Saltar al conteníu

Mespilus germanica

De Wikipedia
(Redirixío dende Ñésperu)
Mespilus germanica
cadapanal
Clasificación científica
Reinu: Plantae
División: Magnoliophyta
Clas: Magnoliopsida
Orde: Rosales
Familia: Rosaceae
Subfamilia: Amygdaloideae[1]
Tribu: Maleae
Xéneru: Mespilus
Especie: M. germanica
L.
Consultes
Royal Botanic Gardens, Kew Royal Botanic Gardens, Kew
World Flora Online World Flora online
[editar datos en Wikidata]
Cadapanal

La cadapanal[2] (Mespilus germanica) ye una especie d'árbol frutal de la familia Rosaceae.

Recibe dellos nomes más como cadapanar, cagampanal, carampanal, suerval, carrampanal, carémpanu, etc. y, magar qu'anguaño ye especie d'escasa distribución n'Asturies, foi relativamente abondosu apocayá; foi siendo sustituyíu pola especie Eriobotrya japonica.

Descripción y ecoloxía[editar | editar la fonte]

El cadapanal ye árbol planicaducifoliu de fueya simple; amás, carauterícense por ser simples, alternes, llanciolaes-ovales y colos bordes dentaos o enteros. La corteya esforgaxa en plaques verticales irregulares que se desprienden fácilmente. Algama los 6 m d'altor, anque pue sobrepasar los 8 m. Tien una groma baxa y amplia pertrupa, polo que crea una gran solombra. El frutu llámase cadápanu.

Ye planta procedente del centru y sur d'Europa (poro recibe l'epítetu de germanica) y Asia Menor. Cultívase dende hai unos 3.000 años na rexón del mar Caspiu, anque foi unos 200 años e. C. cuando foi espardida pel Imperiu Romanu algamando un mayor territoriu del que tenía. Ye especie propia de clima atlánticu qu'espolleta nos pisos termo- a mesotempláu (de 0 a 800 m) sobre suelos preferentemente ácidos, sueltos, frescos y non llentos. Pue tamién espoxigar sobre sustratu alcalín. Nesti sen, requier un clima templáu, con branos ya iviernos seles.

Etnobotánica[editar | editar la fonte]

El cadapanal suel inxertase sobre la espinera (Crataegus monogyna) o l'andrinal (Prunus spinosa) pa que'l tueru agarre más puxu. El so frutu, el cadápanu, ha xintase nun estáu de maduración perestremu, casi cuando tán pochos, y tienen un tastu dulce perapreciáu. Maduren pela seronda y, antiguamente, metíense ente la yerba del payar pa favorecer esti procesu. Úsense tamién pa combatir los trestornos intestinales, pudiendo facese con ellos dulces, repostería y llicores. D'otra miente, la so madera ye duro, flexible y muncho resistente al rozamientu.

Referencies[editar | editar la fonte]

  1. D. Potter, T. Eriksson, R. C. Evans, S. Oh, J. E. E. Smedmark, D. R. Morgan, M. Kerr, K. R. Robertson, M. Arsenault, T. A. Dickinson & C. S. Campbell. «Phylogeny and classification of Rosaceae» (n'inglés, PDF). Plant Systematics and Evolution 266 (1–2):  páxs. 5–43. doi:10.1007/s00606-007-0539-9. http://biology.umaine.edu/Amelanchier/Rosaceae_2007.pdf.  Nótese que esta publicación es anterior al Congreso Internacional de Botánica de 2011 que determinó que la subfamilia combinada, a la que este artículo se refiere como Spiraeoideae, debía denominarse Amygdaloideae.
  2. URL de la referencia: http://www.sabencia.net/nomenclator.php.