Bernardo Guardado

De Wikipedia
Saltar a navegación Saltar a la gueta
Bernardo GuardadoPicto infobox auteur.png
Bernrado Guardado (cropped).jpg
Vida
Nacimientu Avilés1913
Nacionalidá Bandera d'España España
Fallecimientu

Avilés1982

(68/69 años)
Estudios
Llingües castellanu
asturianu
Oficiu
Oficiu escritor
Cambiar los datos en Wikidata

Bernardo Guardado Rodríguez, conocíu como Lalo, (1913Avilés - 1982Avilés) foi un escritor en llingua asturiana.

Biografía[editar | editar la fonte]

Nació nel barriu de Carbayéu, Avilés el 21 de febreru de 1913 y morrió nel mesmu llugar en 1982. Foi fíu d'Encarna y de José. Tuvo una sola hermana: Carmina. Formóse académica y culturalmente coles mesmes qu'estudiaba música, oficiu qu'exerció mientres años n'orquestes y la Banda de Música d'Avilés, como añedíu al so trabayu habitual na fábrica de vidriu. Desque yera bien nuevu foi militante del Partíu Socialista Obreru Español y La Unión Xeneral de Trabayadores. Impartió clases d'alfabetización na Casa del Pueblu y foi voluntariu de Cruz Roja. Collaboraría, amás, nos años anteriores al golpe d'Estáu del xeneral Francisco Franco, con periódicos de la dómina, principalmente en Meyora, que yera l'órganu del PSOE n'Asturies.

Lluchó como milicianu na Guerra Civil Española. Foi mancáu nel frente y más palantre deteníu, xulgáu y condergáu a muerte polos golpistes. Más tarde ésta condena foi conmutada pola de prisión, pero antes pasó por diversu cárceles, incluyíu'l conocíu penal de Burgos. Cuando salió en llibertá tornó a Avilés onde collaboró cola organización socialista clandestina siendo deteníu en dalguna otra ocasión. Por toos estos acontecimientos nun volvió escribir hasta los años sesenta, dempués de la muerte de la so esposa a la que dedica'l poema "Desque se foi ella" mesmu que nunca foi editáu en dalgún de los sos llibros.

Realizó un importante espardimientu del "bable" en dellos diarios asturianos como "La Voz de Asturias" y "El Comercio". Foi dos veces ganador del concursu de Pregones en Bable que la Comisión Municipal de Festexos convocó por cuenta de Les Fiestes del Bollu d'Avilés per primer vegada nel añu 1969. Al añu siguiente, él recibió una mención honorífica al realizar el primera y únicu trabayu en Bable que se presentara hasta entós nel concursu que se celebraba tolos años. En 1970 foi ganador de la medaya d'oru nel certame de Poesía Bable, convocáu por "El Pueblu d'Asturies" de Xixón.

Publicó cuatro llibros: "Xente y barrios d´Áviles", "Cueses y cosadielles", "Cantando a Asturies" ilustráu con dibuxos creaos explícitamente pa esti llibru por pintores Asturianos (Macarron; Càstor; Moreno ; Nicieza y Soria Gutiérrez) y "Más espines que roses". Esti postreru foi publicáu 10 años dempués de la so muerte.

Carauterístiques de la obra de Bernardo Guardado[editar | editar la fonte]

En toos ellos Guardado practica un tipu de poesía de rima fácil y gustu popular, que lo entronca col grupu d'autores de versos d'esa clase qu'hubo nos años anteriores al Surdimientu. En 1976 da a imprentar un llibru, Más espines que roses, que por diversu circunstancies non pudo vese la so publicación hasta 1992, diez años dempués de la muerte del autor. Nesta obra, Bernardo Guardado, ruempe cola tradición populista na qu'hasta entós s'escribía y ensaya una poesía na qu'el llirismu, lo moral y la señaldá son les bases sobre los que s'articula un poema más curiáu no formal —anque rayando cuasi siempres cola forma de romance, como na mayoría de los sos versos— y onde se busca una complicidá non yá cola estética, sinón tamién ética del llector.

El sacerdote y tamién poeta, José Manuel Feito, nel prólogu escritu en 1976 a lo que tenía que ser la edición de Más espines que roses, sentencia atayante: “Si'l poema en bable va en serio, empieza a haber poesía”.

Obra[editar | editar la fonte]

  • Xente y barrios d'Avilés /Bernardo Guardado Rodríguez ; prólogu de Venancio Ovies. — Avilés : [s.n.] , 1973.
  • Cueses y cosadielles: (Semblanzas en dialeutu bable) /Bernardo Guardado Rodríguez ; prólogu de Víctor Urdangaray Argüelles. — Avilés : [s.n.] , 1975.
  • Cantando a Asturies: (Poesía en bable) /Bernardo Guardado Rodríguez ; prólogu, Carmen Díaz Castañón ; epílogu, Víctor Urdangaray Argüelles. — Avilés : [s.n.] , 1976. —
  • Más espines que roses / Bernardo Guardado ; prólogu de José Manuel Feito. — Uviéu : Trabe, 1992. — (La Fonte de Fascura ; 5).

Bibliografía[editar | editar la fonte]

  • Carmen Díaz Castañón, Carmen. "Bernardino Guardado Rodríguez". En: Lliteratura asturiana en bable. Salinas, Ayalga, 1980, pp.159–162.
  • Díaz Castañón, Carmen. "Guardado Rodríguez, Bernardino". En: Llingua y Lliteratura, Xixón, Silverio Cañada, 1981, p.282.
  • Feito, José Manuel. "Prólogu" a: Bernardo Guardado, Más espines que roses, Uviéu, Trabe, 1992.

Ver tamién[editar | editar la fonte]

Enllaces esternos[editar | editar la fonte]

Bernardo Guardado