Alya

De Wikipedia
Saltar a navegación Saltar a la gueta
Alya
Alya (θ1Ser/θ2Ser)
Constelación Serpens
Ascensión reuta α 18h 56min 13,2/14,6s
Declinación δ +04º 12’ 13/08’’
Distancia 132 ± 9 años lluz
Magnitú visual +4,62 / +4,98
Magnitú absoluta +1,59 / +1,77
Lluminosidá 18 / 13 soles
Temperatura 8200 / 8200 K (aprox)
Radiu 2 / 2 soles
Tipu espectral A5V / A5Vn
Velocidá radial -46,0 / -52,7 km/s

Alya o Alga (θ Ser / θ Serpentis / 63 Serpentis) ye una estrella na constelación de Serpens, asitiada en Serpens Cauda, la cola de la culiebra. El so nome, proveniente del árabe al-alya, significa «la culiebra», anque según otres fontes provién d'una pallabra nesta mesma llingua que se refier a «la cola de la oveya» y que nada tendría que ver cola constelación actual. Coles mesmes, en China yera conocida como Sen, unu de los sos distritos.[1]

Distante 132 años lluz del Sistema Solar, Alya ye una estrella binaria que les sos componentes (θ1 Serpentis y θ2 Serpentis), separaes visualmente 22 segundos d'arcu, pueden resolvese con un pequeñu telescopiu. Dambes son estrelles blanques de tipu espectral A5V[2][3] con magnitúes aparentes +4,62 y +4,98. La temperatura superficial de dambes ye de 8200 K aproximao[4] y los sos lluminosidáes respeutives equivalen a 18 y 13 vegaes la lluminosidá solar.[4] A diferencia del Sol tienen altes velocidaes de rotación, siquier 143 km/s pa θ1 Serpentis y 196 km/s pa θ2 Serpentis —casi 100 vegaes mayor que la del Sol—. Atópense dixebraes ente sí 900 UA a lo menos, lo qu'implica un periodu orbital de siquier 14.000 años,[4] polo que nun se pudo apreciar nengún movimientu orbital.

Referencies[editar | editar la fonte]

  1. Allen, Richard Hinckley (1889). «Serpens», en Courier Dover Publications: Star Names — Their Lore and Meaning (en inglés), 563. ISBN 0-486-21079-0. Consultáu'l 0 de xineru de 2011.
  2. HR 7141 -- Star in double system (SIMBAD)
  3. HR 7142 -- Star in double system (SIMBAD)
  4. 4,0 4,1 4,2 Alya (Stars, Jim Kaler)