Audre Lorde
Audre Geraldine Lorde (18 de febreru de 1934, Nueva York – 17 de payares de 1992, Saint Croix (en) 
) foi una escritora afroamericana, feminista, lesbiana y activista polos derechos civiles. Como poeta ye especialmente conocida pol dominiu técnicu y la fuerza emocional colos qu'espresa la ira y la indignación que-y provocaron les inxusticies civiles y sociales que reparó a lo llargo de la so vida.[8] Los sos poemes y prosa trataron en gran midida temes rellacionaes colos derechos civiles, el feminismu y la esploración de la identidá femenina negra.[9] La so obra más conocida ye Sister Outsider, un llibru d'ensayos que contién dellos de los sos testos más influyentes nes lluches contra'l racismu, el machismu y la opresión heterosexual como son There is no hierarchy of oppression y The Master's Tools Will Never Dismantle the Master's House.[10]
En pasando pol un cáncer de mama y cavilgar sobro les discriminaciones sufríes poles muyeres, que se superponen a les de raza y d'orientación sexual, y que se suman a la enfermedá, publicó en 1981 Los diarios del cáncer, un testu empobináu tantu a quien vivieron o viven la esperiencia, como a quien acompañen a otres nesi procesu.
Biografía
[editar | editar la fonte]Creció en Harlem, Nueva York. Los sos padres, inmigrantes afrocaribeños de la islla de Granada fueron Gertrude Belmar y Frederick Lorde. Nomada por ellos como Audrey Geraldine Lorde, optó por abandonar la "y" del so nome de pila, como lo esplica en Zami: A New Spelling of My Name. Foi la menor de trés fíes y, al pie de les sos hermanes Phyllis y Helen, creció escuchando hestories de la so madre sobro les Indies Occidentales. Aprendió a falar y a lleer coles mesmes, enseñada pola so madre. Escribió'l so primer poema cuando taba na escuela primaria. Dempués de graduase en 1951 en Lliteratura y Filosofía nel Colexu Hunter, asistió a la Universidá Hunter ente 1954-1959.[11]
Na so mocedá tuvo amores lésbicos y sufrió homofobia al intentar xuntase a l'asociación d'escritores Harlemn Writers Guild nos años 1950. Nun se rindió y frecuentó los círculos culturales gais de Greenwich Village. Foi cofundadora de The Kitchen Table-Women of Color Press ("Editorial de muyeres de color La Mesa de Cocina") y codirectora del periódicu lésbicu Chrysalis.[12]
En 1954, vivió na Ciudá de Méxicu y en Cuernavaca, Morelos. Mientres esa estancia allegó a la Universidá Nacional Autónoma de Méxicu ya integróse al círculu de exiliaos norteamericanos nesta ciudá. Esti periodu foi un momentu d'afirmación y de renovación, que-y permitió confirmar la so identidá a nivel personal y artísticu como poeta y lesbiana.[13]
En 1961 recibió'l máster en biblioteconomía de la Universidá de Columbia. Trabayó mientres dellos años como bibliotecaria. Casó en 1962 col abogáu Edward Rollins, con quien tuvo a les sos dos fíes. La pareya divorcióse en 1970.[12]
En 1968 recibió un subsidiu de NEA y foi contratada como "poeta residente" pol Tougaloo College onde conoció a quien foi la so pareya mientres diecinueve años, Frances Louise Clayton.[14]
En 1968 publicó The First Cities, el so primer llibru de poesía. En 1978 empezó a trabayar como profesora d'inglés, primero nel John Jay College of Criminal Justice de Nueva York, y depués nel Hunter College.
De 1984 a 1982, empecipió un periodu de profesora visitante en Berlín Occidental, nel Institutu F. Kennedy para Estudios Norteamericanos de la Universidá Llibre de Berlín. Foi convidada pola profesora de dicha Universidá Llibre Dagmar Schultz, quien la conociera nel "Foru Mundial por Les Muyeres" de la ONU, en Copenḥague, en 1980. Mientres la so estancia n'Alemaña, Lorde exerció un significativu influxu en munches alemanes y tuvo una participación bien relevante nel entamu del movimientu afroalemán.[15] El términu "afroalemán" foi creáu por Lorde y otres alemanes negres como un xestu escontra'l movimientu afroamericanu. Mientres les sos diverses estancies nesi país, Lorde dexó una fonda buelga en muyeres como Mayu Ayim, Ika Hügel-Marshall, y Helga Emde. Toes elles decidieron empezar a escribir en conociéndola. En cuenta de emplegar la violencia contra los problemes sistémicos, Lorde abogaba por usar la pallabra como una potente forma de resistencia y animó a les muyeres alemanes a alzar les sos voces en cuenta d'engarrar de vuelta. El so influxu n'Alemaña foi más lexos de les afroalemanes; munchos homes y muyeres blancos atoparon na obra de Lorde una gran ferramienta para les sos propies vides, empezaron a poner en cuestión los sos privilexos y el so poder blancos, y tornáronse más conscientes de les intersecciones vitales con otros y otres.
Dagmar Schultz entamó'l proyectu de faer un documental que destacara un capítulu na vida de Lorde pa munchos desconocíu. "Audre Lorde: Los Años de Berlín 1984–1992" foi parte del Festival de cine de Berlín, Berlinale, y tuvo'l so premier mundial nel 62ᵘ Festival Añal en 2012. La película exhibióse en festivales de cine per tol mundu, y ganó'l Premiu del públicu al meyor documental nel 15ᵘ Festival de Cine y Video Queer Reelout del 2014, el Premiu d'Oru al meyor documental nel Festival de cine Internacional para Muyeres, Asuntos Sociales y Cero Discriminación, y el Premiu del públicu al meyor documental nel Festival Internacional de Cine LGBT de Barcelona. "Audre Lorde: Los Años de Berlín" revela la falta de reconocencia que la contribución de Lorde a les teoríes de interseccionalidá tuvo hasta agora.
Cáncer y últimos años
[editar | editar la fonte]En 1978 diagnosticáron-y un cáncer de mama pol que-y realizaron una masectomía.[16] Seis años más tarde enfrentóse a un cáncer hepáticu. Tantu en Los diarios del cáncer (1980), que deriva en parte d'entraes del so diariu personales escrites a fines de los años setenta, como n'A Burst of Light (Una esplosión de lluz) (1988) Lorde emplega l'ensayu para recoyer, esplorar, y cavilgar na diagnosis, tratamientu, y recuperación del cáncer de pechu. En dambos trabayos Lorde alderica les idees occidentales d'enfermedá, tratamientu, y prótesis y guapura físiques, asina como les temes de la muerte, el mieu a morrer, la victimización versus la supervivencia, y la fuerza interior.
Morrió'l 17 de payares de 1992 en Saint Croix onde vivía cola so pareya Gloria. Antes de la so muerte, mientres una ceremonia africana de bautismu, Lorde tomó'l nome de Gamba Adisa, que quier dicir: "Guerrera: la que se fai entender".
Referencies
[editar | editar la fonte]- 1 2 URL de la referencia: https://www.blackpast.org/african-american-history/lorde-audre-1934-1992/.
- ↑ Afirmao en: Gemeinsame Normdatei. Data de consulta: 29 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ URL de la referencia: http://www.english.illinois.edu/maps/poets/g_l/lorde/life.htm. Data de consulta: 5 xunu 2016.
- 1 2 Afirmao en: autoridaes BNF. Identificador BnF: 120530900. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
- ↑ URL de la referencia: http://www.nyclgbtsites.org/site/audre-lorde-residence/.
- ↑ URL de la referencia: http://nationalbook.org/nba1974.html#.V1RJ_3SaSis. Data de consulta: 5 xunu 2016.
- 1 2 «Encyclopædia Britannica Online» (inglés). Consultáu'l 25 mayu 2024.
- ↑ «Audre Lorde» (inglés). Poetry Foundation (3 d'avientu de 2016). Consultáu'l 3 d'avientu de 2016.
- ↑ (1 de xineru de 2007) Sister Outsider: Essays and Speeches (n'inglés).
- ↑ (2003) La hermana, la extranjera.
- ↑ (2009) Zami. Una nueva forma de escribir mi nombre.
- 1 2 Kika Fumero. «Audre Lorde, una amazona guerrera - Revista MíraLES». www.mirales.es. Consultáu'l 3 d'avientu de 2016.
- ↑ (2004) Warrior Poet. A biography of Audre Lorde.
- ↑ «Los diarios del cáncer» (castellanu) (2008).
- ↑ «Audre Lorde - The Berlin Years». www.audrelorde-theberlinyears.com. Archiváu dende l'orixinal, el 2016-03-30. Consultáu'l 14 de marzu de 2018.
- ↑ Kimerly W. Benston (2014). Gates, Jr., Henry Louis; Smith, Valerie A., eds. The Norton Anthology of African-American Literature: Volume 2 (Third ed.). W. W. Norton & Company, Inc. pp. 637–39. ISBN 978-0-393-92370-4.
Enllaces esternos
[editar | editar la fonte]
Wikimedia Commons acueye conteníu multimedia sobre Audre Lorde.
- Audre Lorde na Internet Movie Database (n'inglés)
- «Audre Lorde». en Find a Grave. (n'inglés)
| Control d'autoridaes |
|
|---|
Datos: Q463319- Multimedia: Audre Lorde