Alzir

De Wikipedia
Saltar a navegación Saltar a la gueta
Alzir
Alzir
Constelación Xéminis
Ascensión reuta α 06h 45min 17,43s
Declinación δ +12º 53’ 45,8’’
Distancia 57 años-lluz
Magnitú visual +3,35
Magnitú absoluta +2,13
Lluminosidá 11,1 soles
Temperatura 6460 K
Masa 1,5 - 1,6 soles
Radiu 2,7 soles
Tipu espectral F5IV
Velocidá radial +25,3 km/s

Alzir o Alzirr ye'l nome de la estrella ξ Geminorum (ξ Gem / 31 Geminorum) na constelación de Xéminis. De magnitú aparente +3,35, ye la octava estrella más brillosa de la so constelación. El so nome provién del árabe y significa «el botón».

Asitiada a 57 años lluz del Sistema Solar, Alzir ye una subxigante mariella —enantes clasificada como xigante— de tipu espectral F5IV. Ta rematando, si nun lu hai fechu yá, la fusión de hidróxenu nel so nucleu. Con una edá envalorada de 2500 millones d'años, ta evolucionando escontra una xigante colorada muncho más lluminosa. Anguaño ye 11,1 vegaes más lluminosa qu'el Sol, siendo'l so radiu 2,7 vegaes más grande qu'el radiu solar. Ye una variable Delta Scuti con múltiples periodos, bazcuyando'l so rellumu ente magnitú +3,33 y +3,42.

Alzir alcuéntrase nun puntu críticu na secuencia espectral»; les estrelles más calientes lleven a cabu la fusión nuclear al traviés del ciclu CNO, distintu a la cadena protón-protón que tien llugar nel Sol, y roten muncho más apriesa que la nuesa estrella. La velocidá de rotación de Alzir, de siquier 68 km/s, ye 34 vegaes mayor que nel Sol, con un periodu de rotación inferior a dos díes. Esta rápida rotación, xunida a la esistencia d'una capa esterna n'estáu de conveición, favorecen un ciertu grau d'actividá magnética y emisión de rayos X, dando llugar a una corona esterior de dos niveles con distintes temperatures.

Referencies[editar | editar la fonte]