Campana de Uesca

La lleenda de la campana de Uesca cunta que Ramiru II el Monxu, rei d'Aragón, degolló a trelce nobles que s'opunxeron a la so voluntá. La historia ye parte del mancomún popular n'Aragón, especialmente na ciudá d'Uesca.

La lleenda

Tres la muerte en 1134 d'Alfonsu I d'Aragón ensin fíos, heredó el reinu d'Aragón el so hermanu Ramiru II, obispu de Roda d'Isabana. Aragón sufría daquella diversos problemes internos y esternos.

Según cuenta la Cronica de Sant Chuan d'a Penya (sieglu XIV), tando Ramiru II esmolecíu pola desobediencia de los sos nobles mandó un mensaxeru al so antiguu maestru, l'abá de Saint-Pons-de-Thomières, pidiéndo-y conseyu. Este llevó al mensaxeru al güertu y cortó unas coles (delles vegaes falase de roses), aquelles que sobresalíen más. De siguío ordenó al mensaxeru repetir al rei el xestu que viera. Ramiru II fixo llamar a los principales nobles por que vinieren a Uesca, cola escusa de faer una campana que s'oyera en tol reinu. Una vegada ellí, fixo cortar la cabeza a los nobles más culpables, encalorando la revuelta.

La primer mención d'esta lleenda la recoye la versión en llatín de la Cronica de Sant Chuan d'a Penya, tamién conocida como la crónica pinatense, que foi redautada dos sieglos dempués del reináu de Ramiru II por mandatu del rei Pedru IV d'Aragón. La forma popular desenvuelve daqué más el fechu: el rei convocó Cortes y fixo venir a tolos nobles del reinu por que vieren una campana que s'oyería en tol reinu. A los rebeldes los fixo entrar ún per ún na sala y foi degollándolos según diben entrando. Una vegada muertos, asitió les sos cabeces formando un triángulu y la d'Arnaldo, l'obispu de Chaca, el más rebalbu, la colocó nel centru como mayuelu. Depués dexó entrar a los demás por qu'escarmaren.

Orixe

La lleenda de la campana de Uesca foi considerada mientres munchu tiempu como auténtica. Esiste inclusive nel antiguu palaciu real, actual Muséu Provincial de Uesca, una sala na que s'afirma qu'asocedieron los fechos.

Sicasí, la lleenda de la campana de Uesca foi estudiada por Cheronimo Zurita nos sos Anales de la Corona de Aragón (1562) ya identificó les fontes clásiques de la primer parte (el conseyu del abá de San Ponce) nel historiador griegu Herodotu. Tamién puedese encontrar esta anécdota na Política d'Aristóteles, cuntada de volao y de manera similar a Herodotu.

Nel sieglu I a. C. Titu Liviu atribúi la lleenda a Tarquinu, que corta con un cayáu les adormideres más altes p'aprender a Sestu Tarquinu, rei de los Gabios.

Más difícil ye resolver cuándo producese l'aclimatación e hispanización del mitu nuna lleenda medievel. Filólogu, dialectólogu y caderalgu Manuel Alvar afirma que pudo producise a traviés del heriedu carolinxu y l'épica occitana a la que tan amestáu taba el reinu d'Aragón.

Pudo encarnarse cuando se fixo efectiva la so conexón cola segunda parte de la lleenda, esto ye, la muerte de los nobles yá que ye muncho más probable y que pudo asoceder cuando los bandos nobiliarios aragoneses desobedecían al rei por algamar mayores cotes de poder y de riqueza. Esos nobles desacataron ordes aprovechando el cambéu de monarca, y nuna d'eses disputes Ramiru II tuvo a puntu de perder el tronu yá que na obra Kitab al-Anwar al Yâliyya, del historiador andalusí Abu Bakr al-Ansari, recoyida na obra d'Ibn Idari, na que cunta como los nobles aragoneses rompieron una tregua roblada por Ramiru II col xeneral almorávide, IIshaq ibn Muhammad ibn Ghaniya, señor de València al atacar una caravana. El rei aragonés tuvo qu'abelugase en Besalú en 1135 y a la vuelta solucionó el problema ordenando degollar a dellos de los nobles sublevaos qu'asaltaren una caravana de musulmanes en tiempu de tregua.

Referencies

Bibliografía

Alvar, Carlos; Alvar, Manuel (1997) Épica medieval española. Madrid: Cátedra. ISBN 84-376-0975-5.
Andreu, Francisca Soria (2001). Lope de Vega, La campana de Aragón. Zaragoza: Institución «Fernando el Católico». ISBN 84-7820-755-4.

Enllaces esternos