Alfonso Iglesias
Alfonso Iglesias | |
|---|---|
 | |
| Vida | |
| Nacimientu | Navia, 10 de xineru de 1910 |
| Nacionalidá |
 España |
| Muerte | Uviéu, 23 de febreru de 1988[1] (78 años) |
| Estudios | |
| Llingües falaes | castellanu |
| Oficiu | historietista, pintor |
 | |
Alfonso Iglesias López de Vívigo, (10 de xineru de 1910, Navia – 23 de febreru de 1988, Uviéu), conocíu como Alfonso, foi un dibuxante y pintor asturianu, creador de los personaxes de Pinón, Telva y Pinín. Como acuarelista, realizó varies esposiciones n'Asturies, Lleón, Madrid y Méxicu.
Aparte del so llabor como artista plásticu , ye tamién autor d'una obra divulgativa sobre los horros (El libro de los hórreos, 1975).
Nació'l 10 de xineru de 1910 en Navia. Entamó estudios d'Arquiteutura, que nun acabó y, más tarde, llicencióse en Ciencies na Universidá d'Uviéu, anque abandonó la carrera pa dedicase al humor gráfico a partir de 1931. Los sos primeros dibuxos apaecieron nos diarios Región y La Voz de Asturias y nel selmanariu Carbón.
Tres la Guerra Civil collaboró en La Nueva España, onde creó en 1943 los personaxes de Pinón, Telva y Pinín, que tuvieron gran sonadía na Asturies de la Posguerra. Les sos histories axuntáronse en 1944 nun álbum tituláu Aventuras de Pinín, que de Pinón ye sobrín. Mas tarde, los mesmos personaxes llegaron a protagonizar cartelos, series de cromos, y tuvieron adautaciones al teatru (Pinón y Telva), a la narrativa ( El Asthur-Kong y Pinín, 1979) y al cine (Las Aventuras de Pinín y sus amigos, 1979).
Otres creaciones d'Alfonso pa La Nueva España foron el vaqueru Pim Coll'Otto y Rufina, una moza de Proacina.
Alfonso Iglesias foi ún de los impulsores de la Sociedá Uvieína de Festexos (Sociedad Ovetense de Festejos - SOF), a la que-y presentó en 1950 el proyeutu de celebrar el día d'América n'Asturies. Convirtióse en presidente de la organización d'esta fiesta hasta 1958, añu en que se treslladó a Madrid.
En Madrid collaboró como dibuxante en periódicos como El Alcázar, Arriba o Pueblo y na revista femenina Ama, pa la que creó la serie Amuca. A partir de 1962 entamó a trabayar en Televisión Española como dibuxante de programes pa neños, culturales y deportivos. Más tarde publicó nueves aventures de Pinín en Gente Menuda, el suplementu infantil del diariu ABC.
En 1982 volvió a Asturies, y publicó los últimos chistes de Pinón y Telva en La Nueva España. En setiembre de 1986, él mesmu encargóse de descubrir un bustu que se–y llevantó por soscripción popular nel campu San Francisco. Añu y mediu más tarde, el 23 de febreru de 1988, morría n'Uviéu.
Referencies
[editar | editar la fonte]- ↑ Afirmao en: Diccionario biográfico español. Identificador DBE: 30966/alfonso-iglesias-lopez-de-vivigo. Apaez como: Alfonso. Alfonso Iglesias López de Vívigo. Data de consulta: 9 ochobre 2017. Editorial: Real Academia de la Historia. Llingua de la obra o nome: castellanu. Data d'espublización: 2011.
