Saltar al conteníu

Cueva d'El Quintanal

De Wikipedia
Cueva d'El Quintanal
Bien d'Interés Cultural
monumentu y cave with prehistoric art (en) Traducir
Llocalización
País España
Autonomía Principáu d'Asturies
Provincia provincia d'Asturies
Conceyu Llanes
Coordenaes 43°25′27″N 4°49′56″W / 43.4243°N 4.8321°O / 43.4243; -4.8321
Cueva d'El Quintanal alcuéntrase n'Asturies
Cueva d'El Quintanal
Cueva d'El Quintanal
Cueva d'El Quintanal (Asturies)
Patrimoniu
BIC RI-51-0010082[1]
Cambiar los datos en Wikidata

La Cueva d'El Quintanal ye una cueva asitiada nel conceyu asturianu de Llanes, declarada Bien d'Interés Cultural cola categoría de Monumentu.

Descripción

[editar | editar la fonte]

La cueva alcuéntrase nel sector nororiental del cordal de La Llera, cercana a la cueva de Valmori, asitiaes dambes nel llugar de Valmori, parroquia de Barru, conceyu de Llanes.

Foi desanubría por Hermilio Alcalde del Río[n 1] en 1908, espublizándose l'afayamientu en 1911 en Les Cavernes de la Région Cantabrique (obra de la que foron autores Henri Breuil[n 2], Hermilio Alcalde del Río, y L. Sierra). Ye un cuévanu de modestu desendolcu, cola boca d'accesu empobinada pal sur, y malpenes a unos metros de l'autovía del Cantábricu, dixebrada d'esta per un muriu de formigón.

El conxuntu rupestre allúgase nuna galería estrecha ataponada por una colada estalagmítica, nuna zona de clarixa. El so motivu principal ye la contorna dorsal y frontal d'un cuadrúpedu, identificáu como un xabaril o un bisonte, y realizáu con un solu trazu impresu sobre'l magre de descalcificación que recubre la roca,

Con posterioridá a la edición de Les Cavernes de la Région Cantabrique, publicóse una estensa bibliografía sobre les cueves asturianes, na que se foron cometiendo a lo llargo'l tiempu, erros y tracamundios, qu'enzanquen una conocencia precisa de la Cueva d'El Quintanal. Asina autores de referencia como Ricardo Duque de Estrada (Conde de la Vega del Sella), Hugo Obermaier Grad[n 3], Eduardo Hernández-Pacheco[n 4], o Francisco Jordá Cerdá[n 5], en dalgunos de los sos trabayos, refiérense indistíntamente a la Cueva de Valmori y a la Cueva d'El Quintanal, como si se foren una única cueva.

M. Mallo Viesca y J. M. Suárez, nun artículu de 1973, sobre les pintures de les cueves de la Riera y de Valmori, esclariaron esti tracamundiu describiendo de mou y manera detallada la zona, confirmando que la referencia más exauta sobre la cueva, ye la recoyida en Les Cavernes de la Région Cantabrique, en 1911.

Nuna zona inmediata a la entrada la cueva, y nel primer recantu de la parede esquierda de la galería, atópense los grabaos. La figura principal, y tamién la más visible y citada, ye la que H. Breuil, H. Alcalde del Río, y L. Sierra identificaron como un xabaril. Ye una figura fecha con un únicu trazu dixital sobre'l barrucanu de cal aposáu sobre la parede, con rebarbes qu'arrodien el trazu. Tien apariencia de representar el contornu dorsal y frontal d'un animal, yá que nun hai signos de que se grabaren nin banduyu nin estremidaes. Na parte cimera percíbese nidiamente la buelga de trés trazos dixitales, que creen una forma arredondiada.

Sobro la cabeza la figura, estrémense de mou claru dos trazos curtios que continúen nun trazu únicu na direición opuesta, pa enllaciar con otros escarrapios de grabáu, que podríen ser d'otra figura, d'imposible identificación pol estáu de la parede.

Estos detalles anatómicos sobre la cabeza l'animal, y la esistencia d'un relieve de magre na parede con señales d'habese modeláu escultóricamente, pa crear la forma d'una pata delantera, suxeren a estudiosos como Manuel R. González Morales y M.ª del Carmen Márquez Uría, que podríen corresponder a un bisonte y non a un xabaril.

Sobro esta figura superponse otra dibuxada cola mesma téunica, resultando la so identificación entá más problemática. De los trazos más visibles, pue albidrase que sería'l contornu dorsal d'otru animal, de mayor tamañu.

En dambes representaciones, el magre ta dafechu atarragáu pela cristalización de la calcita, y tan anubríes por una coria estalagmítica, lo que ye seña de la so antigüedá.

Pol so estilu, estes representaciones podríen encaxar nuna fase temprana del Paleolíticu Superior, en concreto y acordies cola cronoloxía del arte paleolíticu franco-español creada por André Leroi Gourhan[n 6], qu'establez una serie de cinco estilos, la Cueva d'El Quintanal pertenecería al estilu II (Gravetto – Solutrense)[n 7]. Jordá Cerdá asitió la figura principal en tiempos solutrenses, mentanto que González Morales y Márquez Uría señalen paralelismos d'estes figures, coles de les cueves de La Clotilde de Santa Isabel, Las Chimeneas, Altamira y Hornos de la Peña (toes estes en Cantabria).

La Cueva d'El Quintanal foi declarada Bien d'Interés Cultural n'aplicación del artículu 40.2 de la Llei 16/85, de 16 de xunu, del Patrimoniu Históricu Español, que concedió esta declaración a les cueves, abrigueos y llugares que contuvieren manifestaciones d'arte rupestre. Darréu, el Principáu d'Asturies, per aciu del Decretu 120/2009, de 16 de setiembre (B.O.P.A.. númberu 229, de 2 d'ochobre de 2009), procedió a marcar les llendes pa la proteición de la Cueva d'El Quintanal (conxuntamente cola de Valmori).

Notes

[editar | editar la fonte]
  1. ↑ Hermilio Alcalde del Río. (Villamediana, Palencia, 1866 - Torrelavega, Cantabria, 1947), foi un arqueólogu español.
  2. ↑ Henri Breuil. (Mortain dans la Manche, 28/02/1877 - L'Isle-Adam, 14/08/1961) foi un presbíteru, naturalista, arqueólogu, prehistoriador, xeólogu ya etnólogu francés.
  3. ↑ Hugo Obermaier Grad (Regensburg, Alemaña, 29/01/1877 - Fribourg, Suiza, 12/11/1946) foi un prehistoriador y paleontólogu alemán, nacionalizáu español con posterioridá.
  4. ↑ Eduardo Hernández-Pacheco y Estevan (Madrid, 23/05/1872 - Alcuéscar, 06/03/1965) foi un xeólogu, paleontólogu ya arqueólogu español.
  5. ↑ Francisco Jordá Cerdá (Alcoy, 20/06/1914 - Madrid, 10/09/2004) foi un prehistoriador español, especialista nel Paleolíticu Superior y Epipaleolíticu, señaláu investigador del periodu solutrense n'España ya esperto n'arte rupestre paleolíticu y postpaleolíticu.
  6. ↑ André Leroi-Gourhan, (París, 25/08/1911 - París, 19/02/1986) foi un etnólogu, arqueólogu ya historiador francés, doctor n'humanidaes y doctor en ciencies, tando consideráu un de los mayores especialistes franceses en Prehistoria ya Antropoloxía.
  7. ↑ Solutrense: Periodu del Paleolíticu Superior, na transición del Gravetiense al Magdaleniense, desarrolláu en Francia y na península ibérica. El so nome provién de los xacimientos de Crôt du Charnier, en Solutré (rexón de Borgoña).

Bibliografía

[editar | editar la fonte]
  • Alcalde del Río, Hermilio; Breuil, Henri y Sierra, L: Les cavernes de la Région Cantabrique. Imp. A. Chêne. 1911. Mónaco.
  • González Morales, Manuel R. y Márquez Uría, M.ª del Carmen: Llanes:Nota sobre la cueva de El Quintanal (Balmori) y sus grabados rupestres. Boletín del Real Instituto de Estudios Asturianos nº 81 (pax. 235-246). 1974. Uviéu
  • Barroso del Río, Ofelia y Río Berguño, Federico del: Arte rupestre. La prehistoria ilustrada en las cuevas del oriente de Asturias. Monografías del Oriente de Asturias n.º 4 (pax. 72). 2008. Llanes.
  • VV.AA.: Asturias concejo a concejo. Llanes, Ribadedeva. Real Instituto de Estudios Asturianos / Caja de Ahorros de Asturias. Coleición Asturias concejo a concejo n.º 2. (pax. 54 y ss.). 1993. Uviéu.

Referencies

[editar | editar la fonte]

Esti artículu ye una obra derivada de la disposición relativa al procesu de declaración d'un bien cultural o natural, asoleyada nel B.O.P.A. númberu 229, de 2 d'ochobre de 2009, testu que ta llibre de restricciones conocíes, en virtú del derechu d'autor de conformidá col artículu 13 del Testu Refundíu de la Llei de Propiedá Intelectual (B.O.E. númberu 97, de 22 d'abril de 1996).

Enllaces esternos

[editar | editar la fonte]
  1. ↑ «Wiki Loves Monuments monuments database» (13 payares 2017).
Sacáu de «https://ast.wikipedia.org/w/index.php?title=Cueva_d%27El_Quintanal&oldid=4660943»