Casa Natal d'Armando Palacio Valdés

Casa Natal d'Armando Palacio Valdés
Llocalización

La Casa-muséu y Centru d'Interpretación Armando Palacio Valdés, enantes Casa ñatal d'Armando Palacio Valdés, ye un muséu asitiáu nel conceyu de Llaviana, fundáu'l 23 d'abril de 2003. El centru ta asitiáu nuna casona rural datada nel sieglu xviii n'Entrialgo, onde ñació y creció l'escritor. La casa ta compesta por dos plantes, na planta baxa atópase la receición y les sales dedicaes a la investigación y analís amás de la realización de dellos talleres. Na planta superior allúgase'l muséu, dixebráu en 5 seiciones caúna coles sos respeutives temátiques como esposición permanente .

Hestoria

Armando Palacio Valdés ñaz en Llaviana'l 4 d'ochobre de 1853 y tres la so muerte la casa foi pasando por delles xeneraciones de familiares del escritor hasta quedar abandonada, nel añu 1984 el Conceyu de Llaviana entamó los trámites cola heriede de la casona hasta que la casa pasó a ser posesión del Conceyu. La cadarma sometióse a una reforma ensin camudar l'apariencia xeneral tradicional. En 2003 foi inaugurada como casa-muséu y centru d'interpretación d'Armando Palacio Valdés.

Muséu

El muséu amuesa años d'analises de les noveles d'Armando Palacio Valdés centrándose principalmente en "La aldea perdida", la cual ta inspirada na redolada nel que nació y creció l'autor. Tamién amuesa la repentina urbanización de Llaviana cola llegada de la minería.

El muséu dixebrase en 5 sales caúna d'elles con un nome dedicáu a la novela que s'inspira en Llaviana:

L'Home, esta sala centrase nel autor, na so mocedá nel conceyu, la so vida, el so llar y la redolada rural nel que crez y nel qu'inspira les sos noveles.
La obra lliteraria, nesta sala escuchase al propiu autor lleer dellos fragmentos de la so obra cola so propia voz amás d'afondar más nel so estilu y nes sos obres lliteraries.
Nolo y Demetria, col nome de los protagonistes de "La aldea perdida" esta sala presenta'l contestu de la vida rural y dexa escuchar soníos de la naturaleza mientres caminase por ella. Amuesa la vida rural cotidiana de los llabradores y l'autor describe'l paisax, la xente y les actividaes enantes de la llegada de la minería .
Plutón y Joyana, esta sala col nome de dos personaxes más de la novela amuesa'l cambéu que'l conceyu de Llaviana sufrió cola apaición de la minería , permite escuchar los soníos de la naturaleza y empiecen a escuchase l'ambiente de los trabayadores mineros, óyense picos, pales y derrumbes.
El territoriu, esta última sala ye la mestura de los dos estilos de vida, l'amiestu ente la ganadería y l'agricultura col so calter rural col calter urbanu de la minería .

La aldea perdida

La aldea perdida (La aldega perdía) ye la obra en redol a la que xira principalmente el muséu. Esta novela esta ambientada en Llaviana mientres el sieglu xix, tierra entós daquella de ganadería y agricultura, l'argumentu narra la hestoria de los mozos qu'esfrutaben de la vida campu, de los festexos y amores que surdíen como los de los protagonistes de la novela, Nolo y Demetria. Esta tranquilidá termina cola llegada de la minería a les tierres de Llaviana. Entama ser una redolada violenta cola xente d'otros pueblos. Cola industrialización les engarradielles dexen de ser con palos y piedres, los mineros traen consigo les navayes y les pistoles lo que lleva a qu'asocedan munches desgracies.

Ye una obra d'estilu realista que'l so tema ye los inconvenientes de la industrialización.

Referencies

Enllaces esternos

Ficha en turismoasturias.es