Arcu de mediu puntu

De Wikipedia
Saltar a: navegación, buscar
Puerta d'Ishtar. Taba n'orixe na muria de Babilonia. Anguaño consérvase nel Muséu de Pérgamo de Berlín.

L'arcu de mediu puntu, n'arquitectura, ye un tipu d'arcu que tien el so intradós en forma de semicírculu. Fórmenlu pieces (nomaes doveles) en forma de cuña, que s'apoyen nos dos estremos del arcu y son suxetaos por una única piedra, la dovela central o clave. Tien un únicu centru allugáu esactamente nel centru del arcu y al nivel de la llinia d'imposta, que ye la parte decorativa que enllaza l'elementu sustentador vertical con la curva del arcu.

Ye l'elementu principal de l'arquitectura abovedada, porque la so prollongación forma la bóveda de cañón. Nos tiempos antiguos taba formáu por doveles feches d'adobe, lladriyu o piedra.

Historia[editar | editar la fonte]

Arcos peraltaos na fachada oriental de Santa María del Naranco, ún de los principales edificios del prerrománicu asturianu.

Esti arcu entamó a usase en Mesopotamia (arquitectura caldea) nel tercer mileniu edC. El so usu pasó a l'arquitectura etrusca, y d'esta a los romanos, que lu espardieron pola cuenca'l Mediterraneu. Ye característicu del arte romanu y de tolos estilos que deriven d'elli, como l'arquitectura románica, la renacentista y la barroca.

Variantes del arcu de mediu puntu[editar | editar la fonte]

Hai delles variantes a partir del arcu primitivu, construyíu con un únicu centru:

  • Arcu rebaxáu. Ye'l que tien una forma más aplanada, seya porque nun ye un semicírculu (arcu escarzanu) o porque tien el centru xeométricu perbaxu la llinia d'imposta (arcu carpanel). Dambos son característicos del góticu final y del entamu del Renacimientu.
  • Arcu peraltáu. Ye un arcu ampliáu a base de poner dovelas perbaxu la llinia d'imposta. Ye típicu del arte prerrománicu, y especialmente del prerrománicu asturianu.
  • Arcu parabólicu. Les sos doveles nun formen un semicírculu. Estos arcos foron emplegaos polos hitites, y recuperaos por Gaudí nel sieglu XIX.

Galería[editar | editar la fonte]

Comportamientu mecánicu[editar | editar la fonte]

Dende'l puntu de vista de la resistencia de los materiales, la xeometría y les carauterístiques d'esti tipu d'arcu fai que tolos sos puntos trabayen en compresión. Cada dovela ye una cuña comprimida poles sos cares llaterales.