Canal del Narcea

De Wikipedia
Canal del Narcea
canal de saléu
Llocalización
País España
Autonomía Principáu d'Asturies
Llargor 30 km
Cambiar los datos en Wikidata
Canal del Narcea en Piarnu, Castrillón.

La Canal del Narcea ye una conducción hidráulica d'agües del ríu Narcea inaugurada'l 8 de marzu de 1965[1] Escurre dende la estación de bombéu asitiada en Quinzanas, conceyu de Pravia, hasta los banzaos de Tresona (Corvera), La Granda (Gozón), y San Andrés de los Tacones (Xixón).[2] Nel so percorríu, de 27 quilómetros, traviesa tamién los conceyos de Sotu'l Barcu, Castrillón y Illas.

Nel so día, foi'l complexu hidráulicu téunicamente más avanzáu d'Europa[1] y foi construyíu pa suministrar agua a los fornos altos y aceríes de la estinguida ENSIDESA, güei Arcelor, que na década de 1950 asitiárase n'Avilés y Xixón.

La canal, y la so estación de bombéu, tán diseñaos pa tresportar un caudal máximu d'agua de 4.000 llitros per segundu,[2] gracies a bombes Worthington 24 NA-37 de 2.000 Hp y 980 revoluciones per minutu.[3] 1.000 llitros per segundu pueden ser aprovechaos pal suministru d'agua potable a les poblaciones d'Avilés y Xixón.[1]

Infraestructures[editar | editar la fonte]

Vista xeneral de la estación de bombéu, en Quinzanas, Pravia.

Como s'indicó enantes, la canal tien un llargor de 30 km, de los cualos, 17 escurren por canales; y los 13 restantes, por túneles, sifones y acueductos.[1]

Túneles[editar | editar la fonte]

Construyéronse 15 túneles, de los cualos, el más importante ye'l de Los Gallos, de 1.405 metros.

Acueductos[editar | editar la fonte]

De los 35 construyíos, el más importante ye'l de Castañalona, de 230 metros de llargor y 30 metros d'altor; dotáu d'una estructura estilizada y airosa que s'integró perfectamente na so redolada.

El siguiente acueductu, n'importancia, ye'l de Los Meirones, de 161 metros de llargu y 17 d'altu.

Sifones[editar | editar la fonte]

Foi necesaria la construcción de cinco sifones pa salvar los pequeños valles tresversales esistentes a lo llargo del trazáu. El más importante ye'l de La Llamera, con 488 metros de llargor y 90 d'altor.

Aprovechamientu turísticu[editar | editar la fonte]

Dende finales del sieglu XX, el Gobierno del Principáu d'Asturies, en collaboración colos conceyos afeutaos, ta tratando d'impulsar una ruta senderista y cicloturista a lo llargo del trazáu de la canal, conocida como Ruta de l'agua.[4] Sicasí, solo unos pocos quilómetros atópense afechos y el proyeutu avanza con lentitú.

Referencies[editar | editar la fonte]

  1. 1,0 1,1 1,2 1,3 El llunes va ser inaugurada la conducción d'agües del Narcea a la siderúrxica d'Avilés. Diariu ABC. [1]
  2. 2,0 2,1 Plan hidrolóxicu Norte II. Confederación hidrográfica del norte. «Copia archivada». Archiváu dende l'orixinal, el 14 d'avientu de 2009. Consultáu'l 25 de marzu de 2010.
  3. Worthington presenta: Güei na canal del Narcea; mañana y siempres n'España. Diariu ABC. [2]
  4. El Principáu quier rellanzar la sienda de la Ruta de l'Agua. La Voz de Asturias. [3] (enllaz rotu disponible n'Internet Archive; ver l'historial y la última versión).

Enllaces esternos[editar | editar la fonte]