Daito-ryu Aiki-jujutsu

De Wikipedia
(Redirixío dende Daito-ryu Aikijujutsu)
Daito-ryu Aiki-jujutsu
大東流合気柔術
Tamién Daito-ryu, Daito-ryu Jujutsu
Fecha de fundación c.1900
País d'orixe  Xapón
Fundador Sokaku Takeda
(武田 惣角, Takeda Sōkaku, 10 d'ochobre de 1859-25 d'abril de 1943)
Artes enseñaes Aiki-jujutsu
Métodos téunicos Retorcimientos, proyeiciones, estrangulamientos, golpes a puntos febles, pataes, puñetazos, barríos, armes
Escueles proxenitores Hozoin-ryu, Kashima Shinden Jikishinkage-ryu, Kyoshin Meichi-ryu, Ono-ha Itto-ryu, Oshikiuchi, Sumo
Escueles derivaes Aikido, Hakko Ryu, Hapkido
Prauticantes Masao Tonedate, Takuma Hisa, Takeda Tokimune, Morihei Ueshiba, Richard Kim, Kotaro Yoshida, Kodo Horikawa, Toshimi Matsuda, Yukiyoshi Sagawa
Deporte olímpicu Non
Sokaku Takeda

El Daito-ryu Aiki-jujutsu (大東流合気柔術, Daitō-ryū Aiki-jūjutsu), orixinalmente llamáu Daito-ryu Jujutsu, ye un arte marcial xaponés qu'empecipió a ser bien conocíu a primeros del sieglu XX con Sokaku Takeda como cabezaleru. Takeda taba bien entrenáu en delles artes marciales (como Kashima Shinden Jikishinkage-ryu y Sumo) y llamaba "Daito-ryu" (lliteralmente, "Escuela del Gran Oriente") al estilu qu'enseñaba. Magar que les tradiciones d'esta escuela reivindiquen una antigüedá de sieglos, nun se conserven rexistros tocántenes al ryu enantes de Takeda. Yá seya Takeda restaurador o bien fundador del arte, el casu ye que la historia conocida del Daito-ryu entama con él. L’estudiante más conocíu de Takeda foi Morihei Ueshiba, el fundador del Aikido.

Historia[editar | editar la fonte]

El llinax de la familia Takeda anicia hai unos 900 años, con Shinra Saburo Minamoto no Yoshimitsu (1045-1127), samurái del clan Minamoto y miembru del Seiwa Genji (rama de la familia Minamoto que venía del emperador Seiwa). El nome Daito-ryu débese al castiellu de Daito u viviera Yoshimitsu de neñu, na provincia d'Omi, actual prefeutura de Shiga.[1] Según la lleenda, Yoshimitsu disecó los cadabres d'homes muertos en batalla, estudiando la so anatomía col envís de deprender téuniques de torcimientu d'articulaciones y kyusho jutsu (golpes a los puntos vitales).[2]

Primero Yoshimitsu estudiara l'arte marcial a mano vacía del tegoi, antecesor del deporte nacional xaponés del sumo, y amestó esti deprendimientu al arte. Más tarde establecióse na provincia de Kai, actual Prefeutura de Yamanashi), y tresmitió nel sen de la so familia lo que deprendiera.

El fíu mayor de Shinra Saburo Minamoto no Yoshimitsu, Minamoto no Yoshikiyo (muertu en 1163), que vivía na provincia de Kai, concretamente en Takeda, foi’l que dio’l nome d'esti pueblu a tola familia (primer xeneración de los Takeda)[3]. Por mor de les amenaces que peñeraben sobre’l clan Takeda, el so sobrín Takeda Kunitsugu foi acoyíu nel 1574 por Moriuji Ashina, xefe del clan d'Aizu (na rexón d'Aizu, provincia d'Iwashiro al noroeste d'Edo). N’agradecimientu aprendió-yos los sos conocimientos marciales (aiki-in-yo-ho) a los cabezaleros del clan.

En 1643, un daimyo llamáu Hoshina Masamori, emparentáu col clan Takeda y sobre too col shogun Tokugawa, convertióse en xefe del clan Aizu. Conseyeru de los Tokugawa, camudó l'arte p'adautalu a les necesidaes de la seguridá interior del palaciu (especie de guardia personal). Yera tamién discípulu de la Ono-ha Itto-ryu (kenjutsu).

L’arte algamó sonadía cuando los guardies personales del shogun foron entrenaos pol clan Aizu. Más tarde, Takeda Takumi no Kami Soemon (Takeda Soemon, 1758 – 1853), tamién sacerdote shinto espertu en delles artes marciales (como’l jujutsu), tresmitió l'heriedu de l'aiki-in-yo-ho al so fíu Takeda Sokichi (1829 – 1905). El clan Aizu enfrentóse a los exércitos que queríen restaurar al emperador. Vencíu en 1868, el clan foi diezmáu y la mayoría de los cabezaleros sobrevivientes fixeron seppuku.

Saigo Tanomo (1830 –1903) gran conseyeru del clan Aizu y tamién gran sacerdote shinto del templu de los Tokugawa, enseñó a Sokaku Takeda (Takeda Minamoto no Masayoshi, 1859 – 1943 ) el “denchu saho” (la etiqueta dientro de los castiellos). Esti estilu d'etiqueta llamábase Oshikiuchi. Takeda Sokaku introduxo dellos elementos del Oshikiuchi nel Aiki-jujutsu.

Sokaku Takeda (武田 惣角, Takeda Sōkaku), kenjutsuka terrible, recibió de neñu les enseñances de so padre, Takeda Sokichi. Estudió’l kenjutsu de les escueles Jikishin Kage-ryu (Kajima Shinden Jikishin Kage-ryu) y Ono-ha Itto-ryu, el yari-jutsu de la Hozoin-ryu, el bojutsu y el sumo, y de xuru que l'arte Aiki-jujutsu del clan Aizu.

Emplegando’l nome Daito del castiellu de Minamoto Yoshimitsu, nacía con Sokaku Takeda’l Daito-ryu Aiki-jujutsu.

Sokaku popularizó’l Daito-ryu a primeros del sieglu XX. El tercer fíu de Sokaku, Tokimune Takeda (1916-1993), convertióse en xefe del Daito-ryu dempués de la muerte de so padre. D’un calter más suave y flexible qu'esti, Tokimune construyó un dojo, el Daito-kan, y codificó l'arte amestándo-y mui bien de cambeos importantes, camudando los antiguos términos téunicos por denomaciones más lóxiques y clares, y instituyó un sistema de graos (como los graos dan) y de diplomes. Arriendes de la rama principal del ryu baxo la familia Takeda, hai delles otres rames del Daito-ryu que caltienen la so propia xerarquía y currículum.

Les téuniques[editar | editar la fonte]

En total hai 2.884 téuniques, que se prautiquen tradicionalmente d'una forma secuencial dientro de cada nivel, qu'inclúi téuniques pa llevantase dende’l suelu, contra un adversariu tamién sentáu, tando dambos llevantaos, pa defendese dende’l suelu tando l'adversariu de pie, o finalmente d'espaldes al adversariu.

Nun se pue avanzar al nivel siguiente mentanto nun se demuestre’l dominiu del anterior. Al completar cada nivel se recibe un certificáu que rexistra toles téuniques que se dominen.

El primer nivel de téuniques llámase shoden waza, y trata principalmente del equilibriu, la respiración, el desequilibriu, la distancia, la oportunidá, l'atención y l'aición sobre puntos febles y articulaciones.

La llista de catálogos nel estilu clásicu de Tokimune y el númberu de téuniques en caún indíquense darréu.

Nivel Téuniques
1 Hiden mokuroku (秘伝目録) 118
2 Aiki-no-jutsu (合気之術) 53
3 Hiden ōgi (秘伝奥義) 36
4 Goshin'yō-no-te (護身用の手) 84
5 Kaishaku sōden (解釈相伝) 477
6 Menkyo Kaiden 88


Delles escueles que dicen derivar del Daito-ryu[editar | editar la fonte]

  • Takuma Hisa (1895–1980), Daito-Ryu Takumakai
  • Morihei Ueshiba (1883–1969), Aikido
  • Okabayashi Shogen (1949), Hakuho-ryu
  • Ogami Kenkichi (1936), Daito-ryu Daibukan
  • Sagawa Yukiyoshi (1902-1998), Sagawa den Daito-ryu Aiki Bujutsu
  • Seigo Okamoto, Daito-ryu Roppokai
  • Katsumi Yonezawa (1937-1998), Daito-ryu Bokuyokan
  • Yamamoto Kakuyoshi, Aiki Shinto Jushinkai
  • Takeda Hitoshi, Daito-ryu Aiki Budo
  • Takeda Munemitsu (1924)
  • Kondo Katsuyuki, Daito-ryu Shimbukan
  • Okuyama Ryuho, Hakko-ryu
  • Shigemitsu Kato, Aiki Daito Kai
  • Choi Yong Sul (1904-1986), Hapkido
  • Keido Yamaue (1946), Yamaue Ryu.
  • Yoshida Kotaro (1883-1966), Yanagi-Ryu
  • Mikinosuke Kawaishi (1908-1969), Kawaishi-Ryu
  • Georges London (1908-1971), Aiki-Tai ha [4].

Referencies[editar | editar la fonte]

  1. Daito-ryu Aikijujutsu Headquarters (2006). «History of Daito-ryu: prior to the 19th century». History. Daito-ryu Aikijujutsu Headquarters. Archiváu dende l'orixinal, el 2007-07-06.
  2. Takuma Hisa Sensei, Shin Budo magazine, November 1942. republished as «Daito-Ryu Aiki Budo». Aiki News 85. Summer 1990. http://www.aikidojournal.com/article.php?articleID=497. 
  3. "Japan's Ultimate Martial Art: Jujitsu Before 1882" Darrell Max Craig. Charles E. Tuttle Company, Rutland, Vermont. 1995. ISBN:978-0804830270.
  4. www.Bushido.org

Enllaces esternos[editar | editar la fonte]