Argynnis pandora

De Wikipedia
Saltar a navegación Saltar a la gueta
Artículu revisáu
Commons-emblem-notice.svg
 
Pandora
Argynnis pandora LC0052.jpg
A. pandora hembra.
Clasificación científica
Reinu: Animalia
Filu: Arthropoda
Subfilu: Hexapoda
Clas: Insecta
Orde: Lepidoptera
Suborde: Glossata
Infraorde: Heteroneura
(ensin clasif.): Ditrysia
Superfamilia: Papilionoidea
Familia: Nymphalidae
Subfamilia: Argynninae
Tribu: Argynnini
Xéneru: Argynnis
Especie: A. pandora
Denis y Schiffermüller, 1775
Sinonimia
  • Papilio pandora Schiffermüller, 1775
  • Papilio maja Cramer, 1775
[editar datos en Wikidata]

Argynnis pandora ye una caparina grande, naranxa, de la familia Nymphalidae, descrita por Johann N. C. Michael Denis y Ignaz Schiffermüller en 1775.[1][2]

Puede tracamundiase con Argynnis paphia que ye una caparina bien asemeyada.

Descripción[editar | editar la fonte]

Son grandes, de 5,5 a 7 cm de valumbu, les femes mediu centímetru más que los machos. L'anversu o cara cimera de les nales son d'un tonu verde oliva con numberosos trazos y puntos negros. L'aviesu ye de color verde oru y colloráu de cadmiu con puntos negros.

L'anversu de les nales anteriores de los machos, d'ente 32 y 40 mm, ye verde oliva con tonos pálidos mariellos y naranxes nel ápiz, y coles venes marcaes en negru. En V2 y V3 apréciense les escames androconiales. Na celda estremen trés o cuatro marques. Na zona discal apaecen trazos y puntos formando una llinia irregular de doble combadura y que nun llega a Y1a. Tien pequeños puntos negros na zona submarxinal y una fina llinia negra paralela sobre la qu'apaecen pequeños llurdios negros de forma triangular na confluyencia coles venes.

Les posteriores, pel so anversu, apaecen dibuxaes con una banda blanca y siena turrada nel marxe internu y nel ángulu añal. Les zones basal y discal son del  mesmu color que la basal nes nales anteriores, dixebraes de la zona postdiscal por una llinia quebrada negra. Esta zona tien una serie de puntos negros gruesos ente E2 y E6. La zona submarxinal alluga una serie completa de llurdios negros, y, paralela a esta escontra'l marxe, una llinia gruesa sobre la qu'apaecen llurdios romboidales na confluencia coles venes.

L'aviesu, de tonos verde y colloráu, tien una fina llinia marxinal esterna ocre. Les nales anteriores son de color coloráu de cadmiu sacante la zona apical que ye verde oru, enllordiáu de puntos, que s'estiende pel marxe como una llinia hasta la base.

Güeyos separtaos y antenes terminaes en maces llargues.

Les posteriores son dafechu verdes con dos talos trazos ocre nes zones basal y discal. Na zona postdiscal hai trazos ocres que pueden tar coloriaos de blancu brillosu con 5 puntos de color blancu nácare.

Les femes son mayores, ensin androconia y con un llurdiu negru en E6, cerca del ápiz. Los llurdios y llinies de les nales posteriores más anches y meyor definíes. L'aviesu de les posteriores tienen un llurdiu blancu nacarada na zona basal y dos trazos blancos nacaraos y negros, unu na basal y otru na discal. Na postdiscal tien una banda blanca nacarada irregular, y na zona submarxinal una doble banda blanca y turquesa cobalto.

Les gates, que pueden algamar los 35 mm, son beis, peludos, con una tira negra chiscada de colloráu na parte cimera.

Como nel restu d'especies de la so familia, los imagos presenten nes sos tiestes palpos llargos, güeyos separtaos y antenes bien xuníes na base y con una maza allargada. El primer par de pates ye más curtiu que los otros dos, acabando nun tarsu peludu qu'usen pa llimpiar les sos antenes. Los otros dos pares de pates terminen nunes uñes pa garrase fuertemente a les plantes. L'abdome de les femes ye llixeramente más abuitáu y arrondáu qu'el de los machos.

Ciclu biolóxicu[editar | editar la fonte]

Ye una especie univoltina qu'esnala dende finales de mayu hasta finales de setiembre. Tres la cópula, que produzse n'agostu, la fema deposita ente 1400 y 2000 güevos na planta nutricia —principalmente violetes— o en vexetación próxima, mientres una quincena aproximao. Enantes del iviernu, les gates eclosionen y enviernen. En primavera abandonen el so abellugu y busquen la so planta nutricia principal, violeta común y violeta, pero tamién pueden alimentase de Violeta tricolor y Viola modesta. Na segunda metá de la primavera formen les crisálides y a principios del branu remanez l'adultu.

Distribución y hábitat[editar | editar la fonte]

Fema sobre un Onopordum acanthium.

Distribúise dende l'archipiélagu canariu y norte d'África, sur d'Europa y sur de Rusia hasta Irán y norte de Paquistán ya India. N'Europa alcuéntrase nel sur de Francia y la mariña atlántica hasta Morbihan, península ibérica, islles mediterránees, Italia, llargamente distribuyida nel este d'Europa, dende Grecia hasta Chequia y rara nel sur de los Alpes. N'África ye común nes islles Canaries, Marruecos, Arxelia y Túnez.

Puede atopase n'espacios abiertos, onde abonden plantes robustes y riques en néctar, como cardos (xéneros Carduus, Onopordum, Cirsium) y otres especies de compuestes, como Centaurea spp. Ye posible reparala en pinares, encinares, en montes de ribera, y tamién en xardinos, onde allega a libar plantes ríques en néctar. Son potentes voladores, rabiones y nerviosos, y más móviles qu'otres camparines emparentaes, polo que pue vése-yos percima de la copa de los árboles a gran velocidá.

Sistemática[editar | editar la fonte]

Subespecies[editar | editar la fonte]

  • Argynnis pandora pandora sur d'Europa hasta'l Cáucasu.
  • Argynnis pandora argentifasciata (Kotzsch, 1937) Cordal del Pamir.
  • Argynnis pandora pasargades (Fruhstorfer, 1908) Rusia.
  • Argynnis pandora seitzi (Fruhstorfer, 1908) Norte d'África.

Referencies bibliográfiques[editar | editar la fonte]

  1. (en castellán) [1] Argynnis pandora
  2. (n'inglés) [2] Argynnis pandora

Bibliografía[editar | editar la fonte]

  • Aguado Martín, O. L. (2007). Les camparines diurnes de Castiella y Lleón (Lepidópteros ropalóceros) Especies, bioloxía, distribución y caltenimientu I. Valladolid: Xunta de Castiella y Lleón. p. 1041. ISBN 978-84-9718-473-1. 
  • Alvar Ezquerra, J. (2000). Diccionariu Espasa. Mitoloxía universal. Espasa. p. 1031. ISBN 84-239-9460-0. 
  • Carter, D. J. y B. Hargreaves (2005). Guide des chenilles d'Europe (en francés). Delachaux et Niestlé. p. 312. ISBN 2-603-00639-8. 
  • Higgins, L. G. y N. D. Riley (1980). Guía de campu de les camparines d'España y Europa. Barcelona: Omega. p. 452. ISBN 84-282-0327-X. 
  • Leraut, Patrice (2007). Insectos d'España y Europa. Barcelona: Lynx Edicions. p. 528. ISBN 978-84-96553-27-9. 
  • Muséum national d'Histoire naturelle (2011). «Argynnis pandora INPN, MNHN». Inventaire national du Patrimoine naturel (en francés). Consultáu'l 22 de xineru de 2011. 
  • Savela, Markku (2011). «Lepidoptera and some other life forms» (n'inglés). Consultáu'l 22 de xineru de 2011.