Catálogu Messier

De Wikipedia
Catálogu Messier
catálogu astronómicu
Datos
Autor Charles Messier
Fecha 1774
Xéneru Astronomía
Títulu orixinal Catalogue des Nébuleuses et des ames d'Étoiles, que l'on découvre parmi les Étoiles fixes sur l'horizon de Paris
País orixinal Bandera de Francia Francia
Asturianu
Títulu traducción Catálogu de Nebuloses y Cúmulos d'Estrelles, que se reparen ente les estrelles fixes sobro l'horizonte de París
Cambiar los datos en Wikidata

El Catálogu Messier ye una llista de 110 oxetos astronómicos iguada pol astrónomu francés Charles Messier y espublizada orixinalmente (103 entraes) ente 1774 y 1781. El so títulu formal ye Catálogu de Nebuloses y Cúmulos d'Estrelles, que se reparen ente les estrelles fixes sobro l'horizonte de París (en francés, Catalogue deas Nébuleuses et deas ames d'Étoiles, que l'on découvre parmi les Étoiles fixes sur l'horizon de Paris).

Messier dedicábase a la busca de cometes, y la presencia d'oxetos difusos fixos nel cielu resultába-y un problema, pos podíen tracamundiase con aquellos nos telescopios del so tiempu. Por esti motivu decidió él mesmu armar una llista que-y simplificara'l trabayu, y cuntaría cola ayuda de Pierre Méchain na so parte final.

El so catálogu resultó una recollecha d'oxetos astronómicos de natura bien distinta, como nebuloses, cúmulos d'estrelles abiertos y globulares, y galaxes. Por casu, M1 (la nebulosa del Cámbaru) ye un remanente de supernova, M45 (Les Pléyades) ye un cúmulu abiertu, y M31 ye la gran galaxa d'Andrómeda. Yá que Messier vivía en Francia, la llista contién oxetos visibles sobremanera dende l'hemisferiu norte.

La primer edición del catálogu (1774) incluyía namái 45 oxetos (M1 a M45); un primer suplementu (1780) amestaba les entraes M46 a M70, y la llista final de Messier (1781) incluyía hasta M103. Más d'un sieglu dempués, otros astrónomos, usando notes nos testos de Messier, estendieron la llista hasta 110, que ye'l númberu final (M1 a M110). Munchos d'estos oxetos siguen conociéndose pol so númberu nel catálogu Messier, otros son más conocíos pol so númberu nel catálogu NGC (New General Catalogue).[1][2]

Maratón Messier[editar | editar la fonte]

M42, la nebulosa de Orión, unu de los oxetos Messier de meyor visibilidá. Fotografía llograda con un telescopiu newtoniano de 250 mm d'apertura y 1200 mm de distancia focal.
M42, la nebulosa de Orión, tal como apaez nel catálogu de Messier.

Dende mediaos de la década de 1980 dellos aficionaos a l'astronomía faen «maratones Messier», consistentes en reparar nuna sola nueche'l mayor númberu posible de los 110 oxetos del catálogu. El maratón celébrase na segunda metá del mes de marzu, cerca del equinocciu de primavera —del 20 al 21 de marzu— y coincidiendo cola lluna nueva, con cuenta de les condiciones de visibilidá faciliten la busca de los 110 oxetos.[3]

Ver tamién[editar | editar la fonte]

Referencies[editar | editar la fonte]

  1. «SEDS Messier Database». THE MESSIER CATALOG. Archiváu dende l'orixinal, el 14 de payares de 2007. Consultáu'l 10 de payares de 2007.
  2. «Original Messier Catalog of 1781». Original Messier Catalog of 1781. Archiváu dende l'orixinal, el 29 de junio de 2012. Consultáu'l 10 de payares de 2007.
  3. «The Messier Marathon». THE MESSIER MARATHON. Archiváu dende l'orixinal, el 18 de febrero de 1999. Consultáu'l 10 de payares de 2007.

Enllaces esternos[editar | editar la fonte]