Asociación de la Canción y el Folclor Valle del Nalón

De Wikipedia
Saltar a navegación Saltar a la gueta

L'Asociación de la Canción y el Folclor Valle del Nalón ye una asociación de Samartín del Rei Aurelio (Asturies) dedicada a fomentar la canción y el folclor asturianu.

Orixe[editar | editar la fonte]

Esta asociación creóse nel añu 1980 en Sotrondio, Samartín del Rei Aurelio. Naz a partir d'un grupu d'amigos que s'aconceyaben tolos díes a cantar nos chigres de la zona acompañaos por un gaiteru. Ente les persones que participaben taben Aurelio Fueyo, José Luis Alonso Rozada, Arcadio García "Cayo", Valentín Fuente (gaiteru) y Manolo Caleyos, ente otros.

L'asociación créase a raíz d'un homenaxe al cantante de canción asturiana Silvino Fueyo, de San Vicente (L'Entregu). A partir d'ehí lleváronse a cabu munchos homenaxes, como por exemplu a la cantante Margarita Blanco, al presentador de munchos eventos de canción y folclor Julio Cuadrado "El de Rioseco", o al consideráu por munchos maestru de la canción asturiana, Silvino Antuña "El sastre", ente otros.

El presidente de l'asociación dende la so fundación ye José Luis Alonso Rozada.

Actividaes[editar | editar la fonte]

Día de la Canción y el Folclor[editar | editar la fonte]

En 1990 instaura'l Día de la Canción y Folclor en Samartín del Rei Aurelio, que se celebra tolos años nel mes de payares. Dedícase un día a la canción y el folclor asturiano, distinguiendo a persones que d'un mou u otru contribuyen al caltenimientu de la música asturiana como por exemplu los cantantes Tarín, Calo, Arturo de La Cerezal, Aurelio Fueyo, Alfonso Llaneza, o l'artesanu de gaites Alberto Varillas, ente otros munchos.

Escuela de Música Tradicional[editar | editar la fonte]

Pareya de gaiteru y tamboriteru salíos de la Escuela de Música Tradicional de l'Asociación de la Canción y el Folclor Valle del Nalón

Tamién en 1990, l'asociación crea la Escuela de Música Tradicional onde s'imparten cursos d'enseñanza de cantu, baille tradicional, gaita, tambor, acordión, panderu, guitarra y percusión pa xente de toles edaes.

Alcuentru del Cante de les Mines[editar | editar la fonte]

En 2004 celebren per primer vegada l'Alcuentru del Cante de les Mines. Con esta actividá búscase esparder la canción, el folclor y la música tradicional, dando a conocer toles variantes interpretatives y musicales d'Asturies, asina como nuevos valores.

Nesti alcuentru participen gaiteros, cantantes y grupos de baille d'otros puntos d'Asturies y tamién d'otres comunidaes nes que tamién se desendolca'l cante de les mines. Ente los participantes nesta actividá señalar grupos como la Coral Santa Bárbara y el Grupu Xaléu de Villablino o l'Asociación Folclórica Tsaciana nel añu 2009. En 2010 contóse cola participación de l'Agrupación folclórico-cultural San Martiño de Cerceda, d'A Coruña, y en 2011 tuvieron presentes intérpretes de la cuenca ayerana: el Tríu Santos, Varela y Caleya y los cantantes Jesusa Fernández “La Chucha de Nembra” y Celestino González “Tino el d'Arniciu”. Pela parte de la cuenca del Nalón actuaron los cantantes Mari Celi Fernández Palacio y José Manuel Collado, acompañaos pol gaiteru Raúl Díaz García y pol tamboriteru Rubén Suárez Menéndez.

En 2012 participó'l Grupu "El Perendengue" de Cangas del Narcea.

Día d'Asturies[editar | editar la fonte]

Ramón el tamboriteru y Maximino'l gaiteru, miembros de l'Asociación de la Canción y el Folclor Valle del Nalón nel Día d'Asturies n'Amieva

L'asociación tamién participa en toles ediciones del Día d'Asturies aportando intérpretes, monologuistes y pareyes de gaiteros y tamboriteros.

Concursu de Canción Asturiana de Samartín del Rei Aurelio[editar | editar la fonte]

A partir del añu 2014 l'Asociación de la Canción y el Folclor Valle del Nalón ocúpase de la organización del Concursu de Canción Asturiana de Samartín del Rei Aurelio, que cumplió esti añu la so décimosesta edición. Nesti concursu participen cantantes de tola xeografía asturiana y tamién d'otros puntos de fuera de la rexón. Los cantantes puen presentar canciones inédites o esistentes adautaes por ellos mesmos, y acompañales pol instrumentu que consideren conveniente, siempre d'orixe asturianu. Nesta edición participaron más d'un centenar d'intérpretes. El concursu celébrase nel Teatru Municipal de Samartín del Rei Aurelio (L'Entregu) tolos vienres durante los meses de febreru a xunu.

Otres actividaes[editar | editar la fonte]

Amás, l'asociación desendolca actividaes nes que organiza concursos de toná y de baille rexonal, enseñando a xente mozo y adulto la canción, el baille y los instrumentos asturianos autóctonos.

Referencies[editar | editar la fonte]

Enllaces esternos[editar | editar la fonte]