Carmen de Mairena

Carmen de Mairena
Vida
Nacimientu	Barcelona, 15 de marzu de 1933
Nacionalidá	España
Residencia	El Raval (es)
Muerte	Barcelona, 22 de marzu de 2020 (87 años)
Causa de la muerte	causes naturales
Estudios
Llingües falaes	catalán castellanu
Oficiu	actriz pornográfica, actriz, cupletista, tresformista
Xéneru artísticu	cuplé (es) Jazz
Creencies
Partíu políticu	Coordinadora Reusenca Independent (es)
IMDb	nm1596825

Miguel Brau Gou (15 de marzu de 1933, Barcelona – 22 de marzu de 2020, Barcelona), más conocida como Carmen de Mairena, foi una famosa transexual española. Dende mediaos de los años cincuenta hasta la llegada de la Transición (momentu nel qu'entama a vistise de muyer), yera conocíu como Miguel de Mairena, una cantante de cuplé de cierta sonadía nes sales d'espeutáculos más destacaes de Barcelona. A partir de los años noventa, gana popularidá nacionalmente poles sos apaiciones televisives de calter risible xunto a Javier Cárdenas, que-y venceyaron al mundín autodenomináu friki. Fixo incursiones puntuales nel mundiu del cine, incluyendo'l pornográficu, y la política.

Biografía

Fíu d'un aragonés y una catalana,​ ñaz col nome de Miguel Brau Gou en 1933 nel barriu de Sarrià de Barcelona. A la edá de doce años, trabaya como neñu de los recaos nuna farmacia del paséu de la Bonanova, onde entretien a les clientes con canciones y bailles. A los 16 años actúa como estra cinematográficu en varies películes de la productora d'Iquino, cobrando 700 pesetes per película. En 1959 debuta como artista de variedaes en varios llocales de Barcelona, siendo'l primeru d'ellos la sala Ambos Mundos. D'ellí pasa a Café Nuevo, onde permanez cuatro temporaes. A partir d'esi momentu entama a actuar n'otros llocales barceloneses, como'l Copacabana (güei Muséu de Cera de Barcelona), la Bodega Apolo,​ Ciros, etc., lo que-y permite obtener cierta sonadía como cantante de cuplé.

Caltuvo una rellación sentimental col cantante Pedrito Rico enantes de qu'esti empecipiara la so xira per América. Debíu a esta rellación, dambos son deteníos en numberoses ocasiones poles fuercies del orden, n'aplicación de la Ley de Vagos y Maleantes vixente demientres la dictadura de Franco. Na década de los años 1960, debío a los malos tratos recibíos en prisión, sufre una dolencia que-y torga trabayar nel mundiu del espectáculu ún añu. Durante esti periodu trabaya como peón xunto al so pá en Gavà. Una vez repuestu, retoma les sos gales nos llocales barceloneses Whishy Twist, Patio Andaluz, Macarena de Flamenco (onde ufiertaba un espectáculu con xitanos y guitarres), Gambrinus, Barcelona de Noche, etc. N'esta época actúa xunto a otros cupletistes de la época (Antonio Amaya, Miguel de los Reyes, Pedrito Rico, Tomás d'Antequera) y conoz a Paquita Rico, Carmen Sevilla, Marujita Díaz y a Mikaela.

Na década de los 70 entama a adoptar la imaxe de muyer. Recibe inyeiciones de silicona llíquida (alministraes de forma clandestina) en cara, pechu y cadriles y ofrez espectáculos como tresformista (col nome de Carmen de Mairena) nos qu'asonsaña a Sara Montiel y a Marujita Díaz.​ Esto nun tien bona aceutación ente'l so públicu, lo que supón un fracasu na so carrera que-y lleva a exercer la prostitución nel barriu chinu de Barcelona, El Raval, onde vive bona parte de la so vida. A principios de los años noventa, acompaña a un amigu a un casting pal programa Força Barça, y consigue ser contratada. Nesi momentu conoz a Javier Cárdenas, con quien entama la so carrera televisiva.​ Siempre de la so mano, adquier fama a nivel nacional en programes como Al ataque de Alfonso Arús (1992-1993) y Crónicas Marcianas de Javier Sardà (1997-2005), o en películes como FBI: Frikis Buscan Incordiar. Arriendes d'estes apaiciones, ye famosa por ser una friki de televisión, anque nun-y presta ser reconocida asina. Tamién protagoniza dos películes pornográfices en 2003 y 2005.

En payares de 2006 y n'ochobre de 2008, ye detenida en varies macrooperaciones n'El Raval contra les redes de proxenetes qu'obligaben a prostituyir muyeres rumanes. Carmen de Mairena foi la única de los arrestaos que foi puesta en llibertá nes dos ocasiones, al nun esistir riesgu de fuga. Foi acusada de favorer la prostitución por alquilar habitaciones de la so casa na cai Sant Ramon. Alquilaba habitaciones pa qu'exercieren ellí la prostitución, cobrando dineru en metálicu per cada serviciu.

Carmen de Mairena siguió apaeciendo de forma ocasional en televisión, n'ochobre de 2009 interpreta'l papel de Francisco Franco nun espaciu del programa El Intermedio d'El Gran Wyoming (La Sexta). Na Nuechevieya d'esi mesmu añu, collabora nel programa especial de la cadena llocal catalana 25tv; mentes qu'en 2010, collabora en diverses ocasiones con Sálvame Deluxe de Telecinco.

El 21 d'ochobre de 2010, ficha pola Coordinadora Reusenca Independent (CORI) y preséntase como segunda candidata pola circunscripción de Barcelona nes eleiciones al Parllamentu de Cataluña. La CORI llogra 6990 votos, y anque nun llogra representación nel Parllamentu de Cataluña, queda nel puestu 14 de los partíos más votaos, superando ente otros a Unión Progreso y Democracia (UpYD).

A principios de 2016, los problemes de movilidá que sufre fáen-y depender d'una siella de ruedes pa movese, lo que llevó a los sos familiares a ingresala nun xeriátricu cercanu a la so casa. Oxetos personales de l'artista, como cuadros y semeyes que caltenía na so casa, apaecen tiraos na cai.​ En 2017, Carlota Juncosa escribe'l llibru/cómic Carmen de Mairena. Una biografía, na que l'autora rellata sobre los sos alcuentros con Mairena, calteníos nun intentu atayáu d'escribir la so biografía.

Morrio'l 22 de marzu de 2020 por causes naturales nun hospital de Barcelona a los 87 años.

Enllaces esternos

• Datos: Q3391766