Antonio Medio

De Wikipedia
Antonio Medio
Vida
Nacimientu Xixón1911
Nacionalidá España
Muerte 30 d'agostu de 1977 (65/66 años)
Estudios
Llingües falaes castellanu
Oficiu actor
Cambiar los datos en Wikidata

Antonio Medio (1911Xixón – 30 d'agostu de 1977) foi un actor y barítonu asturianu, conocíu como'l barítonu de la voz de fierro.

La mayor sonadía de Medio vino-y de la mano de la canción llírica, pero tamién participó en dos películes de la productora Asturias Films de Jesús Rubiera: Jandro y El puente de la paz. Tamién formó parte de la compañía teatral de Mary Carrillo. Depués de participar na revista Aprendiz de marido, con Lina Morgan y Quique Camoiras, tornó a Asturies onde trabayó xunto a Rosario Trabanco entamando festivales nes principales villes del Principáu.

Antonio Medio grabó una buena riestra de discos de zarzueles dando-y especial sonadía'l tema Las campanas de Madrid, romanza d' Un día de primavera del maestru Jesús Romo, con llibretu de los hermanos Fernández Shaw. Tamién formó parte del coro Los Farapepes del que formaba parte José González Cristóbal, El Presi[1].

L'escritor asturianu Luis Aurelio dedicó-y un sonetu:

D'esa canción del mar, que ye un mermullu
cuando duermen les foles en la playa
y la lluna, selín, les besa y calla
Poniendo mimu al cariciosu arrullu.
D'esa canción, que ye retu d'orgullu
cuando embiste'l cantil, y en blanca malla
engüelve, empuxa, estira, rompe, estalla
con un brío que sólo pue ser suyu,
ansí la voz de Antonio, que un bon día
deprendió la llición que-i ofrecía
el mar del so Xixón..., pregoneru,
dio, per uquier, tesoros del so arte;
y per ello, se sabe en cualquier parte
que Medio ye tenor de cuerpu enteru.[2]

Referencies[editar | editar la fonte]

  1. Buena parte de les notes d'esti artículu tan tomaes del folletu Antonio Medio. Actor y Barítonu Asturiano ... que hizo sona «Las Campanas de Madrid», del que ye autor Boni Ortíz pa la esposición que s'entamó nel Atenéu de La Calzada con motivu del centenariu del artista
  2. Sonetu de Luis Aurelio asoleyáu primeramente nel diariu El Comercio, de Xixón, nel llamáu Rincón del bable y más sero en llibru tituláu Xente de casa (1975) xunto con otres composiciones de Florina Alías