78 Ursae Majoris

De Wikipedia
Saltar a navegación Saltar a la gueta
78 Ursae Majoris
78 Ursae Majoris A/B
Constelación sietestrellu
Ascensión reuta α 13h 00min 43.70s
Declinación δ +56º 21’ 58.8’’
Distancia 81 años-lluz
Magnitú visual +4,93 (conxunta)
Magnitú absoluta +2,94 (conxunta)
Lluminosidá 4,9 / 0,87 soles
Temperatura 7000 / 5500 K
Masa 1,5 / <1 soles
Radiu 1,5 / 0,9 soles
Tipu espectral F2V / G6V
Velocidá radial -9,8 km/s

78 Ursae Majoris (78 UMa / HD 113139 / HR 4931) ye una estrella na constelación del sietestrellu de magnitú aparente +4,93. Asitiada a 81 años lluz del Sistema Solar, forma parte de l'Asociación estelar del sietestrellu, grupu d'estrelles con un orixe común qu'inclúi, ente otres, a Merak (β Ursae Majoris) y Alioth (ε Ursae Majoris). Ésta última alcuéntrase a namái 1,4 años lluz de 78 Ursae Majoris.

78 Ursae Majoris ye un sistema binariu que les sos dos componentes tán visualmente separaes 1,25 segundos d'arcu. La componente principal, 78 Ursae Majoris A, ye una estrella blancu-mariella de la secuencia principal de tipu espectral F2V y 7000 K de temperatura. Ye 4,6 vegaes más lluminosa qu'el Sol con un radiu un 50% mayor qu'el radiu solar. La so alta velocidá de rotación, de más de 92 km/s, fai que complete un xiru en menos de 19,2 hores. 78 Ursae Majoris B ye una estrella análoga solar de tipu G6V y 5500 K. Tien el 87% de la lluminosidá solar y un radiu un 10% menor qu el radiu solar.

El periodu orbital del sistema ye de 106,4 años, siendo la separación media ente les dos estrelles de 31,25 UA. La escentricidá de la órbita, ε = 0,41, fai que la distancia ente elles bazcuye ente 49 y 18 UA; la próxima separación mínima ente les dos estrelles va tener llugar en 2027. La masa combinao del sistema ye de 2,7 mases solares y dambes son estrelles nueves, lo que concuerda colos 250 millones d'años d'edá de l'Asociación estelar del sietestrellu.

Referencies[editar | editar la fonte]