Adhara

De Wikipedia
Saltar a navegación Saltar a la gueta
Adhara
Adhara
Constelación Canis Major
Ascensión reuta α 06h 58m 37,55s
Declinación δ -28° 58’ 19,5’’
Distancia 405 años lluz
Magnitú visual +1,51
Magnitú absoluta -4,10
Lluminosidá 22.300 soles (bolométrica)
Temperatura 21.900 K
Masa 11 - 12 soles
Diámetru 10,4 soles
Tipu espectral B2Iab
Velocidá radial 27,3 km/s

Adhara (Épsilon Canis Majoris / ε CMa / 21 Canis Majoris) ye una estrella na constelación Canis Major de magnitú aparente +1,51.[1] Tien la designación Bayer «Épsilon», quinta lletra del alfabetu griegu, a pesar de ser la segunda más brillosa na so constelación y una de les más brilloses del cielu nocherniegu.

Nome[editar | editar la fonte]

El nome tradicional de Adhara —dacuando escritu Adara o Adharaz[2] provién de la pallabra árabe عذارى ‘aðāra’, «virxes». El so principal significáu ye «flor d'azahar», d'ende la so derivación a «virxes» por ser la flor representante de la pureza.

Ye conocida en China como 弧矢七, «la séptima estrella del arcu y la flecha».

Carauterístiques físiques[editar | editar la fonte]

Adhara ye una estrella binaria distante 405 años lluz del Sol. La estrella principal ye una superxigante azul o xigante lluminosa[3] de tipu espectral B2Iab.[1][2]Tien una temperatura superficial de 21.900 K y tien una lluminosidá (radiación total) equivalente a 22.300 vegaes la del Sol. Si tuviera a la mesma alloña que Siriu (α Canis Majoris) tendría una magnitú aparente de -7 y veríase 7 vegaes más brillosa que'l planeta Venus. Esta estrella ye tamién unu de los emisores conocíos de rayos ultravioleta más brillosos del cielu. La midida del so diámetru angular conduz a un radiu de 10,4 vegaes el radiu solar. Los sos parámetros de lluminosidá y temperatura dexen envalorar la so masa ente 11 y 12 vegaes la masa del Sol, lo que probablemente seya abondu por que nel futuru esplote como supernova.[3]

La componente secundaria del sistema de Adhara, d'octava o novena magnitú, probablemente ye una estrella na llende ente los tipos A y F. Visualmente a 7 segundos d'arcu de Adhara A, la separación real con ella ye de, siquier, 900 unidaes astronómiques, siendo el so periodu orbital cimeru a los 7500 años.[3] A pesar de la distancia angular relativamente amplia que les dixebra, les componentes namái pueden ser resueltes per aciu telescopiu, una y bones la estrella principal ye unes 250 vegaes más brillosa que la so compañera.

Fai unos 4.700.000 años, Adhara alcuéntrase a namái 34 años lluz del Sistema Solar, lo que la convertía na estrella más brillosa del cielu nocherniegu con una magnitú aparente de -3,99. Nenguna otra estrella foi tan brillosa de magar, nin nenguna va algamar de nuevu esti rellumu mientres, siquier, los próximos 5 millones d'años.[4]

Ver tamién[editar | editar la fonte]

Referencies[editar | editar la fonte]

  1. 1,0 1,1 Adara (SIMBAD)
  2. 2,0 2,1 Adharaz (The Bright Star Catalogue)
  3. 3,0 3,1 3,2 Adhara (Stars, Jim Kaler)
  4. Sky and Telescope, April 1998