Conceyu Abiertu pola Oficialidá

De Wikipedia
Saltar a navegación Saltar a la gueta
Cabecera d'una manifestación pola oficialidá de la llingua asturiana.
El xugador de fútbol David Villa participando na campaña del CAO.

El Conceyu Abiertu pola Oficialidá (CAO) foi una plataforma política apartidista d'asociaciones, sindicatos, partíos políticos y persones que tuvo como oxetivu la oficialidá de la llingua asturiana dende xunu del 2004.

Esta plataforma xurdió pa trabayar na xera de la presencia del reconocimientu d'oficialidá pa les llingües d'Asturies na reforma del Estatutu d'Autonomía. La Xunta Pola Defensa de la Llingua Asturiana foi la organización encargada de xestionar la creación d'esta plataforma, na que figuraben adscrites más de doscientes organizaciones polítiques, como les Mocedaes Socialistes, Izquierda Xunida d'Asturies, Bloque por Asturies, Partíu Asturianista o Unidá Nacionalista Asturiana; sindicales como Comisiones Obreres, UXT, CSI, USO, SUATEA; y asociaciones culturales, profesionales, cíviques, deportives...

Según declaraben, el CAO dexaría d'esistir el día que l'asturianu algamare la oficialidá. Mientres, desendolcaron trabayos pedagóxicos y de concienciación social pa que la oficialidá se conviertiere en «inescusable » y fuere afitada dende un ampliu consensu social.

El 3 de xunu del 2008 asoleyábase la campaña Doi la cara pola oficialidá. Esta campaña mandóse de la Rede pa visualizar l'apoyu de la sociedá civil asturiana a les reivindicaciones del Conceyu Abiertu pola Oficialidá al traviés de semeyes individuales y coleutives con un pequeñu cartel nel que se lleía "Yo doi la cara pola oficialidá". Esta iniciativa algamó les 10.000 en poco más d'un añu. Delles de les persones con relevancia social que participaren cola so semeya fueron futbolistes internacionales como David Villa, Santi Cazorla, Enrique Castro "Quini", Secundino Suárez "Cundi"; l'árbitru internacional Mejuto González; ciclistes como Chechu Rubiera, Benjamín Noval, Santi Pérez o Carlos Barredo, amás del medaya d'oru nos Xuegos Olímpicos de Beijín Samuel Sánchez; los pilotos Javier Villa y Alberto Hevia; el tenista Galo Blanco; los piragüistes Manuel Busto, Fran Llera o Javier Hernanz Agüeria; escritores de la talla de la finada Corín Tellado, Carmen Gómez Ojea o Xuan Bello; presentadores de televisión como Sonia Fidalgo, Ana Vanessa Gutiérrez o Pablo Vaquero; músicos como Víctor Manuel, Jose Ángel Hevia, Alicia Álvarez...

Conceyu Abiertu pola Oficialidá tuvo como primer voceru al etnógrafu Fernando Ornosa hasta finales del 2008, socediéndo-y na vocería Carlos Pulgar, miembru de la Xunta pola Defensa de la Llingua Asturiana.

Enllaces esternos[editar | editar la fonte]