Argynnis paphia

De Wikipedia
Saltar a: navegación, buscar
Wikipedia:Artículos revisaos
Commons-emblem-notice.svg
 
Nacarada
Female argynnis paphia in Lill-Jansskogen.JPG
Fema d'Argynnis paphia.
Clasificación científica
Reinu: Animalia
Filu: Arthropoda
Subfilu: Hexapoda
Clas: Insecta
Orde: Lepidoptera
Suborde: Glossata
Infraorde: Heteroneura
(ensin clasif.): Ditrysia
Superfamilia: Papilionoidea
Familia: Nymphalidae
Subfamilia: Argynninae
Tribu: Argynnini
Xéneru: Argynnis
Especie: A. paphia
(Linnaeus), 1758
[editar datos en Wikidata]

Argynnis paphia ye una gran caparina naranxa, de la familia Nymphalidae, descrita por Carlos Linneo en 1758 como Papilio paphia.[1]

Pue tracamundiase con Argynnis pandora, una caparina bien paecida a la Argynnis paphia. [2]

Descripción[editar | editar la fonte]

Son grandes, de 5 a 6 cm de valumbu, bien pocu más grandes les femes que los machos. El anversu o cara cimera de les nales de los machos son d'un tonu leonáu vivu con numberosos trazos y puntos negros. [3]

L'anversu de les nales anteriores, d'ente 27 y 35 mm, tien una zona androconial perbién definida ente la vena V1 y la V4, y na celda apaecen trés o cuatro trazo negros. La zona basal ye de tonalidá que va del pardu al verde oliva. Les zones discales, postdiscales y marxinal son de color mariellu naranxa. La discal tópase travesada poles escames androconiales, y unos trazos y puntos que dibuxen una llinia irregular con dos curves y que nun llega a Y1a. Na zona postdiscal apaecen puntos que tampoco algamen Y1a. Tamién tien puntos negros pequeños na zona marxinal y una fina llinia negra paralela sobre la qu'apaecen pequeños llurdios negros de forma triangular na confluencia coles venes. Amás, apaez una fina llinia blanca marxinal esterna que ye cortada na interseición de les venes por trazos negros y qu'apaez tamién nes nales posteriores.[4]

Les posteriores, pol so anversu, apaecen dibuxaes con una enllordia ocre nel marxe internu y nel ángulu añal. Les zones basal y discal son del mesmu color que la basal nes nales anteriores, dixebraes de la zona postdiscal por una llinia quebrada negra. Esta zona ye del mesmu color que les discales y postdiscales de les anteriores, y tien una serie de puntos negros gruesos ente E2 y E6. La zona submarxinal alluga una serie completa de llurdios negros, y, paralela a esta escontra'l marxe, otra serie de llurdios más finos, romboidales na confluencia coles venes.

Machu d'A. paphia. Apréciase bien la androconia sobre les venes V1, V2, V3 y V4.

L'aviesu ye de tonalidaes mariellos, naranxos y verdes, con una fina llinia marxinal esterna ocre y les venes mariellu anaranxaes. Les nales anteriores son asemeyaes al anversu, con llurdios negros sobre fondu naranxa. La zona apical ye de color mariellu maciu con llurdios y trazos bien sele marcaos de color verde maciu.

Nes posteriores, les zones basal y discal son verdes, tonalidá oro, con una curtia banda blanca nacarada, y otra, na postdiscal, bien definida pero de trazáu irregular, a la que sigue una banda ocre con cinco enllordies de color verde escuru con un nucleu más claru. Na zona submarxinal apaez una serie completa de llurdios verde escuros y una banda rosa maciu siguida d'otra banda violeta sobre la qu'apaecen llurdios romboidales na interseición coles venes. Enantes de la llinia marxinal esterna, que ye fina, blanca y con puntos mariellu naranxes, apaez otra fina llinia mariellu naranxa.

Les femes son llixeramente mayores y ensin androconia. Tienen les nales anteriores de color pardu anaranxáu con un llurdiu escuru en E6 y les posteriores col diseñu meyor definíu. Pol aviesu son como les de los machos pero les venes de color pardu oliva; nales anteriores cola zona apical verdosa y posteriores coles bandes de color nacaráu y una fina llinia verdosa na zona submarxinal.

Esiste una variedá —A. paphia f. valesina— que ye pocu frecuente y qu'apaez n'Europa, en zones d'altu monte húmedu, que tien una coloración verde escura nel anversu de les sos nales y que puede tracamundiase con Argynnis pandora.

La gata ye cilíndrica, cola tiesta y el llombu negros o marrón escuro, con dos llinies marielles llonxitudinales y con «escayos» de color marrón acoloratáu. Los lladrales son marrón acoloratáu ornaos de llurdios marrón escuru.

A. pahia f. valesina fema.

Como nel restu d'especies de la so familia, los imagos presenten nes sos tiestes palpos llargos, güeyos separtaos y antenes bien xuníes na base y con una maza allargada. El primer par de pates ye más curtiu que los otros dos, acabando nun tarsu peludu qu'utilicen pa llimpiar les sos antenes. Los otros dos pares de pates terminen nunes uñes qu'utilicen pa garrase fuertemente a les plantes. L'abdome de les femes ye llixeramente más abuitáu y arrondáu qu'el de los machos.

Ciclu biolóxicu[editar | editar la fonte]

Ye una especie univoltina que remanez de xunu a finales d'agostu. Tres la cópula, la fema deposita los güevos en resquiebros de la corteza d'árboles caducifolios —umeru, faya, carbayu, fresnu, etc—. Enantes del iviernu, los guxanos ruempen y cómense'l güevu que los protexía, y abellúguense na mesma corteza, onde pasen la diapausa iverniza. En primavera abandonen el so abellugu y busquen la so planta nutricia, principalmente violetes, como la violeta de campu o la violeta común, y escasamente el frambuesu o otres zarzamores. Na segunda metá de la primavera formen les pupes que se cuelguen pámpana abaxo de los tarmos o peciolos de les fueyes de les plantes onde habiten. A principios del branu remanez l'adultu.

Distribución y hábitat[editar | editar la fonte]

Machu d'A. paphia sobre una umbelífera.
Fema d'Argynnis paphia

Distribúise per casi toa Europa, aportando pel este hasta la zona templada d'Asia y per el sur hasta'l Magreb.

Habita les escamplaes de montes caducifolios, llenderos, riberes de regueros y otros llugares onde crecen violetes y artos, dende zones baxes hasta los 1400 m d'altitú.

Los imagos aliméntense del néctar de los artos, cardos, y otres compuestes del xéneru Centaurea, d'umbelíferes y tamién de melaza de pulgones. Son potentes voladores, rabiones y nerviosos, y más móviles qu'otres caparines emparentaes, polo que pue vése-yos percima de la copa de los árboles a gran velocidá.

Sistemática[editar | editar la fonte]

Subespecies[editar | editar la fonte]

  • Argynnis paphia argyrophontes Oberthür, 1923 ; Suroeste de China.
  • Argynnis paphia argyrorrhytes Seitz, [1909] Norte del Cáucasu.
  • Argynnis paphia butleri Krulikovsky, 1909 ; Centru Europa.
  • Argynnis paphia delila Röber, 1896 ; Turquía.
  • Argynnis paphia dives (Oberthür, 1908) Arxelia.
  • Argynnis paphia formosicola Matsumura
  • Argynnis paphia geisha Hemming, 1934 ; Xapón.
  • Argynnis paphia masandarensis Gross et Ebert, 1975 ; Irán
  • Argynnis paphia megalegoria Fruhstorfer, 1907 ; China
  • Argynnis paphia neopaphia Fruhstorfer, 1907 ;
  • Argynnis paphia pusilla Wnukowsky, 1927 ; Noroeste de Siberia.
  • Argynnis paphia thalassata Fruhstorfer, 1909 ; Sur d'Europa.
  • Argynnis paphia tsushimana Fruhstorfer, 1906 ; Xapón
  • Argynnis paphia f. valesina (Esper, 1798); Montes d'Europa
  • Argynnis paphia virescens Nakahara, 1926.

Sinonimia[editar | editar la fonte]

A lo llargo de los años diversos autores denominaron a esta especie con distintos sinónimos:

  • Papilio paphia Linnaeus, 1758
  • Papilio valesina Esper, 1798
  • Papilio anargyra Staudinger, 1871
  • Argynnis immaculata Bellier, 1862
  • Argynnis paphia f. valesinides Fruhstorfer, 1907

Referencies[editar | editar la fonte]

  1. (en castellán) [1] Argynnis paphia
  2. (en castellán) http://www.yuribass.com/Taxofichas/Argynnis.pdf Claves de la especie Argynnis, Biodiversidad virtual
  3. (n'ingles) [2] Argynnis paphia England.
  4. N'alemán http://www.lepiforum.de/lepiwiki.pl?Argynnis_Paphia Argynnis paphia Imaxes

Bibliografía[editar | editar la fonte]

  • Aguado Martín, L. O. (2007). Aguado Martín, L. O. (2007). Las mariposas diurnas de Castilla y León (Lepidópteros ropalóceros) Especies, biología, distribución y conservación. Junta de Castilla y León. ISBN 978-84-9718-473-1.
  • Carter, D. J. y B. Hargreaves (2005). Guide des chenilles d'Europe (en francés). Delachaux et Niestlé. ISBN 2-603-00639-8.
  • Higgins, L. G. y N. D. Riley (1980). Higgins, L. G. y N. D. Riley (1980). Guía de campo de las mariposas de España y Europa. Omega. ISBN 84-282-0327-X.
  • Leraut, Patrice (2007). Leraut, Patrice (2007). Insectos de España y Europa. Lynx Edicions. ISBN 978-84-96553-27-9.
  • Linneo, C. (1758). Linneo, C. (1758). «Systema naturae» (latín). Consultáu'l 22 de enero de 2011.
  • Muséum national d'Histoire naturelle (2011). Muséum national d'Histoire naturelle (2011). «Argynnis paphia INPN, MNHN» (francés). Inventaire national du Patrimoine naturel. Consultáu'l 22 de xineru de 2011.
  • Savela, Markku (2011). Savela, Markku (2011). «Lepidoptera and some other life forms» (inglés). Consultáu'l 22 de xineru de 2011.