Claudia Andujar

Claudia Andujar
Vida
Nacimientu	Neuchâtel (es) , 12 de xunu de 1931 (92 años)
Nacionalidá	Suiza Brasil
Estudios
Estudios	Hunter College (es) 1953) : ciencies humanes
Llingües falaes	portugués
Oficiu	fotoperiodista, fotógrafa, activista
Llugares de trabayu	Nueva York
Premios	ver Beca Guggenheim Premio Lannan  (2000) Orde del Méritu Cultural  (2008) Medaya Goethe  (2018)

Claudia Andujar (12 de xunu de 1931, Neuchâtel ^(es) ) ye una fotógrafa brasilana nacida en Neuchâtel, Suiza. Ye conocida pol so trabayu fotoperiodístico na comunidá Yanomami na Amazonia brasilana.

Biografía

De padre húngaru d'orixe xudíu y madre suiza protestante, Andujar vivió la so infancia na patria del so padre. Mientres la Segunda Guerra Mundial tuvo qu'emigrar xunto cola so madre a Suiza, el so país d'orixe, a pesar de que'l so padre, por cuenta de la so condición de xudíu, foi lleváu al campu de concentración de Dachau onde muerre xunto cola mayor parte de la so familia y amigos. Vive unos años en Nueva York onde realiza los sos primeros contactos cola pintura y la fotografía y finalmente treslládase, a fines de la década del 1950, a São Paulo onde adopta la nacionalidá brasilana.

Trabayu

Trabayó como reportera gráfica de 1960 a 1971 y formó parte del equipu de fotógrafos de la revista Realidade onde realizó un ampliu reportaxe alrodiu de l'Amazonia. La so carrera como fotoperiodista empezó con un proyeutu sobre la comunidá indíxena Karajá (na cuenca del ríu Araguaia), con quien vivió dos meses.

Na primer metá de los años setenta recibió dos beques de la Fundación Guggenheim y, darréu, otra de la Fundação de Auxílio à Pesquisa do Estado de São Paulo (Fapesp) pa estudiar a la tribu de los Yanomami, na cuenca del ríu Catrimani (estáu de Roraima, Brasil).

A finales d'esta mesma década empezó a dedicase puramente a la llucha pola preservación del pueblu Yanomami y foi una de los fundadores del Comité pa la Creación del Parque Yanomami. Ente 1978 y 1992 participó na Comisión pa la creación del Parque Yanomami y coordina la campaña pola demarcación de les tierres indíxenes. Ente 1993 y 1998 trabayó nel Programa Institucional de la Comissão Pró-Yanomami.

Marcaos

Ente 1981 y 1984, Andujar pasó llargues temporaes nel territoriu indíxena. Xunto con dos médicos, realizó numberoses fotografíes del mediu y de les espediciones, rexistrando ún por ún a cada individuu con un númberu colgáu del pescuezu. Eses imáxenes yeren utilizaes nes cartiyes de vacunación sanitaria, que contribuyeron a salvar la vida de munchos de los miembros de la tribu afeutaos por malaria y gripe, productu del contautu col home occidental.

Esti trabayu surde entós por dos motivos: per un sitiu, a nivel antropolóxicu, del intentu d'ayudar a la sobrevivencia del pueblu Yanomami a partir de la vacunación de los habitantes de les diverses poblaciones y, per otru llau, a nivel conceptual, en contraposición cola mesma biografía de l'artista, que los sos familiares y amigos fueron marcaos y asesinaos nos campos de concentración nazi.

Llibros

• 1970: A Week in Bicu's World: Brazil.
• 1982: Missa da Terra sem Males.
• 2005: A Vulnerabilidade Do Ser.
• 2007: Yanomami, la danse des images.
• 2016: Marcaos; Co-edición MALBA - Llibros UNA (Libro Universidad Nacional de les Artes), Buenos Aires, Arxentina.

Referencies

• Datos: Q18244184
• Multimedia: Claudia Andujar