Cipriano Folgueras Doiztúa

Cipriano Folgueras Doiztúa
Vida
Nacimientu	Uviéu, 10 de setiembre de 1863
Nacionalidá	España
Muerte	Madrid, 17 de xineru de 1911 (47 años)
Estudios
Llingües falaes	castellanu
Oficiu	escultor
Trabayos destacaos	Estatua de Fernando Valdés Salas (es)

Cipriano Folgueras Doiztúa (10 de setiembre de 1863, Uviéu – 17 de xineru de 1911, Madrid) foi un escultor asturianu.

Biografía

Foi alumnu de la Escuela de San Salvador d'Uviéu. En 1878, con quince años d'edá, treslládase a Madrid pa estudiar Belles Artes. Finaliza los sos estudios en 1884 y marcha a Roma pa completar la so formación, y depués vivió en París.

Cuando tien 21 años acude a la Esposición Nacional col so grupu Orestes persíguíu poles Furies y algamó una tercera medaya. En 1890 vuelve a la Esposición Nacional y gana una Segunda Medaya con Los primeros pendientes, escultura que destacó ente les del sector de grupos. En 1893 obtuvo una Medaya más na Esposición Universal de Chicago. Volvió a la Nacional de 1895. Naquella ocasión, el pintor Robles, que xuzga la Exposición con notoria severidá, salva a Folgueras y vaticina que "va camín de ser non solo una gloria pa Asturies, sinón una gloria pa España". Llegada la hora de los premios, Folgueras algama una Medaya de primer clase y llega asina a ser consideráu como "el más destacáu de los escultores asturianos del so tiempu". Na segunda Esposición Universal de París ye reconocíu con otra medaya. A la so temprana muerte, yera Folgueras profesor de la Escuela de San Fernando.

Ente les obres más conocíes de Cipriano tan la estatua de Fernando Valdés Salas asitiada nel edificiu históricu de la Universidá d'Uviéu, panteones de la familia Masaveu, Longoria, de los marqueses de San Xuan de Nieva, nel cementeriu d'Avilés, les estatues alegóriques de la Traxedia y Comedia nel Teatru Campoamor, la estatua y alegoríes del monumentu a Fernando Villamil, en Castropol, el dedicáu en Santander a les víctimes del vapor "Cabo Machichaco", el grupu la "Patria" pal erixíu a Alfonsu XII nel Retiro de Madrid, la estatua Celta o astur, el grupu Xesús discutiendo colos doctores, el medallón d'homenaxe a Teodoro Cuesta, el bustu de la Marquesa de la Vega d'Anzu, la estatua de Manuel Pedregal, en Grau, etc.

Enllaces esternos

• Wikimedia Commons acueye conteníu multimedia sobre Cipriano Folgueras Doiztúa .

• Datos: Q5769840
• Multimedia: Cipriano Folgueras Doiztúa