Conceyu Nacionalista Astur

De Wikipedia
Saltar a: navegación, buscar
Bandera del CNA

Conceyu Nacionalista Astur (CNA) foi'l primer partíu políticu nacionalista asturianu, con actividá ente 1976 y 1981.

Entamos[editar | editar la fonte]

El CNA foi un partíu creáu por un grupu de mozos marxistes, independientes y llibertarios que veníen de Conceyu Bable. Definiose como un "conceyu políticu de militancia única", nel que s'almitíen les tendencies marxistes, leninistes, trotskistes, llibertaries, etc. Según los sos estatutos; l'ámbetu d'actuación direuta y d'afitamientu que se propón CNA vien determináu pol área nacional y xeográfica d'Asturies. Esti partíu caltuvo rellaciones con otros grupos asemeyaos del estáu y estranxeros.

Ideoloxía[editar | editar la fonte]

Ente los sos plantegamientos políticos allugábense los que vienen darréu:

  • Autonomía plena a curtiu plazu.
  • Autodetermín.
  • Revolución socialista n'Asturies na perspeutiva d'un estáu socialista protagonizáu pola clas obrera y otres clases populares, p'algamar la construcción d'una sociedá ensin clases, previu desaniciu del aparatu de poder de la burguesía.

Too ello nel marcu d'una confederación de pueblos cola idea d'algamar un autogobiernu que ficiera posible la participación de les mases partidaries d'una sociedá socialista y autoxestionaria.

Según los promotores del CNA -que queríen frañir cola tradición política asturiana y da-y una alternativa nacional asturiana al procesu de reconstrucción estatal na transición, reclamando p'Asturies un tratamientu nacional asemeyáu al que se-y taba dando a Cataluña o al País Vascu- el pueblu asturianu pertien toles condiciones oxetives qu'encadarmen una nación, ello ye; una comundiá identificada con un territoriu definíu; una hestoria y una llingua llariegues; una situación económica definida pola empresa pública (daquella y anguaño, al serviciu del capital mnopolista); una idiosincrasia que define a los asturianos como talos; una cultura llariega con aportaciones úniques a la cultura universal, como l'arte asturianu.

Pal bon furrulamientu conxuntu d'estes realidaes, según la CNA, requeríase:

Simboloxía[editar | editar la fonte]

La bandera y escudu del CNA ye la Cruz de la Victoria n'oru sobre fondu azul. El so himnu: "Asturies, patria querida". Adoutar esti popular cantar como himnu oficial del partíu supunxo un retrasu na llegalización del partíu nel Rexistru per parte de los funcionarios, que lo emplegaron como pretestu, yá que los estatutos foron presentaos en mayu de 1978 y el partíu nun foi llegalizáu fasta'l 19 de xineru de 1979.

Cquote1.svg "Aquí temíamos que se tratara de un cahondeo" Cquote2.svg

- manifestaba'l Subdireutor Xeneral d'Asociaciones Polítiques nunes declaraciones a "Asturias", el 18 de xineru de 1979.

Fundadores[editar | editar la fonte]

Ente los fundadores taben Xosé Lluis Carmona y Dubardu Puente, Xesús Cañedo Valle, José Antonio Fernández Alonso "Pepe", Fernando Cueto y miembros del Conceyu Bable. El so secretariu xeneral foi Anxelu Zapico.

Publicaciones[editar | editar la fonte]

El CNA llegó a editar una publicación propia, la revista Asturies Dixebrá.

Eleiciones[editar | editar la fonte]

A lo llargo de la so esistencia nun algamó representación.

1977

Nes Eleiciones xenerales españoles de 1977 nun presentó candidatura propia, sofitando la candidatura d'Unidá Rexonalista, encabezada por Aida Fuentes Concheso, Antonio Masip Hidalgo y Manuel Hevia Carriles.

Añu votos  % votos

1977

10.821

1,88%

1979

Dos años depués, nes xenerales de 1979 presentó candidatura propia a dambes cámares.

Al Congresu de los Diputaos presentó una llista encabeza por Dubardu Puente Fernández. Algamando la escasa cifra de 3.049 votos (un 0'57% del total), allugándolu nel 9u puestu de les 17 llistes ensin representación nel congresu.

Añu votos  % votos

1979

3.049

0'57%

Pal Senáu presentó una llista encabezada por: Ánxelu Gonźalez Zapico. Llogrando un mayor apoyu, 8.309 votos (el 1'52% del total) y allugándose nel 17u llugar, ensin representación parllamentaria.

Añu votos  % votos

1979

8.309

1'52%


Dubardu Puente -candidatu con namás que 29 años-, ficiera unes declaraciones a "El Comercio" de Xixón el 10 de febreru de 1979, nes que dixo;

Cquote1.svg "CNA más qu'un partíu convencional ye un frente ampliu onde tienen cabida toles tendencies d'esquierda. Nun somos dogmáticos, nin tenemos tampoco una ideoloxía rixa, sinón que, énte too, como bonos asturianos, somos pragmáticos" [...] "Les persones que formamos parte del CNA víamos fasta va poco con simpatía dellos partíos que se declaraben rexonalistes. Por embargu, les pallabres llevoles el vientu y na práutica, a la hora la verdá, les sos teoríes quedaron en meres promeses que nun tienen res que ver cola auténtica defensa de los porgüeyos asturianos. D'ehí qu'énte l'escaezu amosáu por toles fuercies polítiques de les sos declaraciones rexonalistes, tienmos llevao a xuntanos tolos que teníemos esti enfotu pa fundar una organización política asturiana y asturianista" [...]. Cquote2.svg

Ún de los cartelos de propaganda elleutoral del CNA dicía:

Cquote1.svg "VOTAR CNA YE SOFITAR: la nacionalidá asturiana. El socialismu autoxestionariu. La llucha escontra'l colonialismu, qu'afuega Asturies. La nuestra llingua y cultura, artes, vezos. Un estatutu d'autonomía que dexe abiertu'l camín a l'autodeterminación. Una alternativa revolucionaria a la clas obrera asturiana. La defensa del nuestru frayau y escaecíu patrimoniu artísticu. La llucha ecolóxica. Ñatura escontra contaminación. Non al ICONA (Institutu pa la conservación de la naturaleza). Non a les centrales ñucleares. La llucha polos drechos la muyer. Libre usu del cuerpu, divorciu, albuertu, planificación familiar; mesmu salariu y drechos llaborales que'l (sic) home. La llucha pola lliberación y drechos de los homosexuales, escontra les lleis represives y en defensa d'ista (sic) natural expresión afeutiva. La llucha polos drechos de los pensionistes. Xubilaciones suficientes. Asistencia xeriátrica continua y gratuita. La llucha polos drechos de los minusválidos. Estructures y servicios ciodadanos (sic) afayaízos. Melecina y terapia recuperativa a niveles físicos y síquicos. Drechu a la integración y al trabayu" [..] Cquote2.svg

Disolución[editar | editar la fonte]

Ha de rescamplar que, nesti procesu, dellos militantes del partíu fueron deteníos baxo acusación de collaborar con ETA politico-militar nel asaltu al Bancu Herrero d'Uviéu y dellos cumplieron años de prisión por ello.

Disolvióse en 1981. De les sos cenices surdieron otros partíos nacionalistes, como l'Ensame Nacionalista Astur (ENA), que tres la so fusión cola Xunta Nacionalista Asturiana (XNA) dio llugar a la Unidá Nacionalista Asturiana (UNA), que se presentó a les eleiciones europees de 1989 baxo la mano de José Suárez Arias-Cachero, "Felechosa". Exercieron la secretaría Xeneral de la UNA Faustino Fernández Pereira, primero, y Xosé Lluis Carmona, dempués.


Predecesor:
nun tien
Partíu políticu
CNA 1976-1981
Socesor:
Ensame Nacionalista Astur
(ENA)
Xunta Nacionalista Asturiana
(XNA)

Enllaces esternos[editar | editar la fonte]