Cuenques Mineres

De Wikipedia
Cuenques Mineres
Situación
País España
Autonomía Principáu d'Asturies
Tipu rexón xeográfica
Datos
Cambiar los datos en Wikidata

Les Cuenques Mineres, o La Cuenca ye'l nome col que se conoz tradicionalmente al territoriu históricu asitiáu na Cuenca Hullera Central del Asturies, nos valles centrales del Principáu.

Anque oficialmente considérense conceyos mineros, de distinta categoría, más de 20 conceyos asturianos, popularmente desígnase asina a los conceyos más direutamente venceyaos al carbón y qu'exercieron mayor importancia histórica en materia económico, social y cultural, siendo éstos los del Valle del Caudal (Mieres, Ḷḷena, Ayer, Santo Adriano, Morcín y Riosa) y los del Valle del Nalón (Llangréu, Samartín del Rei Aurelio, Llaviana, Casu y Sobrescobiu).

Descripción[editar | editar la fonte]

Industrialización[editar | editar la fonte]

La empresa minero y siderúrxico Duro Felguera nos años 20
Planu inclináu na minería de monte nel Caudal
Castillete mineru nel Pozu El Terrerón de Tiuya
Los ferrocarriles tuvieron una importancia capital nel desenvolvimientu de les Cuenques. Antigua estación del FC Vascu-Asturianu
Antiguu Pozu San Luis, güei Ecomuséu mineru del Valle de Samuño
Universidá d'Uviéu, Campus de Mieres
Muséu de la Siderurxa d'Asturies, en La Felguera
Templu prerrománicu de Santa Cristina de Ḷḷena

A finales del sieglu XVIII empiecen a conocese les propiedaes del carbón d'hulla d'estos valles, estudiáu por, ente otros, Gaspar Melchor de Xovellanos.[1] La esplotación sistemática nun llegaría hasta'l sieglu XIX con diverses lleis estatales y polítiques empuestes a tal fin. A mediaos de 1848 púsose en marcha l'altu fornu de l'Asturian Mining Company en Ablaña (pa dar pasu más tarde a la Fábrica de Mieres) y unos años más tarde fúndase la Fábrica de La Felguera, so les cuales amontóse l'esplotación del carbón y l'espansión de numberoses industries secundaries, tales como químiques, metalúrxiques, máquines, alimentaries, cerámiques, enerxétiques, etc.[2] Menor importancia tuvo l'esplotación de dellos xacimientos de mercuriu.[3] En 1854 inaugúrase'l Ferrocarril de Llangréu, terceru de la península, que dos años más tarde xunió la Cuenca del Nalón col puertu de Xixón. Pocu dempués construyéronse más llinies ferroviaries xuniendo tamién el Caudal cola mariña y el pandu, y al Nalón con Uviéu, al empar que se construyíen distintos ferrocarriles mineros que travesaben los valles cargando mineral. A lo llargo de tol sieglu XIX nacieron numberoses empreses mineres, munches d'elles de capital estranxeru. Mientres la Primer Guerra Mundial foi bien significativu la medría de les tonelaes estrayíes nestos dos valles, que significaba la mayor parte del carbón que s'esplotaba en toa España. La situación sostúvose gracies a les polítiques proteicionistes de Primo de Rivera, la Segunda República, el repique gracies a la Segunda Guerra Mundial y l'autarquía franquista, que la conformaron como la zona de mayor producción mineral d'España.[4] Nel sieglu XX les esplotaciones de monte reculen dexando pasu a la profundización de pozos soterraños, que dexaron la buelga del castillete nel paisaxe. Mientres más d'un sieglu fueron miles les families procedentes del restu d'España les que s'asitiaron nes Cuenques Mineres asturianes, con especial relevancia les folaes d'inmigrantes llegaos nos años 40 y 50, especialmente d'Andalucía, Estremadura o Galicia.

El progresu industrial de la zona materializóse n'otros munchos aspeutos. La crecedera d'una ingente masa obrera, la creación d'asociaciones polítiques, sindicales, culturales (hubo un gran númberu de cines, teatros, conxustes, biblioteques y ateneos obreros nes cuenques), la crecedera urbana especialmente relevante en llugares como Mieres, La Felguera, Sama o L'Entregu, la proliferación d'escueles relixoses, empresariales y públiques, les escueles de capataces y artes y oficios, les polítiques paternalistes (unu de los paradigmes de pobláu obreru, Bustiello[5]), etc. La llucha obrera foi significativa, dende pequeñes fuelgues nel XIX hasta les fuelgues d'empiezos del sieglu XX (especialmente relevante La Fuelgona de 1912), la relevancia na Revolución d'ochobre de 1934 o la Fuelga de 1962[6], la primera gran fuelga contra'l franquismu.

Declive[editar | editar la fonte]

Cola lliberalización del mercáu empezó a acolumbrase un futuru negru pa estes comarques, a pesar de la creación de la empresa pública Hunosa en 1967, que foi ocupando toles empreses mineres qu'esistíen nesta zona. Na década de los 60 nacen Uninsa y Ensidesa, tamién nes cuenques, pero'l mayor puntu d'espansión ocupáronlo Avilés y Xixón como "polos de desenvolvimientu".[7] L'actividá industrial empezó a movese nos años 70 a la mariña asturiana lo que significó l'entamu del zarru de decenes de talleres, factoríes, el valtamientu de la Fábrica de Mieres nos setenta y el de La Felguera nos ochenta (esta postrera nun foi baltada na so totalidá).[8] La población empezó a movese en grandes cantidaes tamién a la mariña. A partir de los años 80 y 90 empezaron los zarros de pozos mineros, especialmente nesta última década, que siguen anguaño. Causaron una gran conflictividá social ente sindicatos, ciudadanos y los distintos gobiernos. La conflictividá amenorgó gracies a los distintos planes del carbón y la concesión de prexubilaciones, a temprana edá en dellos casos.[9] A finales de los 90 nacieron los Fondos Mineros pa la reestructuración de les contornes mineres en toa España, con munches incidencia n'Asturies, y la busca d'un texíu económico alternativu al zarru de les industries. Estos fondos, sicasí, fueron xestionaos con poca responsabilidá, sometíos a continuos atrasos o parones sistemáticos per parte, especialmente, del gobiernu autonómicu, cuando non utilizaos pa munchos proyeutos independientes a la rexeneración económica de les Cuenques Mineres.[10] L'entós presidente del Principáu Vicente Álvarez Areces anunció na campaña eleutoral de 2007 la construcción de dos grandes parques teunolóxicos en Les Cuenques (Figareo en Mieres y Llangréu Norte en Llangréu), que nun se construyeron.[11][12] Mientres el gobiernu de José Luis Rodríguez Zapatero estos fondos fueron conxelaos na práutica y finalmente róblase en 2010 el zarru de la minería.[13][14] En 2011 la Xunión Europea dictaminó'l zarru de toles mines non rentables pa 2018, estableciéndose un calendariu a partir de 2013 de los siete pozos que quedaben nel Caudal y el Nalón y más tarde proyeutó'l final de les ayudes en 2014.[15] Ante la política de retayos na minería del carbón del Gobiernu de Mariano Rajoy prodúxose en 2012 una gran esguilada de conflictividá col paru total n'Hunosa (como n'otres zones mineres d'España), la corte habitual de les víes de comunicación per carretera y ferrocarril nel Principáu y choques bien violentos ente autoridaes y mineros nos montes y en cascu urbanu, causando numberosos deteníos, como yá asocediera a empiezos de los años 90.[16]

Les Cuenques[editar | editar la fonte]

Esta comarca llegó a desenvolver una marcada cultura basada na intensa actividá industrial, que puede reparase na poesía, el cantar, la lliteratura, etc. N'ocasiones inspiraes nos accidentes mineros, l'aballador mundu obreru, el progresu industrial, el contraste col mundu rural (qu'afiguró Armando Palacio Valdés na so Aldea perdida) y la llucha por derechos, llibertaes y meyores nes condiciones de vida. Bien conocida n'Asturies y Lleón ye l'himnu mineru de Santa Bárbara Bendita.

Anguaño siguen cuntando con recursos industriales (Planta de Bayer, Central térmica de Lada, Central térmica de La Pereda, Química del Nalón, polígonos industriales...), empresariales (Ciudá Teunolóxica de Valnalón), turísticos (Muséu de la Siderurxa, Muséu de la Minería, Ecomuséu y Tren Mineru del Valle de Samuño, Centru d'Interpretación del Pozu Espinos, Centru d'Interpretación de Bustiello, etc.) naturales y deportivos (Parque Natural de Redes -reserva de la biosfera de la Unesco-, Paisaxe Protexíu de les Cuenques Mineres, Fuentes d'Iviernu) artísticos (Prerrománicu, Arte medieval, Patrimoniu industrial y urbanu) ya intensa actividá cultural. Xunten unos 150.000 habitantes a pesar de la crisis demográfica que carez en gran parte del territoriu.

Llocalidaes de les Cuenques Mineres por población[editar | editar la fonte]

Llangréu: Sama y La Felguera

Referencies[editar | editar la fonte]

Enllaces esternos[editar | editar la fonte]