Cosmódromo de Baikonur

De Wikipedia
Saltar a navegación Saltar a la gueta

Plantía:Ficha de plataforma de despegue El Cosmódromo de Baikonur (kazaquistanín: Байқоңыр ғарыш айлағы, Bayqoñır ğarış aylağı; rusu: Космодром Байкону́р, Kosmodrom Baykonur) tamién llamáu Tyuratam ye la mayor y más antigua instalación de llanzamientu espacial del mundu. Originariamente foi construyida pola Xunión Soviética. Ta baxu control de Rusia, dende'l colapsu de la URSS en 1991, anque s'alluga en Kazakstán, na provincia de Kyzylorda. Asitiáu a 200 km al este del mar d'Aral, xuntu al río Syr Darya, cerca de la ciudá de Tyuratam, en partir sur central del país.

El nome Baikonur escoyóse arremente pa esviar l'atención d'Occidente faciendo creer que'l llugar taba cerca de la ciudá de Baikonur, una ciudá minera 41 km al sur del centru espacial nuna área desértica cerca de Dzhezkazgán.

Baikonur yera'l centru d'operaciones del ambiciosu programa espacial soviéticu dende finales de los años 1950 hasta los años 1980 y ta forníu con instalaciones completes pal llanzamientu de vehículos espaciales tantu tripulaos como non tripulaos. Soporta una amplia gama de cohetes: Soyuz, Protón, Tsyklón, Dnepr y Zenit. Xuega un papel esencial nel desenvolvimientu y na realización d'operaciones rutinaries de la Estación Espacial Internacional.

La fecha oficial de fundación del sitiu considérase'l 2 de xunu de 1955. Construyóse originariamente como un centru de llanzamientu de misiles de llargu algame y más tarde espandióse pa incluyir instalaciones pa vuelu espacial. Al so alredor, construyóse una ciudá de soporte de la instalación con escueles, apartamentos y demás pa los obreros. En 1966 dióse-y el títulu de ciudá y foi llamada Leninsk, más tarde se renombró como Baikonur en 1995.

Allugamientu del cosmódromo.

Munchos vuelos espaciales hestóricos partieron de Baikonur: el primer satélite artificial, Sputnik 1, el 4 d'ochobre de 1957, el primer vuelu orbital tripuláu por Yuri Gagarin en 1961, y el vuelu de la primer muyer nel espaciu, Valentina Tereshkova en 1963.

El programa siguió dempués de la disolución de la Xunión Soviética en 1991, so los auspicios de la Comunidá d'Estaos Independientes. El 8 de xunu de 2005 el conseyu de la Federación Rusa ratificó un alcuerdu ente Rusia y Kazakstán pal usu efectivu del cosmódromo de Baikonur. L'alcuerdu estiende l'arriendu per parte de Rusia del cosmódromo de Baikonur hasta'l 2050[1] con un costo de 115 millones de dólares añales.

Dada la disputa ente Rusia y Kazakstán sobre'l nivel de pagu pol arriendu del cosmódromo, Rusia empezó a espandir el so propiu Cosmódromo de Plesetsk nel óblast de Arjánguelsk al norte de Rusia.

Anguaño esti cosmódromo puede llanzar los tipos de cohetes siguientes: Protón-K, Rókot, Soyuz-O, Mólniya-M, Tsyklón-2 y Zenit. Pa ellos cunta con ocho plataformes operacionales.

El centru de llanzamientu cunta con:

  • Planta de producción d'osíxenu y nitróxenu, esenciales pa los cohetes.
  • 2 aeropuertos.
  • 470 km de víes ferriales.
  • 1281 km de carreteres.
  • 6610 km de llinies de comunicación.
  • 360 km d'oleoductos.
  • 92 sitios de comunicación.

El cosmódromo consumía añalmente 600 millones de kWh d'enerxía eléctrica.[1]

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]


Cosmódromo de Baikonur