Water Island

De Uiquipedia
Saltar a: navegación, buscar

Water Island (Islla d’agua n’asturianu) ye la cuarta y más recientemente adquirida de les Islles Vírxenes Americanes, col status de Territoriu Dependente de los Estaos Xuníos. Atópase asitiada nel mar Caribe. Esta islla ye d’orixe volcánicu y atópase a 1 km al sur de la islla de Santu Tomás. Ta comunicada con Santu Tomás a traviés dun serviciu regular de ferry que anicia’n Crown Bay nun percorríu dunos 10 minutos.

Con 2,6 km cuadraos, Water Island ye la más pequeña de les Islles Vírxenes Americanes. Alministrativamente forma parte del subdistritu de San Tomé. Trátase duna islla residencial, con una población de 161 habitantes (sigún censu del añu 2000), y nengún establecimientu comercial importante. Delles de les cases de Water Island fueren acaldáes pa turistes y visitantes. Les principales atraiciones de la islla son les playes, especialmente Honeymoon Beach, los vieyos llantenes de caña d'azucre y Fort Segarra, un fuerte soterrañu construyíu polos Estaos Xuníos mientres la Segunda Guerra Mundial. La pica norte de la islla ye una comunidá privada, Sprat Bay Estates, estendida fasta la playa de Sprat Bay. Toles playes son d’usu públicu.

Historia[editar | editar la fonte]

Los primeros habitantes coñocíos de Water Island yeren indios tahínos, que vivíen na islla demientres el sieglu XV. Water Island recibió’l so nome de los esploradores europeos debíu a la existencia de delles fontes naturales d’agua potable. Munches islles de les Antilles carecíen de fontes, asína que Water Island yera una posa afayaíza pa los pirates.

La Compaña danesa de les Indies Occidentales y Guinea reclamare la propiedá de la islla alrodiu de 1769. Demientres el sieglu XVIII y entamos del XIX la islla yera propiedá de dellos negros lliberáos y mulatos que cultivaben algodón y criaben ganáu. En 1905 la islla foi vendida a la Compaña Danesa de les Indies Orientales que la mantuvo en 1917 cuando los compraren el restu de les Indies Daneses Occidentales.

En 1944 los Estaos Xuníos compraren Water Island pa protexer la base de somarinos de Santu Tomás mientres la Segunda Guerra Mundial. Ente 1944 y 1950 la islla tuvo baxo la supervisión del Departamentu de Defensa de los Estaos Xuníos. La División de Guerra Química del Exércitu alquirió dellos terrenos de Water Island para probar armes químiques como l’axente llaranxa. En 1950 la islla pasó al Departamentu d’Interior, que l’allogó a dellos residentes civiles.

El control de Water Island foi tresferíu del gobiernu federal al gobiernu territorial de les Isllas Virxes Americanes el 12 d’avientu de 1996, faciendo d’ella la "Última Vírxe". No cabero de la década de 1990, el Departamentu d’Interior entamó a tresferir les propiedades gobernamentales de la islla a los residentes. Nel añu 2005 el gobiernu de les Islles Vírxenes anunció planes pal desendolcu de Water Island y enantar la construción de viviendes.