Cerámica de Faro

De Wikipedia
Saltar a navegación Saltar a la gueta

La cerámica de Faro ye un tipu de cerámica que se fabrica nel pueblu de Faro, na parroquia uvieina de Llimanes, asitiada a 4 km de la capital asturiana. Alcuéntrase a 300-500 metros d'altitú, sobre'l monte La Grandota, una posible fortificación medieval.

Historia[editar | editar la fonte]

El terrén sobre'l que s'asienta'l pueblu de Faro ta constituyíu por arcielles del Cretácicu y el Terciariu, muy valioses pa esta industria artesanal.

Ta confirmada arqueolóxicamente la producción alfarera nesti pueblu data d'enantes del sieglu XI, gracies a la escavación realizada por Suárez Saro a finales de los ochenta. Alcontráronse cerca de 9.000 fragmentos na zona d'El Cantu'l Rei, y en cada desmonte del terrén, bien pa l'ampliación de la carretera, bien pa la construcción de dalgún edificiu, salen a la lluz numberosos fragmentos de cerámica, tanto medieval como moderna, y inclusive fornos.

Na diplomática medieval asturiana menciónase bien de veces a Faro. Nel sieglu XII lleemos estes pallabres:

iuxta Ovetum, in villa pernominta Faro.

La primer referencia a la industria alfarera de Faro data d'entamos del sieglu XVI (1519). Nunos archivos con papeles de cuentes conservaos nel Archivu Capitular d'Uviéu apaez:

Iten mas, se cargan que debe Juan de Estebano de Faro un cuartaron de teja, que son doscientas e çincuenta tejas sobre las cuales esta dexcomulgado.

El catastru del Marqués de la Ensenada da noticia de 72 alfareros, lo qu'evidencia la importancia de Faro nesta industria y la so productividá. También ye interesante qu'en Faro se fabrique cacía vidriao, con esmalte blanco estannífero dende finales del sieglu XIII, dalgo poco frecuente nel norte peninsular.

Nel sieglu XVIII escomienza un fenómenu importante pa la industria alfarera: la difusión de la cerámica de Faro. Los alfareros empiecen a treslladase al oriente d'Asturies a la busca de nuevos mercaos, fundándose alfareríes en La Pola Siero, Cecea, Piloña, Cangues d'Onís, Oviu (Llanes) o La Franca (Ribeseya). En Cangues d'Onís ye onde l'asentamientu tuvo más fuercia. Otres llocalidaes onde s'asentaron alfareros procedentes de Faro son Villaviciosa y Tapia.

Nos caberos años del sieglu XIX y principios del XX, les nueves industries provocaron una crisis que la llevaron al borde de la estinción.

El tipu de rueda que s'utilizaba en Faro hasta'l sieglu XX yera la baxa o de mano, hasta que José Vega (Lito) introduz el tornu de pie. Con esti avance llogra un aumentu de producción.

Ellaboración[editar | editar la fonte]

El fornu usáu ye'l fornu de descubiertu. Consta de dos partes: la cámara de cocción, onde s'apilen les pieces, y una caldera na que s'introduz el combustible, nesti casu rozu.

Una vuelta enllenu'l fornu con pieces de cerámica, tapezse la parte superior con tapinos. Colócase la tierra haza l'interior y s'aprovechen los trozos de teyes rotes pa formar lo que va sedrá la chimenea.

Un datu sobre la importancia de Faro ye la esistencia de mercaos nos que se distribuyía combustible p'abastecer a tolos alfareros, nos que se vendíen dellos provenientes de los montes del Naranco.

Una carauterística de los fornos de Faro ye que son siempre oxidantes, y algamen temperatures de 1.100 graos nel casu de la cerámica negro.

En Faro se producen dos tipos de cerámica. Una de barru collor parda escura, delles cuasi negra, con fustaxe metálico. Esta collor s'obtién con una mestura de trés barros y l'alta temperatura del fornu. Les pieces que se producen son pal usu domésticu, ye dicir, contenedores de llíquidos y alimentos: el barbón, la penada, la zapica de sidra, la quesera... Otres pieces realícense pa cocinar alimentos, por exemplu, la cazuela, con estremaos tamaños y una o dos ases.

L'otru tipu de cerámica ye la esmaltada en blanco y con decoraciones en verde, mariellu, marrón y azul. Los motivos decorativos que se realicen son xeométricos y naturalistes (vexetales y animales, destacando la páxara, que es la representación d'un ave comiéndose a un pexe). Les formes que se trabayen son platos, escudielles, botiyos, xarru, el gallu y la pita, botíes o baceníes.

Continuidá[editar | editar la fonte]

Anguaño esta tradición se conserva gracies al enfotu de José Vega Gutiérrez (Selito) fíu de Lito, y los so sobrinos Nacho y Vanesa Artime Vega. Dende Faro, y pa caltener esta tradición, tán trabayando llinies de productos empobinaos a la construcción (cenefes, revestimientos interiores y esteriores), amás de programes de formación pa dar a conocer les téuniques d'alfarería tradicionales.

N'avientu de 2011 presentóse al Plenu del Conceyu d'Uviéu un proyeutu d'escuela-taller llamáu Uviéu. Tradición y innovación aprováu col votu favorable de tolos grupos. Tamién la Xunta Xeneral, aprobó una proposición non de llei en favor del proyeutu.

Esta escuela-taller diba un periodu de formación de trés años, con xornaes d'ocho hores diaries. El so oxetivu yera promocionar el patrimoniu cultural y históricu del conceyu calteniendo oficios como'l de puchereru, vinculáu a la cultura ceramista de la población de Faro. Por embargu, n'abril de 2012 la Conceyalía d'Emplegu del Conceyu d'Uviéu renunció a esti proyeutu porque según el so paecer el taller «nun cumple los requisitos necesarios en materia de prevención de riesgos llaborales.»[1]

Ver tamién[editar | editar la fonte]

Referencies[editar | editar la fonte]