Alderique:Seis

• "Seyes" ye correutu asturianu, por supuesto. Pero escoyelu en cuenta de "seis" paezme una eleición arcaizante.

El Diccionario General de la Lengua Asturiana diz que "seis" ye d'usu xeneral, mentanto "seyes" ta recoyíu solamente en Cabrales, Cabranes, Colunga y Parres. Y abúltame que ta en desusu en comparanza con seis neses mesmes zones, pero ye una opinión. Con esto nun te digo que nun se pueda emplegar esti términu na Uiquipedia, pero facer tresllau talu...

Amás l'Academia tamién prefier "seis". Ta claro que si l'estandar opta por una variante, ye por seis.--CON Placido 17:56, 28 xunetu 2011 (UTC)

• • Toi completamente d'acuerdu contigo. El problema de too esto ye que hai que terminar presentando-ylo a la sociedá asturiana qu'acabará viendo nello ocurrencies (por más que se pueda xustificar mínimamente). El papel (o la pantalla del ordenador) aguántalo too, pero depués estes coses tienen qu'algamar oralidá y veremos quién diz seyes cuando lu entrevisten na tv o na radio, o cuando fale colos amigos y amigues nun chigre. --Zato-ino 05:47, 29 xunetu 2011 (UTC)

• • Pa X. LL. G. Árias, la mantenencia de diptongos decrecientes nes fales centro-orientales ye por cuenta del influxu castellanizante, y afita que nos cartafueyos medievales los resultaos amuesen una reducción del diptongu /ei/ > /e/: Regis > Reys > "Re"/"Res" (Sobrescobiu). El refugáu Junquera conseña tamién "ses". esta tendencia al desfaimientu del diptongu na faza centro-oriental dáse tamién nos neoloxismos; "jersé".

De fechu, Arias encamienta la normalización de "hué" / "güe" < huey < *hueye < hodie (y los sos derivaos "desagüé", "cuantagüé") en llugar de güei. Del mesmu mou que tiense normalizao Bué en cuenta de Buei o Buöi. Sin embargu nun se conseña "*llé" < "lley".

Otru camín ye la mantenencia de la iod /egi/ > /eye/: Regis > "Reye"/"Reyes" (Ribesella), "Seyes".

Salú.