Amistá
| Amistá | |
|---|---|
| Rellación interpersonal | |
 | |
 |
L'amistá ye una rellación d’afectu ente persones, basada nel tratu y nel enfotu mutuu.[1] Ye una de les formes de rellación interpersonal más habituales y puede dase en distintes etapes de la vida y con distintos graos d’intensidá y duración.
L'amistá surde cuando les persones comparten intereses, sentimientos, esperiencies o un enfotu mutuu. Hai amistaes que nacen a los pocos minutos de conocese y otres que tarden años en consolidase.
El términu tamién s'usa pa describir vínculos afeutivos ente les persones y los animales. Por exemplu, ye frecuente considerar como amistá la rellación d'una persona col so perru, animal al que popularmente se conoz como «el meyor amigu del home». Tamién pueden dase vínculos sociales estrechos ente animales d'especies distintes.
En Don Quixote de la Mancha, Miguel de Cervantes describe la estrecha rellación ente Sancho Panza y el so ruciu al señalar que «tal yera l'amistá y bona fe qu'ente los dos guardábense».[2]
Iconoloxía
[editar | editar la fonte]L'amistá representóse a lo llargo de la historia por mediu de diverses figures alegóriques. Na tradición clásica aparecía como una figura col ropaxe abrocháu, la cabeza descubierta y el pechu abiertu hasta'l corazón, hacia'l que dirixía la mano derecha; cola izquierda abrazaba una llamera seca alredor de la que crecía una vide cargada d'uves.
Na iconografía romana representábase como una moza vistida cenciellamente con un ropaxe blancu y parte del cuerpu descubiertu. Llevaba una corona de mirto entretexida con flores de granáu y, sobre la frente, les pallabres «Iviernu» y «Branu». Na franxa de la so túnica apaecíen les inscripciones «La muerte» y «La vida», ente que cola mano derecha amosaba'l costáu abiertu hasta'l corazón cola inscripción «De cerca y de lloñe».
Tamién se representaba l'amistá colos pies desnudos, como símbolu de la disposición a soportar cualquier incomodidá en beneficiu d'un amigu. L'amistá heroica podía simbolizase per mediu de Teseo y Pirítoo dándose la mano y xurándose unión na eternidá.
La estatua de l'amistá atribuyida a Pablo Olivieri en Roma representa una muyer desnuda cola mano sobre'l pechu abiertu, como símbolu de la sinceridá. Otra representación frecuente amuésala con dos corazones encadenaos na mano y la frente coronada con flores de granáu, símbolos del ardor y de la constancia.
Cesare Ripa representó l'amistá pasaxera per mediu d'una moza coronada de flores, símbolu de l'adulación, con un ñeru de golondrines y dellos páxaros esnalando alredor de la cabeza.[3]
Na cultura popular
[editar | editar la fonte]Les rellaciones d'amistá representáronse de manera habitual na lliteratura, el cine y la televisión, hasta'l puntu de ser unu de los vínculos más frecuentes ente los personaxes de les obres de ficción.
Don Quixote y Sancho Panza, Sherlock Holmes y Watson, los protagonistes de Los trés mosqueteros, Butch Cassidy and the Sundance Kid, C-3PO y R2-D2 en Star Wars, The Three Stooges, Friends o Mary and Max son exemplos de distintos tipos d'amistá representaos na lliteratura, el cine y la televisión.
Na Biblia
[editar | editar la fonte]Nes Escritures Sagraes recuéyense diverses rellaciones d'amistá, como les de Rut y Noemí, David y Jonatán o Pablo y Bernabé.
Filosofía
[editar | editar la fonte]Aristóteles, nel so tratáu Ética nicomáquea, dedica los llibros VIII y IX al estudiu de l'amistá, la so naturaleza, les sos formes y la so rellación cola virtú y la felicidá.
Ver tamién
[editar | editar la fonte]Referencies
[editar | editar la fonte]- ↑ Academia de la Llingua Asturiana (ed.): «amistá». Diccionariu de la Llingua Asturiana. Consultáu'l 21 d’agostu de 2026.
- ↑ Cervantes, Miguel de. «[Don) Quixote de La Mancha Segunda Parte - Cervantes - Capítulu 34». Consultáu'l 17 de payares de 2015.
- ↑ Google Books. «[Diccionario) universal de mitoloxía ó de la fábula - B. G. P. - Google Books». Consultáu'l 19 de payares de 2015.
Enllaces esternos
[editar | editar la fonte]
Wikimedia Commons acueye conteníu multimedia sobre Amistá.
Wikiquote tien frases célebres suyes o que faen referencia a Amistá.
Datos: Q491- Multimedia: Friendship
Cites famoses: Amistad