Alderique:Gaita

¿Almítese una suxerencia? Sedría recomendable dexar de facer refritos d'antigües publicaciones como'l vieyu catálogu del Museu de la Gaita, dómina Rafael Meré, o d'artículos gallegos con poca sustancia. (Por exemplu, ¿por qué remitir a la Wikipedia en gallegu pa escribir daqué sobre la gaita gallega, cuando nesa mesma enciclopedia versión gallegu nun hai link dengunu pal artículu sobre la gaita asturiana na versión n'asturianu?)

Teneis dalgún artículu na versión n'español, mayormente escritu por mi. Tamién podeis consultar los dos llibros recién espublizaos: "La gaita asturiana. Xornaes d'estudiu" y "¡Xa chegan os Quirotelvos!", onde se fai un completu repasu a la polémica sobre l'usu de la gaita gallega nel "Oeste d'Asturies" (pallabres del artículu presente, onde se da a entender que s'utiliza la gallega pero non l'asturiana: ¿con qué toca la Banda de Gaitas Os Castros, de Taramundi, a un pasu de la raya con Galicia?).

Aparte d'ello, nun pueu tar más en desalcuerdu cola clasificación que fai esti artículu de la Wikipedia n'asturianu nos grupos "gaites atlántiques" y "gaites mediterránies". Esa clasificación, tal como tá fecha, ye meramente xeográfica, pero nun tien pa nada en cuenta les carauterístiques morfolóxiques y sonores de los instrumentos. Por exemplu, l'instrumentu que fegura na llista de les atlántiques como "gaita sueca", llamada Dalarna Sackpipa, tien unes carauterístiques que la faen dafechu distinta de les asturianes, gallegues o escoceses. Los nuestros punteros tienen taladru cónicu, doble llingüeta (payuela) y sonoridá más o menos potente, siendo lo que n'organoloxía llamamos "oboes". Por contra, el punteru de la gaita sueca tien taladru cilíndricu, llingüeta cenciella (payón) y sonoridá más velada, siendo organolóxicamente un clarinete. Y nin siquier eso sedría abondo pa incluyila nes gaites mediterránies.

Por razones asemeyaes tampoco tengo nada claro que tenga de metese una gaita como la que l'artículu llama "gaita francesa" nel grupu de les mediterránies, gaita que por ciertu tien un nome propiu menos xenéricu: en Francia llámenla "Bourbonnaise", "Grande Bourbonnaise" o mesmo "Cornemuse du Centre".

Más grave me paez incluyir la dulzaina como un tipu de gaita, al marxe de considerala atlántica, mediterránia o lo que seya. Gaita = aerófonu con depósitu ausiliar d'aire. ¿Onde tá'l depósitu, cuando se toca direutamente cola boca? ¿Y en qué se diferencia una dulzaina castellana, navarra o aragonesa d'otra valenciana, marroquí, o tailandesa? Toes son oboes, soplaos cola boca, con doble caña y taladru cónicu.

Si l'alboka vasca ye duldoso considerala tamién gaita (podría entendese que'l depósitu ausiliar d'aire ye la propia boca del que toca), tampoco veo la razón pa incluyila como "gaita atlántica". Como nel casu anterior, nun veo mayores diferencies ente una alboka y los punteros dobles de gaites griegues o mores (tubos paralelos de caña, taladru cilíndricu, llingüeta de payón y non payuela...)

Y muncho menos toi d'alcuerdu cola inclusión del instrumentu llamau "gaita charra". ¡Pero hom, si nin siquiera tien llingüeta, ye una flauta de bisel con tres furacos, de la mesma familia que'l txistu, la flauta rociera de Huelva, el galoubet d'Occitania o'l flaviol catalán!

Un saludu candial y a afinar un pocu más... ;)

Carlos, constructor de gaites.

www.gaitaasturiana.com

Coimes, pues anímate y collabora ¿non? saludos Jesusito 08:03, 5 xunu 2006 (UTC)

Ay, fíu, si yo te cuntara tolo que tengo ente manes... :)

Peme que'l tiempu preciosu que hechaste escribiendo nas discusión, podries usalo iguando l'articulo. (ten en cuenta que esto ye un trabayu colaborativo)--Mikel (mensaxes) 10:20, 5 xunu 2006 (UTC)

Como diz Mikel, nun dibes echar muncho más tiempu n' iguar l'artículu que lo que tardasti en facer les puntualizaciones anteriores. En cualquier casu gracies por faceles, puen valir p'ameyorar l'artículu si lu quier rescribir daquién. Podía poneme a ello yo o cualquier otru de los que collaboren equí davezu, pero el problema ye que nun tengo, nin de llueñe, la cuarta parte de los tos conocimientos nesti tema. ¿Quién meyor qu'un constructor de gaites pa escribir un artículu sobre esi instrumentu? Cuanto y más que tamién demuestres un bon dominiu de la llingua. A ver si t'animes...

Respectu a los enllaces de la wiki en gallego, ta bono d'iguar: de la mesma manera que nun se precisa ser del Principáu pa collaborar na wiki n'asturiano, nun fai falta ser gallegu pa ameyorar los artículos d'esa versión. Saludos. Usuariu:Motán