Demografía del Estáu de Palestina

De Wikipedia
Saltar a navegación Saltar a la gueta

La Oficina Central d'Estadístiques de Palestina (PCBS) calculó a mediaos del añu 2009 que la población palestina yera de 10.7 millones de persones, distribuyida de la siguiente manera: 3.9 millones nel Estáu de Palestina (36.6%), 1.2 millones (11.5%) n'Israel; 5.0 millones en países árabes (46.2%) y 0.6 millones n'otros países (5.7%). Según The Guardian (2008) l'Estáu de Palestina tien una de les mayores tases de crecedera demográfica del mundu, con cifres que se dispararon hasta'l 30% na última década (2008). En dichu momentu había 3.76 millones de palestinos en Cisxordania y la Franxa de Gaza, en contraste colos 2.89 millones qu'había diez años antes. Según l'U.S. Census, la crecedera de la población palestina nel periodu entendíu ente mediaos de los noventa y 2008 foi del 106%, pasando de 1.9 millones en 1990 a los 3.9 millones de palestinos de 2008. Según Naciones Xuníes (2010), la población palestina ye de 4.4 millones.

Per otru llau, acordies cola Oficina Central d'Estadístiques de Palestina (PCBS), la densidá de población en 2009 yera de 654 persones per quilómetru cuadráu, con una notable diferencia ente Cisxordania (incluyendo Xerusalén Oriental), con 433 persones per quilómetru cuadráu, y la Franxa de Gaza, con 4,073 persones per quilómetru cuadráu.

Tocantes a les franxes d'edá, la franxa correspondiente a los menores de 15 años yera d'un 41.9% en 2009, ente que la de los mayores de 65 años yera tan solo del 3%.