Bando

De Uiquipedia
Saltar a: navegación, buscar
Bando
Bando2005.jpg
Enfoque Basáu en formes d’animales
País d’orixe Myanmar (Birmania)
Fundador Monxos del norte de Birmania
Prauticantes famosos Pye Thein, Maung Gyi
Deporte olímpicu Non

El Bando ye un estilu defensivu de thaing centráu en téuniques basaes na imitación d’animales. Los primeros significaos de la pallabra yeren autodisciplina, autodesarrollu y automeyoramientu. Más tarde vieno significar autoproteición o defensa personal. A vegaes úsase equivocadamente Bando como un términu xenéricu a respeutive toles artes marciales birmanes, pero en realidá ye un únicu sistema.

Hestoria[editar | editar la fonte]

Los anicios d’esti arte qu’anguaño llamamos “bando” son más bien escuros y imprecisos. Los documentos escritos o falten o quedaron atapaos nos monesterios del norte de Myanmar (Birmania).

Se pue, sicasí, argumentar que la rellación ente’l bando y los templos locales ye cuasimente tan antigua como’l mesmu bando. Cuando’l Budismu que venía de la India foi importáu pola etnia de los Pyus, fundáronse munchos templos nes ciudaes y a la vera los pueblos. Nel so sen vivía una comunidá de monxos, la mayoría soldaos, altos funcionarios, miembros de la nobleza, en fin y en pos eruditos qu’algamaren l’éxitu na vida civil. Los nativos dexáben-yos los fíos pa qu’estudiaren una bona riestra de disciplines. El templu concentraba la vida social, yera’l llugar au la xente s’axuntaba, au rezaba y au se facíen munches fiestes y celebraciones. Tamién yera un llugar de puxu artísticu, non solamente a respeutive l’arte relixosu, sinón tamién por tola bayura de disciplines artístiques y, poro, poles artes de defensa y d’educación física.

Debióse quiciabes a los monxos y a la so conocencia nel ámbitu de la estratexa militar que los rapazos y los homes adultos estudiaren l’arte del combate. Nesti contestu, el bando cubrió les funciones d’exerciciu físicu, de defensa personal, d’entretenimientu y de promoción social.

Hasta l’añu 1000 aproximao, el país sufrió la influyencia de la India, sobre too per aciu del budismu, y de los contactos culturales cola civilización china. Nel reináu d’Anawratha (1044-1077), anque los preceutos relixosos torgaben la danza, les acrobacies y otros tipos d’actividaes físiques, los monxos enseñaron dafurto les téuniques de llucha. Nun ambiente llaicu piños d’estudiantes deprendieron l’arte del combate, xunto col trabayu respiratoriu y la meditación.

Puñetazu descendente de tipu “cobra”

La primera denomación dada polos monxos a un sistema de defensa personal y d’educación física foi thaing. Esti sistema de combate púnxose ensin dulda a prueba nel campu batalla –nuna dómina onde la llucha d’home a home yera la norma-, y na vida civil col envís de poner la comunidá al abeyu de los lladrones. Desendolcóse de xuru sobre la mayor parte de la península indochina, onde tovía güei pueden identificase munchos deportes de combate y artes marciales orixinales. Baxo’l clima d’inestabilidá política que carauterizaba les rellaciones ente los estremaos reinos de la rexón (los exércitos del reinu de Siam y de los distintos imperios birmanos nunca dexaron d’esfronase del sieglu XVI al XVIII), les artes marciales desendolcáronse al empar en caún de los reinos y cada clan inspirábase nes téuniques del contrariu pa les compensar y incorporar al so propiu estilu de llucha. La validez d’esta hipótesis ye cierta pola mor de que, xunto coles estremaes formes actuales del bando, siguen prauticándose en munchos países del sureste d’Asia artes de combate mui aproximaes téunicamente, pero con anicios que llexítimamente pueden arreyase a los del Thaing.

Enantes de la invasión británica coesistíen sistemes estremaos de combate. Correspondíen a los principales grupos étnicos y comunidaes del país: los bamars (birmanos), chins, zomis, chinos, indios, kachins (jingpos), karens (kayins), mons (talaings) y shans. Cada sistema posiaba una constitución marcial propia, utilizando o’l términu “bando” o’l de “thaing” pa tola so práutica, incluyendo métodos con y ensin armes.

Contra en “crochet” al tiempu d’un ataque en “jab”

Cola llegada de los británicos el thaing prauticábase dafurto, y cuando la rebelión de Saya San en 1930 la so práutica esporpolló de manera nel Estáu Shan, nel distritu de Thaton, en Twante y nel distritu de Bago. En 1933, nel sen de l’asociación deportiva militar (Military Athletic Club) de Maymyo, l’entrenamientu yera perduru y realista enforma. Nos años 1930, Ba Thwin y Ba Yin yeren los cabezaleros del thaing.

En 1942, cuando la ocupación xaponesa, el thaing organizóse a nivel nacional, y los profesores (Sayas) foron acreditaos. Dos años dempués, la Lliga de la Mocedá del Sureste d’Asia, cola fuercia de los sos 20.000 miembros, esparde esti arte perantiguu. Los xaponeses afalaron y aidaron a esti desendolcu participando en competiciones organizaes por Pye Thein, Saya Pwa y munchos otros maestros conocíos.

Dempués de la Segunda Guerra Mundial y cola independencia del país, el Thaing despegó otra vuelta. Les primeres competiciones tuvieron llugar en 1948, y les de 1953 yá cuenten con más de 100 participantes. Entós creóse la federación de Thaing confederación se creó con Chit Than, alumnu de Pye Thein, como secretariu xeneral. Los otros maestros de nomadía de la época son Khin Maung y Daw Khin Myint Myint.

El Bando foi introducíu en Francia, en Suiza y n’España pol maestru americanu Jonathan Collins. Pero yá se desendolcaba dende los años 1970 n’Inglaterra gracies a Sayagyi U Hla Win, que ye actualmente’l responsable téunicu pa Europa. Tamién ye esti últimu ún de los grandes maestros de la comisión téunica mundial nel sen de l’Asociación Internacional de Thaing Bando, única estructura internacional reconocida pal desendolcu de les artes marciales y de los deportes de combate polos maestros de Myanmar (antigua Birmania).

A primeros de los años 1960 creóse la federación internacional (International Bando Association, I.B.A). La IBA foi presentada en Myanmar en 1997 por Jon Collins y Jesús Vázquez Rivera. Nel 2009 convertióse na International Thaing Bando Association (I.T.B.A.). El so presidente ye l’español Jesús Vázquez Rivera, y el so vicepresidente ye’l francés Jean-Roger Callière.

Imitación d’animales[editar | editar la fonte]

Estilu del águila
Guardia baxa de pantera y de tigre

Pueblos primitivos estremaos llegaron a conclusiones paecíes sobre lo básico: inventaron formes d’animales observando les engarraes de distintos animales, la naturaleza y el propiu cuerpu.

El conceutu animal ye la “marca de fábrica” del thaing. El segundu principiu de preparación del guerreru birmanu ye’l siguiente: “Observar la naturaleza (y sobre too’l comportamientu animal pa inspirase)”. Los antiguos supieron observar la naturaleza pa escoyer lo que-yos paecía útil ente les estratexes desendolcaes polos animales. Val pensar que’l comportamientu animal respuende a lóxiques d’eficacia a respeutive la proteición de sigo y de los sos conxéneres. El thaing emplega y valora estos comportamientos “a lo animal” que son la so verdadera “marca de fábrica”.


El bando ye la utilización del comportamientu animal non solamente a nivel xestual o téunicu, sinón sobre too esplotando comportamientos estratéxicos propios de los animales: soluciones defensives, amedranar al atacante y tentar de convencelu (desfile y danza previa), maniobres del atacante (engaños y trampes) y falcatrúes de toa triba. Estos comportamientos estremaos y particulares d’un animal a otru dexen ver formes estremaes d’acometer la llucha, y sobre too da a caún el so propiu estilu. Por casu, la llucha sobre una pierna pal que ye del estilu del águila, la llucha cerca’l suelu pal estilu de la pantera, etc.

Entrenamientu[editar | editar la fonte]

Como asocede cola mayoría de les artes marciales d’Asia, toles escueles de Bando arranquen cola enseñanza de les posiciones y pasos básicos. Esta primera estaya de deprendimientu dura dellos meses, y a vegaes sigue años enteros, dependiendo del instructor o del estilu. Na segunda estaya del entrenamientu apriéndese una retafila de téuniques de bloquéu y parada. Pal bando ye más importante la defensa que l’ataque, en visu a que los estudiantes sían quien a protexese a si mesmos si lo precisen. La tercera estaya inclúi’l deprendimientu de téuniques d’ataque. La mayoría de les téuniques del bando depriéndense per aciu de formes o “aka”, que pueden executase en solitariu o en pareya. La estaya final de maestría inclúi la participación en torneos, que dacuando finen en muertes.

Golpe direutu de tipu “tigre” cola palma la mano
Patada d’escorpión

Téuniques[editar | editar la fonte]

Les formes y téuniques nel bando básense en movimientos d’animales, quiciabes pola influyencia d’estilos d’animales d’India y de China. Estes rutines inclúin el bracu, el toru, la cobra, el lleopardu (o pantera), el monu, la pitón, l’escorpión, el tigre y la víbora. Los movimientos de cada patrón carauterícense pol animal qu’imiten. D’esta miente, la forma de pitón inclúi movimientos d’estrumir, estrangular y apertar; la forma del tigre implica usar les garres y resgar; la forma de víbora céntrase na flexibilidá, mientres que la forma del venáu desarrolla una mente sollerte. Hai maestros qu’enseñen l’estilu de la pantera negra como una combinación de toles otres formes d’animales.

El bando xeneralmente dexa la iniciativa al oponente y enfótase muncho en maniobres de contrataque. Cuando un prauticante de bando ye atacáu, lo primero recula y de secute entama’l contrataque. El “bando del estilu mediu” ye aliellu y sensitivu. Una y bones caltrió l’amenaza ye posible responder con una contra acionada, y asina destrúise tamién l’arma del oponente. Si por casu resulten rotos la mano o pie del contrariu, la engarrada fina dafechu. Los prauticantes de bando apunten xeneralmente al cuerpu, pero la cabeza, costazu, coldu, rodiya y pie úsense toos ellos pa propósitos ofensivos.

Enllaces esternos[editar | editar la fonte]