Arnold Stang

De Wikipedia
Arnold Stang
Vida
Nacimientu Nueva York28 de setiembre de 1918[1]
Nacionalidá Bandera de Estaos Xuníos d'América Estaos Xuníos
Muerte Newton (es) Traducir20 d'avientu de 2009[2] (91 años)
Causa de la muerte neumonía
Estudios
Estudios New Utrecht High School (en) Traducir
Llingües falaes inglés
Oficiu actor de televisión, actor de cineactor de voz
IMDb nm0822205
Cambiar los datos en Wikidata

Arnold Stang (28 de setiembre de 1918Nueva York – 20 d'avientu de 2009Newton (es) Traducir)[3] foi un actor risible estauxunidense, conocíu por encarnar a un personaxe de la gran ciudá qu'usaba gafes y de calter desacobardáu.

Carrera[editar | editar la fonte]

Nacíu na ciudá de Nueva York, Stang afirmaba que consiguió la so oportunidá na radio mandando una tarxeta postal a una emisora de Nueva York solicitando pasar una prueba, que aceptaron, y mercando darréu un billete pa viaxar a Nueva York dende Chelsea (Massachusetts), col dineru aforrao pal regalu d'aniversariu de la so madre.[4] Ciertu o non, Stang trabayó nuna emisora de Nueva York na so mocedá, actuando en programes infantiles como The Horn and Hardart Hour y Let's Pretend.[5] En 1940 faía papeles adolescentes na serie radiofónica The Goldbergs, y n'ochobre de 1941 el direutor Don Bernard contratólu pa faer anuncios comerciales nel programa de la CBS Meet Mr. Meek.[6] Darréu, en 1942, actuó nel show The Remarkable Miss Tuttle, con Edna May Oliver,[7] y sustituyó a Eddie Firestone Jr. nel papel del títulu de That Brewster Boy cuando Firestone entró nel Cuerpu de Marines de los Estaos Xuníos en 1943.[8]

L'humorista Henry Morgan fixo d'él el so compañeru de programa na seronda de 1946, y Stang actuó en papeles similares l'añu siguiente en programes de radio con Eddie Cantor[9] y Milton Berle.[4]

Nesa dómina Stang yá actuara en distintos llargumetraxes, incluyendo Seven Days Leave, My Sister Eileen, So This Is New York (con Henry Morgan), y They Got Me Covered. Tamién trabayó como actor teatral nel circuitu de Broadway, participando nes obres Sailor Beware, All In Favor y Same Time Next Week, pieza na que per vegada primera trabayó con Berle.[10]

Stang pasó a la televisión nos entamos de la Era Dorada del mediu. Tuvo un papel recurrente nel show The School House, na cadena DuMont Television Network en 1949. Tamién actuó con regularidá na sitcom de curtia trayeutoria d'Eddie Mayehoff Doc Corkle, na seronda de 1952.[11] Dempués foi artista convidáu del programa de Milton Berle Texaco Star Theater el 12 de mayu de 1953,[12] actuando de manera regular a partir del siguiente setiembre. Stang tamién tuvo papeles como convidáu en dellos programes de variedaes, ente ellos The Colgate Comedy Hour.

Pal cine, foi Sparrow en L'home del brazu d'oru (1955), con Frank Sinatra y Kim Novak. En It's a Mad, Mad, Mad, Mad World (1963) foi Ray, quien xunto a Irwin (interpretáu por Marvin Kaplan) tien una estación de gasolina que Jonathan Winters destrúi en defensa de Otto Meyer (Phil Silvers). Tamién actuó en Hello Down There (1969) y, nun estrañu axugamientu, trabayó nel primer filme d'Arnold Schwarzenegger (col nome entós de "Arnold Strong"), el clásicu Hercules in New York (1970).

Stang foi de cutiu actor de voz en producciones de dibuxos animaos.[13] Nesti campu ye quiciabes más conocíu por dar la voz a "T.C.," el gatu de la serie de Hanna-Barbera Don Gatu. Tamién dio voz a Shorty, collacia de Popeye y caricatura de Stang, al mure Herman del dúu de personaxes de Famous Studios Herman and Katnip, a Tubby Tompkins nunos pocos curtios de La pequeña Lulú, y a Catfish en Misterjaw. Amás, aprovió de voces extras a la serie de Cartoon Network Courage the Cowardly Dog.

Na televisión actuó n'anuncios comerciales de diverses marques, ente elles la llambionada Nestlé Chunky. Nesti campu dio voz a l'abeya de los Honey Nut Cheerios na década de 1980, y foi vocera de Vicks y d'Alcoa.

Últimos años[editar | editar la fonte]

Stang actuó nun episodiu de The Cosby Show con Sammy Davis Jr., estrella convidada. En 1993 encarnó a un fotógrafu na película Dennis the Menace, protagonizada por Walter Matthau.

Arnold Stang finó por causa d'una neumonía en Newton (Massachusetts), el 20 d'avientu de 2009.[3] Foi soterráu nel Campusantu y Crematoriu Newton d'esa ciudá.

Stang y la so esposa, Joanne Taggart, vivieron en Nueva Rochelle, Nueva York y darréu en Greenwich (Connecticut), camudándose a la fin de la so vida a Needham (Massachusetts). El matrimoniu tuvo dos fíos, David y Deborah.[3]

Referencies[editar | editar la fonte]

  1. Afirmao en: Internet Broadway Database. Identificador de persona d'Internet Broadway Database: 60818. Apaez como: Arnold Stang. Data de consulta: 9 ochobre 2017. Llingua de la obra o nome: inglés.
  2. URL de la referencia: http://www.nytimes.com/2009/12/22/arts/television/22stang.html.
  3. 3,0 3,1 3,2 Weber, Bruce. "Arnold Stang, Milquetoast Actor, Dies at 91," The New York Times, 22 d'avientu de 2009.
  4. 4,0 4,1 Pittsburgh Post-Gazette, August 3, 1947
  5. http://www.goldenage-wtic.org/gaor-51.html
  6. Pittsburgh Post-Gazette, Oct. 26. 1941
  7. Chicago Tribune, 19 de xunetu de 1942
  8. Chicago Tribune, 3 de setiembre de 1943
  9. Miami News, 25 de setiembre de 1947
  10. Pittsburgh Post-Gazette, August 3, 1947.
  11. Hedda Hopper syndicated column, 10 de setiembre de 1952
  12. San Mateo Times, 12 de mayu de 1953
  13. Obituariu London Guardian, March 102010.

Enllaces esternos[editar | editar la fonte]