Celestino Rozada

De Wikipedia
Saltar a navegación Saltar a la gueta
Celestino Rozada
Vida
Nacimientu

Porrúa18  de mayu de 1972

(46 años)
Nacionalidá Bandera d'España España
Estudios
Llingües castellanu
Oficiu
Oficiu cantante
Instrumentu musical voz
Cambiar los datos en Wikidata

Celestino Rozada Tamés (18  de mayu de 1972Porrúa) ye un cantante asturianu de tonada.

Ye un cantador de formación autodidacta, entamando bien ceo a tomar parte en concursos y quedando en 1998 finalista na categoría de mocedá nos d'Uviéu, L'Entregu, La Nueva o Amieva.

Celestino abriría un paréntesis na so actividá como cantante de tonada, al dir a trabayar a Alemaña. Al tornar, nuevamente entamaría a participar en concursos, siendo animáu a ello pol gran estudiosu de la tonada, Javier el d'Arroes.

Nel añu 2006 algamó'l trunfu nel concursu d'Amieva y l'añu siguiente fadríase col primer puestu na XXVIII edición del concursu del diariu El Comercio y nel "Ciudad de Oviedo". Algamaría'l primer premiu na edición de 2009 del Concursu "Ciudad de Oviedo" y otra vuelta'l d'Amieva. Nel añu 2010 alzóse col primer premiu na XIII edición del Concursu de Canción Asturiana Cuenca del Caudal y nuevamente col "Ciudad de Oviedo" y el del diariu "El Comercio". Celestino volvería a ganar, nel añu 2011, el Concursu y Muestra de Folklore "Ciudad de Oviedo", y el de Xixón afitándose como una de les meyores voces del momentu. Repetiría en 2012 algamando'l primer premiu nel "Ciudad de Oviedo"[1].


En 2007 grabó'l so primer discu, Cantares dende la mayada editáu por Muséu Etnográficu del Oriente. Nuevamente nel 2009 grabaría otru discu Al pie del Cuera. Esti discu foi asoleyáu pola Fonográfica del Principado nel añu 2009, y acompaña a Celestino'l gaiteru Vicente Prado, El Pravianu.

Componen la grabación catorce cantares, ente los que destaquen, De lo más alto del Cuera, Voi vender toles vaques, En toda Peñamellera, Se oyen cantar los mineros, Adiós al valle de Viango, En Asturies, asturianu,... Delles d'estes pieces son interpretaes por Celestino como voz solista y n'otres ye acompañáu a la gaita, como se diz más arriba, por Vicente Prado.

El so cuartu discu, Aquellos güeyos, tien once composiciones, cinco de nueva creación y otres seis tradicionales, ente les que destaca «Volver a Porrúa». La Compañía Fonográfica Asturiana fizo la grabación, que cuenta con igües y acompañamientu musical de Fernando Malva y lletres y música de Nacho Fonseca y Ismael Tomás. Arriendes d'ello, tamién participa'l gaiteru Vicente Prado, El Pravianu[2].

Nel añu 2008 foi elexíu, por primera vez, nel Memorial Silvino Argüelles, como una de les diez voces más importantes nel mundu de la tonada.

En 2010 recibió'l Premiu de la Crítica RPA a la Meyor Voz del Añu, el mesmu premiu que nel 2009 yá recibiera pol so discu Al pie del Cuera nel apartáu de Meyor Discu de Canción Asturiana.

Discografía[editar | editar la fonte]

  • Cantares dende la mayada (2007) - Muséu Etnográficu del Oriente.
  • Al pie del Cuera (2009) - Fonográfica Asturiana.
  • Los xatiquinos (2010)
  • Aquellos güeyos (2011) - Fonográfica Asturiana.

Referencies[editar | editar la fonte]

  1. "Los ganadores en el 20º aniversario", La Nueva España, 29.05.2012
  2. [1] La Nueva España, 6 de xunetu de 2011. Consultao'l 15 d'ochobre de 2011