid» (inglés). IMDb. Consultáu'l 4 de payares de 2011.
  9. «Awards for The Right Stuff» (inglés). IMDb. Consultáu'l 4 de payares de 2011.
  10. Vilathgamuwa, Arshni (24 de mayu de 2010). «About Dennis Quaid's acting in The Parent Trap» (inglés). Reelz. Consultáu'l 4 de payares de 2011.
  11. Ascher-Walls, Rebecca (12 de mayu de 2000). «Dennis Quaid's High Frequency» (inglés). Entertainment Weekly. Consultáu'l 4 de payares de 2011.
  12. Travers, Peter (25 d'ochobre de 2002). «Far from Heaven Review» (inglés). Rolling Stone. Consultáu'l 4 de payares de 2011.
  13. «The Day After Tomorrow en Box Office Mojo» (inglés). Box Office Mojo. Consultáu'l 4 de payares de 2011.
  14. Wray, James (21 de xineru de 2005). «Dennis Quaid Cast in Yours, Mine and Ours» (inglés). Monsters and Critics. Consultáu'l 4 de payares de 2011.
  15. Cullin, Liam (29 de xineru de 2008). «Dennis Quaid Joins G.I. Joe» (inglés). Empire Movies. Consultáu'l 4 de payares de 2011.
  16. Byrnes, Paul (7 d'agostu de 2010). «The Special Relationship Review» (inglés). Sidney Morning Herald. Consultáu'l 4 de payares de 2011.
  17. Barr, Jason (8 de xineru de 2011). «First Image of Dennis Quaid in FOOTLOOSE» (inglés). Collider. Consultáu'l 4 de payares de 2011.
  18. EFE (17 d'ochobre de 2001). «L'amor de Russell Crowe por Meg Ryan» (castellanu). El País. Consultáu'l 4 de payares de 2011.
  19. Hilton, Beth (10 de payares de 2007). «Dennis Quaid becomes father to twins» (inglés). Digital Spy. Consultáu'l 4 de payares de 2011.
  20. «Dennis Quaid: "La cocaína entraba nos presupuestos de les películes"» (castellanu). Europa Press (4 de payares de 2011). Consultáu'l 4 de payares de 2011.
  21. Peterson, Todd (10 de marzu de 2006). «Dennis Quaid: I Battled Anorexa» (inglés). People. Consultáu'l 4 de payares de 2011.

Enllaces esternos[editar | editar la fonte]