Alevia

De Wikipedia
Saltar a navegación Saltar a la gueta

Alevia ye una parroquia del conceyu asturianu de Peñamellera Baxa. Ocupa la fastera más noroccidental del conceyu (ye la única parroquia que llenda col conceyu de Llanes) y tien, dende que nel 1991 se separtara d'ella Sieḥu, 4,65 km² d'estensión. Comprende namái que'l pueblu d'Alevia, que tien una población (INE, 2011) de 60 habitantes, que se dediquen principalmente a la ganadería. Nel monte d'Alevia s'alcuentren los restos de la nomada Mina del Pilar, una esplotación de la que se sacarron fierro y manganesu a lo menos dende'l sieglu XVI hasta los años 70 del sieglu pasáu.

El pueblu ta asitiáu a unos 240 m sobre'l nivel del mar, na lladera meridional del picu Pedreḥita. Pa llegar a él hai que coyer, en Sieḥo, la carretera llocal PB-2, estrecha pero con bon firme, que muerre nel pueblu. Nél destaquen les siguientes edificaciones:

  • La ilesia parroquial, dedicada a San Xuan Bautista, con restos baxomedievales (ss.XIV-XV) nel interior anque mui reformada nos sieglos XVIII-XX.
  • La capiella San Antonio, asitiada a la entrada'l pueblu. Construyida, según dellos autores,nel sieglu XVII, tien cabo d'ella una torre con reló y campanariu, llevantada -con perres de los indianos y l'esfuerciu de los vecinos- nel sieglu XX. Entamose a facer na década d'1920, anque nun pudo rematase hasta la d'1960, y ye ún de los trés únicos edificios d'esti tipu -xunta la torre la ilesia parroquial de Taramundi y la que hai na antigua sé de les escueles marítimes d'As Figueiras (Castropol)- que se ficienon n'Asturies con dineru de los americanos. A los pies de la torre hai un mirador con unes vistes perguapes sobro'l valle de Peñamellera.
  • La Quinta d'Arriba, encargada pol indianu José Lezama Lima (llamáu Don Pepe polos vecinos) al arquitectu catalán Marcelino Coquillat, que-y proyeutó una casa con trés plantes y torre d'estilu rexonalista con dellos toques modernistes.

Hai, amás d'ello, delles cases de tipoloxía tradicional, dos establecimientos de turismu rural, chigre y bolera. Esta foi construyida tamién con dineru indianu: el de Ramón Bardales, que la mandó facer en 1891.

Ye un pueblu de vida tranquila, que namái s'altera nes fiestes, que se celebren pa honrar a San Antonio (13 de xunu), San Xuan (24 de xunu) y Nuestra Señora del Rosario (30 de setiembre).

Enllaces esternos[editar | editar la fonte]

Flag of Asturias (indoor).svg Parroquies d'El Valle Baḥu de Peñamellera Flag of penamellerabaja.png
Abándames | Alevia | Buelles | Cuñaba | Merodiu | Panes | Sieḥu | Tobes