Camera lucida

De Wikipedia

La camera lucida ye un utensiliu ópticu usáu como aida de dibuxu polos artistes. Foi patentada en 1806 por William Hyde Wollaston. Paez haber evidencia de que la camera lucida nun fuera más qu'una reinvención d'un aparatu descritu 200 años enantes por Johannes Kepler na so Dioptrice (1611). Nel sieglu XIX la descripción de Kepler cayera totalmente nel escaezu, asina que naide nun retrucó'l proclamu de Wollaston. El términu "camera lucida" ye de Wollaston.

La camera lucida produz una superimposición óptica ente l'oxetu que se ta viendo y la superficie onde l'artista ta dibuxando. L'artista ve la escena y la superficie de dibuxu al empar, lo mesmo que nuna doble esposición fotográfica. Esto permite al artista tresferir puntos guía dende la escena hasta la superficie de dibuxu, aidando d'esta miente a una afitada correllación de la perspeutiva. L'artista mesmo pue trazar los contornos de los oxetos de la escena.

Grabáu de 1830 onde se ta usando la camera lucida.

Si se ta usando papel blanco, la superimposición del papel cola escena tiende a disolver la escena, faciendo difícil vela. Trabayando con una camera lucida ye meyor usar papel prieto y dibuxar con llapiceru blancu.

La camera lucida inda pue consiguise anguaño al traviés de canales de suministros pal arte, pero nun ye perconocida nin ampliamente usada. Hai bien poques de décades inda yera, sicasí, una erbía estándar de los microscopistes. Hasta hai bien poco, les microsemeyes yeren cares de reproducir. Amás, en bien de casos, una ilustración clara de la estructura que'l microscopista quería documentar yera muncho más fácil de producir dibuxándola que fotografiándola. Poro, les mas de les ilustraciones rutinaries histolóxiques y microanatómiques de los llibros de testu y de les revistes d'investigación yeren dibuxos fechos cola camera lucida.

El nome de camera lucida (términu llatín que significa cuartu claru) intenta obviamente remembrar otra erbía de dibuxu perantigua, la camera obscura (términu llatín que significa cuartu escuru). Nun hai asemeyances óptiques ente dambos aparatos. La camera lucida ye un utensiliu llixeru y portátil que nun requier condiciones especiales d'illuminación. Nun proyeuta imaxe dala.

Na forma más cenciella de la camera lucida, l'artista mira pa la superficie de dibuxu al traviés d'un espeyu plateáu nuna metá allugáu a 45 graos. Esto superpón una visión direuta de la superficie del dibuxu embaxo, cola visión reflexada d'una escena allugada en frente del artista. L'instrumentu suel amiestar una lente negativa poco potente, creando una imaxe virtual de la escena aproximadamente a la mesma distancia que la superficie de dibuxu, de manera que dambos puen ser vistos al empar bien enfocaos.

Óptica de la camera lucida de Wollaston

La camera lucida orixinal de Wollaston, amosada nel diagrama d'a mandrecha, usa un prisma arrechu. Les escenes direuta y reflexada superpónense colocando l'aparatu pa que namái media neñina del güeyu E vea al traviés del prisma, viendo la superficie de dibuxu P direutamente. La otra metá ve una imaxe arrecha del oxetu reflexáu por dos llaos del prisma ABCD. Les lentes L y/o L' igualen les distancies óptiques de la superficie de dibuxu y del oxetu.

De lluna de miel n'Italia en 1833, el pioneru en fotografía William Fox Talbot usó una camera lucida como aida pa los bocetos. Más tarde rexistró que los sos esfuercios de resultaos foron una deceición, cosa que lu animó a buscar una manera de "faer que les imáxenes naturales s'imprenten durablemente".

En 2001, l'artista David Hockney creó una bona controversia col so llibru Secret Knowledge: Rediscovering the Lost Techniques of the Old Masters (Conocencia secreta: Redescubriendo les téuniques perdíes de los vieyos maestros). Nél suxer que los grandes artistes del pasáu, como Ingres, Van Eyck y Caravaggio nun trabayaron a mano alzada, sinón que se guiaron por aparatos ópticos, especialmente una preparación qu'usaba un espeyu cóncavu pa proyeutar imáxenes reales. La so evidencia ta basada completamente nes carauterístiques de les sos pintures. El so trabayu pue espertar gran interés pol usu d'aparatos ópticos como ferramientes pa la delliniación.

Referencies[editar | editar la fonte]

Enllaces esternos[editar | editar la fonte]