Códiz
Un códiz (plural códices) ye un llibru escritu a mano, fechu antes de la invención de la imprenta.[1] Foi l'antecesor históricu del formatu del llibru modernu. Téunicamente, la gran mayoría de los llibros modernos usen el formatu códiz, con un conxuntu de páxines encuadernaes nun llau. Sicasí, el términu códiz resérvase pa los antiguos manuscritos, que principalmente usaben fueyes de vitela, pergamín o papiros, en cuenta de papel.[2]
Por convención, el términu tamién s'usa pa cualquier códiz azteca (anque los exemplos más antiguos realmente nun usen el formatu códiz), códices mayes y otros manuscritos de la época precolombina que consiguieron escapar de los intentos postcolombinos de aniquilar dafechu tol conocimientu acumuláu por estes cultures. Les práutiques de catalogación de les biblioteques llevaron a que munchos manuscritos europeos tengan "códiz" como parte del so nome habitual, como nel casu del Codex Gigas, anque la mayoría nun lo tienen.
Al menos nel mundu occidental, el principal antecesor del códiz con páxines pa documentos llargos foi'l rollu continuu (tamién de vitela, pergamín o papiros), que constituyó la forma dominante de documentu nel mundu antiguu. Dalgunos códices tán plegaos de manera continua como un acordión, en particular los códices mayes y azteques, que de fechu son fueyes llargues de papel o piel animal plegaes en páxines. Los códices en forma d'acordión fechos de papel de fibra desenvolviéronse tamién na dinastía Tang en China, non más tarde del sieglu IX. Esta práutica espandióse depués al periodu Heian en Xapón a través del intercambéu budista, onde se llamaben orihon.[3]
Los romanos antiguos desenvolvieron la forma a partir de les tables de cera. El reemplazu gradual del rollu pol códiz foi calificáu como l'avance más importante na fabricación de llibros hasta la invención de la imprenta.[4] El códiz trensformó la forma mesma del llibru y ofreció un formatu que perduró hasta güei.[5] La espansión del códiz suel asociase cola xuba del cristianismu, qu'adoptó ceo'l formatu pa la Biblia.[6] Primeramente descritu nel sieglu I de la dómina común, cuando'l poeta romanu Marcial allabó la so comodidá d'usu, el códiz algamó paridá numbérica col rollu alredor del añu 300 d.C.,[7] y reemplazólo dafechu no que yá entós yera un mundu grecorromanu cristianizáu nel sieglu VI.[8]
Ver tamién
[editar | editar la fonte]Bibliografía
[editar | editar la fonte]- Roberts, Colin H.; Skeat, T. C. (1983) The Birth of the Codex. ISBN 0-19-726024-1.
Referencies
[editar | editar la fonte]- ↑ Esti términu apaez nel Diccionariu de l'Academia de la Llingua Asturiana. Ver: códiz
- ↑ Oxford English Dictionary, 2ª ed.: Codex: "a manuscript volume"
- ↑ «CBAA the Association for Book Art Education - A HISTORY OF THE ACCORDION BOOK: PART II // Peter Thomas». Consultáu'l 2023-10-26.
- ↑ Roberts & Skeat 1983, p. 1
- ↑ Lyons, 2011, p. 8.
- ↑ Roberts & Skeat 1983, pp. 38–67
- ↑ "Codex" nel Oxford Dictionary of Byzantium, Oxford University Press, Nueva York & Oxford, 1991, p. 473. ISBN 0195046528.
- ↑ Roberts & Skeat 1983, p. 75
Enllaces esternos
[editar | editar la fonte]
Wikimedia Commons acueye conteníu multimedia sobre Códiz.
