Aurelio Quirós Argüelles

Aurelio Quirós Argüelles, empresariu y políticu noreñés, foi alcalde del Conceyu de Noreña mientres 25 años.

Nacíu en La Felguera (Noreña) foi el sétimu de ocho hermanos. A los 22 años aniciase nel mundu empresarial con Contratas Aurelio Quirós actividá que caltuvo hasta la so xubilación.

Anicióse na política como alcalde de barriu y poco dempués, en 1979, nes primeres elleiciones municipales democrátiques tres el franquismu, sal escoyíu conceyal nes llistes de Unión de Centro Democrático (UCD), qu'encabezaba Rafael Junquera García.

Aurelio Quirós conviértese n'alcalde al pocu tiempu al dimitir los dos conceyales que lu precedíen na llista ellectoral. Dende entós, foi'l cabezaleru de cinco llistes, ganando otres tantes eleiciones municipales de Noreña. Les de 1983,1987 y 1991 col CDS, nes de 1995 con Centristas Asturianos, surdíu n'Asturies de les 'cenices' del CDS, nes de 1999 na llista d'URAS y finalmente en 2003 conla Unión Noreñense Independiente (UNI), un partíu de clater llocal fundáu por él.

La UNI gana les eleiciones municipales de 2003, algamando 4 conceyales, PSOE y PP queden con 3 conceyales caún ya IU algamó un representante. Aurelio Quirós conviértese n'alcalde y gobierna col PP hasta que'l 28 de febreru de 2005 formaliza la so dimisión nel rexistru municipal y el 2 de marzu preside por última vez el Plenu Municipal, onde s'aprobó la so renuncia. Quirós dexaba la política dempués d'un cuartu de sieglu como alcalde de Noreña.