Ciudá-condáu consolidada

De Wikipedia
Ayuntamientu de Filadelfia, la más poblada de les ciudaes-condáu consolidaes del país.

Una ciudá-condáu consolidada (consolidated city-county) ye una entidá alministrativa de gobiernu llocal n'Estaos Xuníos, formada pola xunificación d'una ciudá y un condáu nuna xurisdicción única. Asina, ye al tiempu una ciudá, que ye una corporación municipal, y un condáu, que ye una sodivisión alministrativa d'un estáu, y como talo tien el poder y les responsabilidaes de dambos tipos d'entidaes xurídiques.

Una ciudá-condáu consolidada ye una entidá diferente de una ciudá independiente (independent city), magar que la cabera pueda ser el resultáu tamién de la consolidación d'una ciudá y un condáu y tener les mesmes competencies qu'ella. Una ciudá independiente ye una ciudá non obligada pol estáu a caltener les sos llendes dientro de les de ningún condáu, y que ye reconocida como una entidá llegal de calter territorial estremada de los condaos contiguos a ella. Nuna ciudá-condáu consolidada esisten nominalmente, magar que tean el so gobiernu consolidáu, la ciudá ya'l condáu, mentantu que nuna ciudá independiente el condáu nun esiste nin siquiera nominalmente.

La mayor cantidá de ciudaes-condáu consolidaes alcuéntrense nel Mediu Oeste y el norte del Sur del país. Rescamplen, ente más otres, Indianapolis (Indiana), Nashville (Tennessee), Louisville (Kentucky), Kansas City (Kansas) y Lexington (Kentucky). La más grande en población ye Filadelfia, y la mayor n'estensión Sitka (Alaska).

En Louisiana, aú el territoriu estatal divídese en parroquies (parish), los gobiernos consolidaos nómense ciudá-parroquia. New Orleans City Parish, la entidá alministrativa que compriende la ciudá de Nueva Orleans, ye un exemplu d´ello.

Referencies[editar | editar la fonte]

Enllaces esternos[editar | editar la fonte]