Xuan Ponce de Lleón
Xuan Ponce de Lleón (Santervás de Campos, Valladolid, 1460 [1] - Cuba, 1521), conquistador castellanu de Puertu Ricu y descubridor de la Florida.
Yera d'ascendencia noble, foi paxe na corte de Fernandu'l Católicu y lluchó na conquista de Granada. Hai duldes sobre si'l so primer viaxe p'América fíxolu con Cristóbal Colón (en 1493) o con Nicolás deOvando (en 1502). De toles maneres, trabayo con ésti na conquista de La Española o Santu Domingu (actuales República Dominicana y Haití) y mandó-y conquistar la islla de San Xuan o Borinquén (actual Puertu Ricu) en 1508. A la escontra de la opinión de Diego Colón, consiguió ser nomáu gobernador en 1510. La islla sometióla ensin dificultá, gracies a la conversión del cacique Agüeibana; Ponce de León pudo dedicase a la fundación de ciudaes y a la esplotación d'oru. Pero, depués de morrer Agüeibana, los indios subleváronse escontra la dominación española y el réxime d'encomiendes, que los obligaba a trabayos forzaos. Depués d'una dura llucha, Ponce de León impúnxose a los nativos y tomó represalies sangrines.
Más sero descubrió una estaya al norte a la que nomó La Florida, darréu que foi descubierta'l día de Domingu de Resurreición, (Pascua Florida, en castellanu), por cayer siempres nos entamos de la primavera.
Pasóse'l restu de la so vida guetando la fonte de la eterna mocedá que, según una lleenda, s'afayaba nesi llugar.[2]
