Algaire (grupu folk)

Algaire
	; Componentes del grupu Algaire
Datos xenerales
Orixe	Asturies y Mieres
Información artística
Xéneru(os)	Folk
Periodu d'actividá	2020 - n'activu
Miembros
	Iratxe Espina (voz y percusiones); Carla Miranda (voz y percusiones); Loreto Suárez (voz y percusiones); Juan Yagüe (guitarres)
	[editar datos en Wikidata]

Algaire ye un grupu de música asturiana, integráu poles cantantes y pandereteres Iratxe Espina, Carla Miranda y Loreto Suárez, y el guitarrista Juan Yagüe.

Historia

La formación ñaz nel añu 2020, como un proyeutu de voz y percusión tradicional. Les diferentes procedencies musicales de los sos integrantes, dieron llueu pasu a la busca de nueves sonoridaes y mezcla d'estilos.

El so repertoriu ta formáu por reellaboraciones de cantares tradicionales y temes de nueva composición, onde conviven tradición y modernidá, dedicando un ampliu númberu de cantares al baille.

Nos primeros años de la formación, participen nel Festival "Al Resve" (Xixón), nel "Ochobre Folk" y la "Folixa na Primavera" (Mieres), entre otros. Tres espublizar el so primer discu, baxo'l títulu Coral y Maera (2022), entamen una xira a nivel rexonal que los lleva a tocar en dellos conceyos d'Asturies, con gran aceutación del públicu.

N'agostu d'esi mesmu añu, Algaire ye invitáu a participar nel Festival Intercélticu de Lorient, con motivu del añu d'Asturies. Nel marcu del festival, participen nel Troféu Loïc Raison pa bandes moces, algamando'l primer premiu y convirtiéndose, d'esta miente, nel primer grupu asturianu en facese col premiu.

El grupu zarra'l 2022 alzándose col Premiu Camaretá al meyor cantar n'asturianu, concedíu pola Conseyería de Cultura, Política Llingüística y Turismu, pol tema Coral y Maera con lletra de Luis Ángel Fernández.

Discografía

Coral y Maera ye'l nome del primer trabayu discográficu d'Algaire. Foi grabáu y masterizáu en Tutu Estudios, por parte de Sergio Díaz y Sergio Rodríguez, na seronda del 2021. Inclúi 12 cantares ente los que s'atopen temes tradicionales como la xota y la muñeira d'El Corralín, un cantar de siega de Trabáu, xota y muñeira de Villarmeirín o un cantar de boda del conceyu de Grau. Además, hai temes de nueva composición, siguiendo la métrica y los ritmos de baille más populares na tradición asturiana, ente los que cabe destacar la muñeira Llume.

Nel discu collaboraron artistes como Guadi Galego, Xabier Díaz y Xosé Antón Ambás. Otros músicos que tamién participaron na grabación foron Juanjo Díaz (percusiones), Juan Carlos Vega (baxu eléctricu), Richard García (teclaos), José Manuel Tejedor (flauta), David Varela (curdión) y Fruela 757 (programaciones).

Coral y Maera

Videoclips

Nel ámbitu del audiovisual, Algaire apuesta dende l'entamu pola grabación de videoclips como una forma de creación artística paralela al trabayu discográficu. El 8 de marzu del 2022 espublicen el videu del Rondó FEM, un tema ocitanu con lletra de Laura Marcos y de calter reivindicativu, escontra les violencies machistes. A finales d'esi mesmu añu, collaboren col tríu bretón Ahez na muñeira Llume, tornando una de les estrofes de Luis Ángel Fernández al bretón. En mayu del 2023, y como parte del Premiu Camaretá, Algaire saca'l videoclip de Coral y Maera.

El trabayu audiovisual d'Algaire complétase cola publicación anual d'un villancicu, que ya pue considerase como una tradición del grupu.