Alderique:Tabla periódica

De Wikipedia
Saltar a navegación Saltar a la gueta

Tenemos la tendencia n'asturianu a que cuando una palabra finaliza en -o en castellanu escribila con una -u final. Nel casu de la tabla periódica vemos qu'ésta foi la solución escoyida. Evidentemente la mayoría de los elementos d'esta tabla nun yeren conocíos, y polo tanto nomaos, polos falantes tradicionales de la nuestra llingua. Pero un exemplu clásicu cuando se fala del neutru de materia tenémoslu col Fierro/Fierru. Cuando nos referimos a una cantidá indeterminada empleamos la palabra Fierro, y si nos referimos a un cachu d'esti metal ye cuando dicimos Fierru. Creo que la solución pa la tabla periódica habría ser la d'emplear el neutru de materia, non sólo pal casu del Fierro sinon, por estensión, pa tolos otros elementos de la mesma que finalicen en -o. Zato-ino 05:51, 12 xunu 2006 (UTC).

Nel DALA estrémase fierro (metal de símbolu fe ) de fierru (oxetu fechu de fierro). Sicasí, pal restu de los elementos (plomu, oru, hidróxenu ...) apaez namás que la terminación -u. A min personalmente pásame como a ti, suénenme meyor a la oreya les formes plomo, oro. El problema ye que nun les recueye la normativa.

Yo, en principiu, soi partidariu de que se dea prioridá a les formes del diccionariu, salvo casu d'error manifiestu o qu'hebia un usu munchu más espardíu y atestáu por escritores solventes. Nun sé si ye esactamente'l casu que vien darréu, pero cópiote lo que die Esther Prieto na so gramática: "Munchos escritores terminen en -o [una] riestra de sustantivos por entender que son non cuntables y qu'asina los pronuncien abondos falantes: oro, vino, frío, tabaco, ganao, barro."

Toi d'alcuerdu que la normativa de l'Academia igual merez que se -y faiga nuna revisión en dellos puntos, y ésti ye ún de los principales. Pero de momentu la normativa ye ésta, y paezma que val más respetala, anque paezca incoherente n'ocasiones. Motán 11:13, 12 xunu 2006 (UTC)

Evidentemente tovía hai munchos campos nos qu'afondar nel conocimientu de la llingua y el de la tabla periódica y el neutru de materia ye unu d'ellos. Esperemos qu'esi estudiu se faiga ceo y que si l'Academia tien que correxir la norma lo faiga. Zato-ino 13:39, 12 xunu 2006 (UTC)