Copa de les Naciones de Saltos de la FEI

De Wikipedia
Saltar a: navegación, buscar

La Copa de les Naciones de Saltos de la FEI (anguaño, oficialmente, por razones publicitaries y n'inglés: Furusiyya FEI Nations CupTM Jumping) ye la competición hípica de saltos por equipos más antigua y perimportante del mundu. Ta organizada pola Federación Ecuestre Internacional (FEI) y sacante los Xuegos Olímpicos y el Campeonatu del Mundu ye la única competición na que participen seleiciones, escoyendo les federaciones nacionales a los miembros del so equipu.

Esti tipo de pruebes por equipos vienen faciéndose dende 1909, anque al principiu unes yeren independientes de les otres. Una vez entendida la Copa de les Naciones como una competición conxunta, el formatu d'esta camudó delles vegaes a lo llargo de la hestoria.

Nes pruebes de la Copa de les Naciones caún de los equipos ta compuestu por cuatro binomios xinete-caballu pero nun se tien cuenta pa la puntuación del equipu'l peor resultáu de los cuatro. Los ocho meyores países d'esta primer ronda pasen a una segunda ronda con un sistema similar y de la que sal la clasificación final.

El vixente campeón (2013) ye Francia, equipu que se reparte con Alemaña'l primer puestu dende 2006.

Historia[editar | editar la fonte]

Los entamos (1909-1928)[editar | editar la fonte]

Les primeres pruebes de Copa de les Naciones tuvieron llugar en 1909, más d'una década enantes de la constitución de la FEI, n'Olympia (West Kensington - Londres) en pista cubierta y en Donostia al aire llibre, de forma dixebrada una de la otra. La prueba de Londres foi en xunu de 1909 y nella participaron seis países con tres xinetes caún, clasificándose Francia primera, Italia segunda y Gran Bretaña tercera. El 17 de setiembre del mesmu añu celebróse la segunda Copa de les Naciones en Donostia (única vez na historia que se celebró ellí). Los participantes fueron siete equipos de cinco binomios caún. Sólo cuatro xinetes de los que participaren en xunu en Londres repitieron nesta ocasión. El tornéu ganólu Italia, completando'l podiu España y Arxentina.

En 1910 celebráronse otra vuelta dos pruebes de Copa de les Naciones: una n'Olympia (Londres) y otra en Bruxeles. Ye a partir de 1911 cuando entama a desendolcase un marcu estable pa la competición, habiendo esi añu pruebes en Roma, Turín, Bruxeles, Londres y Nueva York (nel Madison Square Garden). L'ésitu de la competición y el reconocimientu ganáu nos países nos qu'entamó per entós a prauticase esti deporte ficieron posible que los saltos hípicos entraren nel programa olímpicu al añu siguiente (nos Xuegos Olímpicos de Londres 1912).

Los primeros años de la FEI (1929-1939)[editar | editar la fonte]

Va a ser en 1930 cuando la FEI, que fuera fundada en 1921, supervise la competición por primer vez col establecimientu d'un calendariu internacional pa les pruebes de Copa de les Naciones. Esi añu, celebráronse catorce: Berlín, Aachen, Niza, Roma, Bruxeles, Lisboa, Varsovia, Londres, Lucena, Xinebra, Dublín, Boston, Nueva York y Toronto. Col sistema de puntuación modernu, Italia sería ganadora con 34 puntos, siguida d'Alemaña (27 puntos) y Suiza (24 puntos).

Durante la década de los años trenta, el lideralgu de Francia, Italia y Suiza foi camudando de forma qu'estos años fueron Alemaña ya Irlanda los países que dominaron la competición: Alemaña ganó, ente 1931 y 1939, 29 pruebes de Copa de les Naciones, ya Irlanda otres 22 na mesma época.

Periodu de posguerra (1945-1964)[editar | editar la fonte]

Dempués de terminar la II Guerra Mundial, retomáronse les competiciones internacionales de Copa de les Naciones. Nos primeros años hebo namás pruebes en Dublín, Nueva York y Toronto, creciendo col tiempu'l número de pruebes disputaes y el de países participantes. Alemaña foi recuperando lideralgu dende la vuelta a la FEI de la República Federal d'Alemaña en 1952.

Copa del Presidente (1965-1984)[editar | editar la fonte]

En 1964 el Conceyu Xeneral de la FEI elixó al Príncipe Felipe d'Edimburgu como cabezaleru. Va a ser él quien propón entós la creación d'un campeonatu basáu nos resultaos de les pruebes de Copa de les Naciones, ofreciendo como premiu'l Troféu de la Reina (nel que se representaba a la so muyer, la reina Isabel II, montando a caballu). La primer edición baxo'l nuevu sistema, celebrada en 1965, foi ganada por Gran Bretaña (qu'esi añu ganó la Copa de les Naciones de Madrid, Olsztyn, Dublín, Copenhague, Ostende y Rotterdam) con 34 puntos. En segunda y tercera posición quedaron Italia y la República Federal d'Alemaña, con 30 y 28 puntos respeutivamente.

Ente 1966 y 1968 la Copa del Presidente ganáronla los Estaos Xuníos. Ente los años 1969 y 1979, los triunfos repartiéronselos Gran Bretaña (7) y la República Federal d'Alemaña (4). El ganador de 1980 foi Francia.

Troféu Príncipe Felipe (1985-1986) y Troféu Gucci (1987-1989)[editar | editar la fonte]

Nel añu 1985, la Copa del Presidente (y el Troféu de la Reina) dieron pasu al Troféu Príncipe Felipe, un nuevu campeonatu añal con un nuevu sistema de puntos.

El nome de la competición pasa a ser Troféu Gucci, ente 1987 y 1989, pola aparición del primer patrocinador oficial. Tanto en 1987 (con 17 pruebes) como en 1988, el ganador final va a ser Francia.

Copa de les Naciones HCS (1990-1991) y Troféu de les Naciones (1992-1996)[editar | editar la fonte]

Nel añu 1990, Gucci dexa pasu a HCS como patrocinador principal de la competición. La crisis económica fizo, sin embargu, qu'esti patrociniu durara poco más d'un añu. Pese a lo curtio d'esti periodu, la Copa de les Naciones HCS de 1991 tevo una novedá importante: en setiembre d'esi añu celebróse la primer final de la competición en Lanaken (Bélxica), siendo los Estaos Xuníos el ganador de la mesma.

La final de la Copa de les Naciones foi abolida cola salida de HCS como patrocinador, y ente 1992 y 1996 volvióse al sistema de victoria a los puntos (Troféu de les Naciones).

Copa de les Naciones Samsung (1997-2002)[editar | editar la fonte]

La empresa coreana Samsung entamó a patrocinar pruebes hípiques en 1995, y dempués de llargues negociaciones, pasó a ser el patrocinador de la Copa de les Naciones a cambiu d'un presupuestu de 3 millones de francos suizos. La primer Copa de les Naciones Samsung entamó el 11 de mayu de 1997 en La Baule (Francia). Esi añu la competición consistió en 17 pruebes y el final de temporada foi la Copa de les Naciones de Canadá, celebrada en Spruce Meadows (Calgary - Canadá). La prueba formó parte de la fase regular pero cola diferencia de que la puntuación de cada puestu yera doble. Los Estaos Xuníos ganaron esta primer Copa de les Naciones Samsung con 37,5 puntos y los Países Baxos quedaron en segundu puestu con 34 puntos. El premiu al meyor xinete de la Copa de les Naciones ganólu Alison Firestone (Estaos Xuníos). El sistema de puntuación daba a cada xinete un puntu por facer un recorríu de Copa de les Naciones ensin faltes y tres en casu de facer ensin falta los dos recorríos de la mesma prueba.

En 1998, participaron 30 equipos coles mesmes regles que l'añu anterior, y la prueba final de temporada tevo llugar en Donaueschingen (Alemaña) el 20 de setiembre, proclamándose Francia como ganador final de la competición.

A pesar de les emocionantes finales de 1997 y 1998, pa la edición de 1999 camudáronse les regles de la competición y recuperóse otra vuelta una final como la de 1991. Esa final fízose en Xixón (España) y pese a que los Países Baxos encabezaron la fase regular, la final y en consecuencia la Copa de les Naciones Samsung 1999 foi ganada por Francia.

Esti sistema caltúvose dende'l 2000 al 2002, años nos que Irlanda y Alemaña ganaron la fase regular (la segunda, dos veces) pero nos que la victoria final foi pa Alemaña (2000), Países Baxos (2001) ya Italia (2002).

Superlliga Samsung (2003-2008)[editar | editar la fonte]

Nel añu 2003 la estructura de la Copa de les Naciones camudóse dafechu, creándose una Superlliga colos ocho meyores equipos del mundu. La competición consistió en ocho pruebes: La Baule, Roma, Lucerna y Saint Gallen, Rotterdam, Aachen, Hickstead, Dublín y Barcelona. La Copa de les Naciones de Barcelona foi una final al estilu de les de 1997 y 1998, puntuando'l doble que'l restu de pruebes.

Los países que nun formaben parte de la Superlliga Samsung fueron agrupaos en otra competición que recibió'l nome de Copa de les Naciones. El ganador d'un añu d'esta división tenía drechu a participar na siguiente Superlliga Samsung sustituyendo al país con menos puntos d'esi mesmu añu. Esti sistema de relevos tevo vixente dende 2003 fasta 2008.

Copa de les Naciones Meydan FEI (2009-2012)[editar | editar la fonte]

Dempués de retirase Samsung de la promoción de les competiciones de la Copa de les Naciones, la FEI entamó la gueta d'un nuevu patrocinador. Al tiempu, entamóse la revisión de les normes de l'anterior Superlliga Samsung. Asina, el 1 de febreru de 2009 (casi 100 años dempués de la celebración de la primer Copa de les Naciones) dióse anuncia de que'l nuevu patrocinador de la competición diba a ser el grupu constructor Meydan, encargáu de facer el nuevu hipódromu de Dubai. Pa la edición de 2009, el númberu de países con equipu na másima categoría pasó de ocho a diez, anulóse la final de Barcelona y anque'l calendariu quedó práuticamente ensin cambios, añadióse una nueva prueba en Falsterbo (Suecia).

A mou de segunda división, camudóse la Copa de les Naciones anterior (subdivisión de la Superlliga) y formáronse la Lliga Promocional d'Europa, la Lliga Promocional d'América del Norte y la Lliga Promocional d'América del Sur. A estes tres, diba sumáse-yos en 2010 la Lliga Promocional d'Oriente Mediu. Esta estructura volvió a camudar en 2011: la Lliga Promocional d'Europa dixebróse en la Lliga Promocional d'Europa (pa Europa occidental) y la Lliga de Competidores (pa Europa oriental), y la Lliga Promocional d'America del Norte y la Lliga Promocional d'América del Sur xuntáronse na Lliga de les Amériques. Con equipos de toles lligues promocionales tenía llugar cada añu una final en Barcelona.

Ente la Copa de les Naciones Meydan de la FEI y les lligues promocionales afitóse un sistema de sustituciones que diba tamién a sofrir dellos cambeos nestos años. El sistema orixinal de la Copa de les Naciones Meydan de la FEI caltúvose na más qu'un añu. En 2009 taba planeao que los dos equipos con menos puntos na Copa de les Naciones Meydan de la FEI fueran relevaos polos dos primeros equipos de la Final de la Lliga Promocional. Cuando Bélxica y Gran Bretaña empataron nel octavu puestu na clasificación final (aspeutu nun contempláu nes normes) la FEI decidió que los dos países pasaren xunto a Italia (que finara nel caberu puestu) a la Lliga Promocional de la Copa de les Naciones de la FEI. La federación británica reclamó esa decisión y el Tribunal pal Arbitraxe nel Deporte (CAS pol so nome n'inglés) terminó aceutando la reclamación.

Al final de la temporada 2010, baxaron cuatro equipos pa dexar en ocho a los participantes pal añu 2011.

Copa de les Naciones Furusiyya (2013-anguaño)[editar | editar la fonte]

En abril de 2011 fízose anuncia de que Meydan dexaba de ser patrocinador de la competición, que pasa a llamase Copa de les Naciones de la FEI. Dempués d'esa temporada ensin patrociniu, el rei saudí Abdullah bin Abd al-Aziz anuncia que pal añu 2012 el Fondu Ecuestre Saudí (Furusiyya) va a ser el patrocinador de la competición.

Dellos cambeos na estructura de la Copa de les Naciones de la FEI propusiéronse nun alderique fechu en Lausana al rodiu del mes de mayu de 2012 y votáronse nel Conceyu Xeneral que la FEI d'Istambul, en payares de 2012. Col nuevu sistema creáronse siete rexones y divisiones (Europa I, Europa II, América del Norte y Central, América del Sur, Oriente Próximu, África y Asia/Oceanía) y con equipos de toes elles fáese una final na que participen 18 países. Los participantes nes divisiones Europa I y Europa II escuéyense según los resultaos del añu anterior.

Sistema de competición d'anguaño[editar | editar la fonte]

A caún de los países correspuénde-y una rexón atendiendo a criterios xeográficos, pero na más puen competir los que tengan polo menos a cuatro atletes na Clasificiación Longines de finales d'ochobre del añu anterior. Los países europeos son dividíos en dos grupos, de forma que n'Europa I participarán:

  • los tres países europeos meyor clasificaos na final de la Copa de les Naciones del añu anterior.
  • el primer clasificáu de la división Europa II del añu anterior.
  • el segundu clasificáu de la división Europa II del añu anterior, si tuvo ente los ocho primeros clasificaos de la final de la Copa de les Naciones del añu anterior.
  • los países meyor clasificaos de la división Europa I del añu anterior fasta completar un total de 10 equipos.

Los equipos de la división Europa I que quieran, puen renunciar y participar en la división Europa II.

En toles rexones y divisiones, pa poder ser una competición de la Copa de les Naciones ye necesario algamar como mínimo la categoría CSIO3*, sacante Europa I onde va a esixise una categoría CSIO5*. D'ente los concursos propuestos poles federaciones nacionales, la FEI seleicionará como muncho venti eventos. Eses competiciones van ser les puntuables de cara a la clasificación pa la final de la Copa de les Naciones d'alcuerdu col siguiente sistema de clasificación:

  • Nes rexones onde nun haya nengún CSIO seleicionáu, los equipos finalistes escoyeránse d'alcuerdu cola Clasificación Longines.
  • Nes rexones con menos de cuatro pruebes, toes puntúen pa la clasificación.
  • Nes rexones con más de cuatro pruebes, a caún de los equipos dáse-y la oportunidá de participar en un númberu determináu d'eventos, cuntando los puntos ganaos por cada país en cuatro d'ellos como muncho.

Los países sólo puen consiguir puntos en dellos eventos de la so rexón o división, d'alcuerdu col sistema desplicáu enriba. En caún de los concursos, fáese una clasificación paralela a la de la Copa de Naciones en sí colos países de la rexón o división a la que pertenez la prueba, y los equipos que puntúen nesi eventu concretu algamen los puntos que vienen darréu según la so posición nesta clasificación fecha al marxe.

Puestu 1u 2u 3u 4u 5u 6u 7u 8u 9u 10u
Puntos 100 90 80 70 60 55 50 45 40 35


Na final de la Copa de les Naciones van participar un total de 18 equipos (más el país organizador de la final, si nun ta clasificáu):

  • Europa I: 7 países.
  • Europa II: 2 países.
  • América del Norte: 2 países.
  • América del Sur: 2 países.
  • Asia/Oceanía: 2 países.
  • Oriente Próximu: 2 países.
  • África: 1 país.

Clasificaciones[editar | editar la fonte]

Copa de les Naciones Samsung (1997-2002)
Añu Campeón
1997 Flag of the United States.svg Estaos Xuníos d'América
1998 Flag of France.svg Francia
1999 Flag of France.svg Francia
2000 Flag of Germany.svg Alemaña
2001 Flag of the Netherlands.svg Países Baxos
2002 Flag of Italy.svg Italia
Superlliga Samsung (2003-2008)
Añu Campeón Equipu releváu Equipu ascendíu
2003 Flag of France.svg Francia Flag of Sweden.svg Suecia Flag of the United States.svg Estaos Xuníos d'América
2004 Flag of France.svg Francia Flag of Italy.svg Italia Flag of Switzerland.svg Suiza
2005 Flag of the United States.svg Estaos Xuníos d'América Flag of Belgium.svg Bélxica Flag of Sweden.svg Suecia
2006 Flag of Germany.svg Alemaña Flag of Ireland.svg Irlanda Flag of Belgium.svg Bélxica
2007 Flag of Germany.svg Alemaña Flag of France.svg Francia Flag of Ireland.svg Irlanda
2008 Flag of Germany.svg Alemaña Flag of Sweden.svg Suecia Flag of France.svg Francia
Copa de les Naciones Meydan de la FEI (2009-2012)
Añu Campeón Equipu releváu Equipu ascendíu
2009 Flag of France.svg Francia Flag of Italy.svg Italia - Flag of Belgium.svg Bélxica Flag of Spain.svg España - Flag of Poland.svg Polonia
2010 Flag of France.svg Francia Flag of Poland.svg Polonia - Flag of Switzerland.svg Suiza - Flag of Sweden.svg Suecia - Flag of Spain.svg España Flag of Belgium.svg Bélxica - Flag of Denmark.svg Dinamarca
2011 Flag of Germany.svg Alemaña Flag of Denmark.svg Dinamarca - Flag of the United States.svg Estaos Xuníos d'América Flag of Switzerland.svg Suiza - Flag of Sweden.svg Suecia
2012 Flag of Germany.svg Alemaña Flag of Belgium.svg Bélxica - Flag of Sweden.svg Suecia Flag of Ukraine.svg Ucraína
Copa de les Naciones Furusiyya de la FEI (2013-anguaño)
Añu Campeón
2013 Flag of France.svg Francia
2014 Flag of the Netherlands.svg Países Baxos
2015 Flag of Belgium.svg Bélxica
2016 Flag of Germany.svg Alemaña

Enllaz esternu[editar | editar la fonte]