Camín de cantares

Camín de cantares
Datos
País d'orixe	España
Emisión
Emisora	A7
Varios

Camín de cantares foi una serie documental que s'emitió pela A7. Estrenáu en mayu del 2006, l'espaciu producíu por Ámbitu Audiovisual y presentáu por Xosé Antón Fernández ‘Ambás’, baxo la direición de Ramón Lluis Bande, llegó algamar medies d'audiencia del 30,2%, consiguiendo cuotes de share namás superaes poles retresmisiones de partíos del Real Sporting de Xixón. Al poco d'acabar esti programa, TPA estrenó Camín, espaciu que sigue la llinia marcada pol so antecesor.

A lo llargo de cuatro años, l'espaciu tuvo seis temporaes -en total 78 capítulos-. La cadena autonómica emitía'l programa tolos sábados, de 13:00 a 13:30, y lo redifundía los xueves de 9:00 a 9:30 y de 15:00 a 15:30. Anguaño, l'espaciu sigue emitiéndose en redifusión tolos sábados y domingos a les 15.00 hores.

N'avientu del 2010, la Xunta pola Defensa de la Llingua Asturiana entregó'l Pegoyu, el gallardón positivu de los Premios Andrés Solar, a esti espaciu

Argumentu

Nel espaciu, Xosé Ambás percuerre'l territoriu asturianu p'amosar la tradición oral y la so diversidá llingüística. Sicasí, esti programa llegó a grabar capítulos en tierres llioneses, zamoranes y mirandeses, en Portugal, convirtiéndose en toa una radiografía del dominiu llingüísticu del asturllionés.

Esta serie documental, inspirada nel Archivu de la Tradición Oral, quier contribuír a preservar y tresmitir la herencia cultural de los asturianos. L'espaciu tien tres partes diferenciaes: entrevista, recoyida de material y reellaboración contemporánea.

La mayor parte de los protagonistes de la entrevista son muyeres mayores de 70 años que rellaten les sos esperiencies y dibuxen la historia de la muyer del mundu rural asturianu nel sieglu XX. Xosé Ambás perecuerre con elles el pueblu y nel interior de la so casa faen alcordanza de dichos, cantares y música tradicional.

La última seición consiste na interpretación contemporánea de la música popular. Tolos capítulos de Camín de cantares ciérrense cola grabación nun estudiu de dalgún de los cantares y sones interpretaos pola protagonista.

Referencies

• Datos: Q20615115