Pepa Osorio

Pepa Osorio
Vida
Nacimientu	6 d'agostu de 1923
Nacionalidá	España
Muerte	27 de xunetu de 2005 (81 años)
Estudios
Llingües falaes	castellanu
Oficiu	pintora

Pepa Osorio (6 d'agostu de 1923 – 27 de xunetu de 2005) foi una pintora asturiana.

Biografía

Pepa Osorio foi alumna na posguerra del pintor xixonés Eugenio Tamayo, foi una artista d'amplia trayeutoria que fizo un buen númberu d'esposiciones individuales, faciendo un llargu recorríu per diversos caminos espresivos. Formóse na tradición del paisaxe asturianu evolucinando más sero hacia un marcáu espresionismu de motivos relixosos primeramente y sociales depués, pasando per un españíu colorista de los años setenta.

Profesionalmente retoma la so actividá a finales de los cincuenta, pintando paisaxes al oleu influyenciada polos paisaxistes asturianos, pa pasar a retratos infantiles, dalgún desnudu, dalgún tema sobre Xixón (La rula) y asuntos relixosos.

Dende mediaos de los años sesenta la pintora reflexona sobre los individuos que soporten unes condiciones vitales difíciles provocaes por una sociedad inxusta. Pinta una serie d'obres referíes a trabayadores manuales: campesinos, pecadores y mineros, acentuando'l dramatismu de los contenidos representaos y optando por una plástica decididamente espresionista. Cola serie Testimonios de nuestro tiempo, espuesta en 1979 na galería Tassili d'Uviéu, la pintora renueva el so llinguaxe espresivu, pinta la realidá d'una sociedá dominada poles máquines y la informática, con diversos títulos como Hacia el automatismo social, La cibernética y lo humano, Hablemos sobre informática, Robots, Hombres y mentes, Manipuladores del cerebro. Nos entamos de los años ochenta da por terminada l'anterior etapa y fai una riestra d'obres baxo'l títulu d'Antropogénesis, nes qu'ilustra la rellación del ser humanu coel cosmos, l'eternu devenir de la materia y los ciclos de nacimientu y muerte. Nos noventa, trabaya cola realidá más inmediata, con noticies difundíes pola televisión o actuaciones públiques, que n'ocasiones lleguen a lo grotesco. Nacen entós Los Esperpentos. Xabaces dibuxos a tinta china sobre papel ellaborao a mano, cola mejor tradición de la pintura social: retratos de procesiones, novies ensin esperanza anantes de la boda, toreros, la planeada boda ente dos estatues formen esti retablu cotidianu. La so trayeutoria ta implicada en constantes busques formales y técnicas, ambes espresión d'una sensibilidá somorguiada en continues reflexones existenciales.

El 7 de setiembre de 2004 a ella y a otres muyeres artistes (Blanca Meruéndano Cantalapiedra, Covadonga Romero Rodríguez, Rosario Areces González, Mercedes Gómez Morán, Maruja Moutas Merás y Amparo Cores Uría), en representación de la plástica contemporánea asturiana, entregáron-yos la medaya d'Asturies na so categoría de plata, un reconocimientu al trabayu difícil de la primer xeneración de muyeres creadores plástiques que se vinculen a la vanguardia artística asturiana del sieglu XX.