Amigos del bable

De Wikipedia
Saltar a navegación Saltar a la gueta
Amigos del bable
Direición España
Cambiar los datos en Wikidata

Amigos del Bable (nun confundir cola mui posterior y estremada Amigos de los bables) foi una asociación asturiana nacida en 1969 en Sama, Llangréu. Foi entamada por José León Delestal, Pedro Mario Herrero y Manuel Pilastres. Foi León Delestal na so primer conferencia de presentación en sociedá de l'asociación titulada En defensa del Bable, onde s'anunciaba'l propósitu de llanzar en plazu curtiu una campaña permanente en favor de la fala de los ástures al traviés d'una revitalización de la so poesía llírica y humorística.

En setiembre d'esi mesmu añu, por cuenta de la Feria Nacional del Llibru, n'Uviéu, proyecten la realización del Día del Bable, onde se pronuncia una conferencia sobre dicha llingua. Adulces, mientres los años socesivos, van dir pronunciando conferencies asemeyaes per estremaos conceyos, ente les que destaca la celebrada nel Salón de los Espeyos del Centru Asturianu de Madrid col títulu Tres siglos de Poesía Bable.

Más tarde, entra a formar parte de l'asociación l'escritor y periodista Llorienzu Novo Mier, y favorezse la edición y grabación del discu d' Andalucía y Asturies de Diego Terrero y Teodoro Cuesta en 1970, siendo'l primeru d'otros llanzamientos discográficos posteriores. Fueron en total editaos 13 discos non venales, tamién de tonada, hasta 1971.

En 1975 l'asociación convoca la I Andecha de la poesía Bable, dirixida a los nuevos poetes en dicha llingua, y el premiu recayó na autora Florina Alías. Paralelamente, celebráronse en dellos conceyos d'Asturies la Selmana de la poesía Bable, con charres y conferencies de distintes personalidaes allegaes a la llingua d'Asturies.

Darréu, na II Andecha y III Andecha llogren los premios l'autor de monólogo José Campo Castañón (1976) y el dúu Cany González y Ángel Meana (1977) intérpretes de versión musical de la poesía de Constantino Cabal "Ye pequeñina y galana", yá que mientres la "III Andecha de la poesía en bable" homenaxeabase a esi autor, realizando versiones musicadas del so llibru L'Alborá de los Malvises.

Dende l'añu 1975 l'Asociación instituyó la concesión de la Xana del Bable destinada a reconocer y galardonar el llabor de poetas, escritores, filólogos, investigadores, entidaes,... etc rellacionaes con Asturies, la so llingua, les sos costumes, tradiciones y folclore, faciéndose entrega d'elles con ocasión de les Xustes poétiques del Bable, nes que s'encuadren les Andeches, ente otres personalidaes a Emilio Alarcos Llorach, Institutu d'Estudios Asturianos, Gran Enciclopedia Asturiana, Llorienzu Novo Mier, Jesús Neira, Radio Uviéu, Antonio García Oliveros, Alfonso Camín o Conceyu Bable, que refugó'l premiu na gala.

Ente los sos proyeutos taba la creación d'una revista de periodicidad trimestral escrita íntegramente en llingua asturiana. Sicasí, por cuenta de la irrupción del Surdimientu y l'autonomía d'Asturies, l'asociación foi sumiendo adulces, sustituyendo dalgunes de les sos actividaes por Conceyu Bable, l'Academia de la Llingua Asturiana y el Gobiernu del Principáu d'Asturies, ente otres entidaes.