Volkswagen

De Uiquipedia
Saltar a: navegación, buscar

Volkswagen (en alemán "automóvil del pueblu") ye un fabricante d'automóviles con sede en Wolfsburgu, Alemaña. Forma parte del Grupu Volkswagen, mayor fabricante d'automóviles d'Europa.

El Grupu Volkswagen, con sede en Wolfsburg, ye ún de los grupos llíderes d'automoción del mundu. nel añu 2009 el grupu enantó'l númberu d'entregues de vehículos a los sos clientes a 6,34 millones de coches (2008: 6,26 millones). El Grupu ta formao por nueve marques procedentes de siete países europeos: Volkswagen, Audi, SEAT, Škoda, Volkswagen Vehículos Comerciales, Bentley, Bugatti, Lamborghini y Scania. El grupu trabaya en 61 plantes d'aniciu en quince países europeos y en más de seyes países n'América, Asia y África, cuntando en tol mundu con unos 370000 emplegaos aniciando unos 26000 vehículos o venceyaos en servicios arreyaos colos productos del grupu. El Grupu Volkswagen vende los sos vehículos en más de 153 países.

Hestoria[editar | editar la fonte]

Entamu de la fábrica[editar | editar la fonte]

El nome Volkswagen débese a que nos años 1930 surdió n'Alemaña'l proyeutu d'aniciar un automóvil que fora accesible pa un gran númberu de persones. Cuando Adolf Hitler llega al poder en 1933 decide poner en marcha un plan d'afaladura de la industria del automóvil, col envís d'emburriar les sos fábriques y faceles más competitives frente a les ingleses y les franceses. D'esta miente llánzase un concursu a los empresarios pa la concesión del aniciu del nomáu "automóvil del pueblu" (Volks Wagen). Ferdinand Porsche foi l'encargáu de llevar a cabu el proyeutu cuya fin yera aniciar un vehículu cenciellu y baratu que pudiera tar al algame de la mayoría de los alemanos.

Hitler tenía l'inclín d'aniciar la fábrica más grande d'Europa pal aniciu del automóvil del pueblu. Poro, yera requisitu tener accesu a una vía fluvial navegable. Tamién yera necesaria una central eléctrica propia, qu'abasteciera tanto a la fábrica como a la nueva ciudá. Hitler escoyó'l pueblu de Fallersleben, nes orielles de la canal de Mittelland. El llugar formaba parte dende'l sieglu XVI del Condáu de Schloss Wolfsburg, propiedá del conde von Schulenburg. Según les idegues de Hitler, la fábrica debía tener la so propia ciudá arreyada a la mesma, p'aniar a los trabayadores y les sos families.

El nome escoyíu por Hitler pal automóvil foi Kdf-Wagen (Kraft durch Freude: "fuercia al traviés de l'allegría") y la ciudá, Kdf-Stadt. Sicasí, nin na fábrica nin en toda Alemaña naide nun emplegó otru nome que nun fora'l de Volkswagen pa referise al Escarabayu. El nome Kdf-Wagen sólo foi utilizao nos catálogos y polos militares nazis.

El partíu nazi apurrió a Ferdinand Porsche la infraestructura necesara pal aniciu de la que sería más sero la fábrica encargada del proyeutu. Pa la realización del proyeutu, fundóse la nueva ciudá'l 26 de mayu de 1938. La ceremonia de tan importante acontecimientu pal réxime nazi, esqueraba claramente pasmar al pueblu alemán, un pueblu que s'amosaba esfotáu col so dirixente. Más de 70000 persones llegaes de tolos requexos d'Alemaña foron a la ceremonia. Llóxicamente, Ferdinand Porsche tuvo presente xunta los xenerales nazis y el mesmu Führer. Nesa ceremonia, Hitler xubió a bordo d'un Kdf-Wagen descapotable afaláu por Ferdinand Porsche.

Segunda Guerra Mundial[editar | editar la fonte]

Col envís de financiar too esti proyeutu d'aportar al pueblu alemán d'un automóvil de baxo coste, el gobiernu alemán atalantó un sistema nel que los aforradores que naguarna tener un Volkswagen (automóvil del pueblu), aportaben 5 marcos selmanalmente. Asina axuntáronse alreor de 286 millones de marcos. Nenguna d'estes persones recibió'l so Kdf-Wagen, ya que los proyeutos militares monopolizaben l'atención del país tres l'entamu de la Segunda Guerra Mundial en setiembre de 1939. La fábrica de Fallersleben empobinóse al aniciu militar y dempués de 6 años de guerra, el dinero del Kdf-Wagen foi requisao polos rusos en conceptu de reparaciones de guerra.

Principiada la guerra, la fábrica tornóse n'oxetivu militar, magar el propiu Hitler-y albidró a Porsche: "La fábrica nun tendrá importancia estratéxica" en nidia referencia al esclusivu aniciu del Kdf civil y la victoria rellámpagu que se tendría cola Blitzkrieg. Non entamaes les hostilidaes la planta pasó a la órbita del Ministeriu d'Armamentos y de la Luftwaffe. D'esta miente, amás de los ya conocíos Kdf, Kübelwagen, y Schwimmwagen, aniciáronse ellí ales y fuselaxes pal Schnellbomber Junkers Ju-88, motores BMW 801 D pal caza Focke-Wulf Fw 190, granaes de mano, mines y aprosimadamente un millón y mediu de calefactores pa les tropes en Rusia. Igualmente, de magar setiembre de 1943, aniciáronse tamién les bombes voladores Fieseler Fi 103, conocíes como V-1 (Vergeltungswaffe 1: "arma de represalia nu 1").

Los aliaos dieron prioridá a los ataques a la planta de Kdf en razón de la so contribución al esfuercio bélicu enemigu. Años enantes, pola so parte, espertos de la Luftwaffe (Fuercia Aérea Alemana) encamentaren la so prudente dispersión nes viesques averaes. Sicasí, hasta'l momentu mesmu de les primeres incursiones nun se tomara la más mínima precaución nesi sentíu.

Al tiempu de les primeres incursiones n'abril de 1944 tovía se carecía de camuflaxe, defensa antiaérea y abellugos soterráneos pa los trabayadores. L'enemigu podía ver fácilmente la masiva mole rectangular a un llau del Mittellandkanal.

El 8 d'abril de 1944 cincuenta y seyes bombardeos descargaron ellí 146 tonelaes de bombes incendiaries y d'alto poder d'españíu. Anque nun se causaron grandes daños materiales, trece persones morrieron y cuarenta resultaron firidas. Trés selmanes dempués, un Boeing B-17 ensin tripulación, estrellóse nos techos del Hall 1 de la planta ocasionando graves estrozos en toa esa área. A ello siguiéron-y otros trés importantes raides: el 20 de xunu, 137 Fortaleces Volantes llanzaron 500 tonelaes de bombes incendiaries y d'alto poder d'españíu. D'estes aprosimadamente 582 fixeron blanco na fábrica causando la muerte de ventisiete trabayadores y firidas a noventa y trés más. Nueve díes dempués, sesenta y cinco aviones atacaron con 826 bombes, matando a 14 persones y dañando bultablemente a la planta, ciudá y barraques de prisioneros. A lo cabero, el 5 d'agostu, ochenta y cinco Liberator dexaron caer 300 tonelaes de bombes d'alto poder d'españíu, consiguiendo unos 300 aciertos na planta d'aniciu, cocines, barraques y cais. Morrieron 7 persones y 27 foron firíes. Toles incursiones fixéronse de nueche según la modalidá operativa de la Octava Fuercia Aérea Estaoxunidense.

El 10 d'abril de 1945, tropes estaoxunidenses dirixeron el so avance en direición a la ciudá del Volkswagen. Sicasí nun llegaron a entrar nella pues nun conocíen la so esistencia. La ciudá yera nueva abondo y nun figuraba tovía nos sos más recientes mapes. El 18 d'abril tomaron posesión de la fábrica y ciudá dellos tanques Sherman sofitaos por doscientos soldaos estaoxunidenses.

Los estaoxunidenses teníen l'inclín d'estrozar y dempués desaniciar tola fábrica pola mor de la so connotación nazi. Decatáu l'inspector-xefe de la planta, Rudolf Brörmann, opúnxose-yos testonamente evitando la planeada demolición nos meses de primavera y branu de 1945. La so xestión nesa citada época, foi escaecida pola hestoria oficial de la Volkswagenwerk. Asina entós, el 25 de mayu, cola venia estaoxunidense, desenguedeyóse rebautizar a l'antigua Stadt des Kdf-Wagen col nome de Wolfsburgu, tomáu del castiellu vecín de Von Schulemburg.

El 28 de mayu Rudolf Brörmann foi puestu na función de direutor executivu de la planta. Pa fines d'esi mesmu mes aniciáranse manualmente 110 Kübelwagen con piezas que sobraben

Hitler nunca llegó a ver el so Kdf-Wagen salir de les llinies de producción. Cola fin de la guerra, Ferdinand Porsche foi encarcelaáu pola so venceyadura col réxime nazi y los ingleses tomaron el control de la factoría. El 27 d'avientu entamó l'aniciu en serie del escarabayu.

Dende los años cincuenta[editar | editar la fonte]

Anque los sos primeros pasos entamaron enantes de la Segunda Guerra Mundial, nun foi hasta los años cincuenta cuando l'Escarabayu se torna nun vehículu de gran aceptación social tanto n'Europa como n'América. En 1955 salió de la fábrica l'exemplar un millón y en 1972 l'Escarabayu, como ya se conocía en tol mundu, superó'l record d'unidaes aniciaes d'un automóvil, que tenía Ford col so modelu "T", al algamar la cifra de 15007034 Volkswagen aniciaos.

En 1978 l'Escarabayu dexó d'aniciase n'Alemaña al baxar la demanda na mayoría de los países, ya qu'apaecieran nel mercáu mundial automóviles equivalentes pero de diseño y teunoloxía muncho más actuales. Siguió aniciándose, sicasí, en Brasil hasta 1985, reinxiriéndose naquel país por mandáu presidencial en 1993, descontinuándose en 1996. En México l'aniciu del Volkswagen Sedán continuó de forma ininterrumpida hasta 30 de xunu de 2003, cuando s'anicia'l caberu Volkswagen Sedán Última Edición, el cual portaba equipamientu distintivu. La cabera unidá aniciada afáyase nel Muséu de Volkswagen en Wolfsburgu y otru d'estos naguaos exemplares foi regalao al Papa Xuan Pablu II por un grupu de concesionarios de la marca en México.

Durante fines del sieglu pasáu, el Volkswagen Sedán (escarabahyu) foi consideráu "l'automóvil del sieglu".

Volkswagen nun quedó atrás na evolución de los automóviles y presentó en 1974 el Golf, qu'aína tuvo un gran éxitu. Volkswagen foi enantando pasu ente pasu la so gama de modelos, abandonando l'anterior política de modelu únicu. Asina foi incorporando en primer llugar el Passat en 1973, un poco enantes que'l Golf y darréu el Polo y el Lupo, modelos más pequeños. En 1998 apruz el New Beetle, qu'ufre un diseñu basáu nel antiguu Escarabayu, pero dafechu modernizáu, igual que la teunoloxía. Esti automóvil ta empobinao cimeramente al mercáu estaoxunidense, onde sigue habiendo un gran númberu de conductores nostálxicos del Escarabayu. L'apaición d'esti modelu, amecida a una merma de la demanda tamién nos países llatinoamericanos, lleva nel añu 2003 al pieslle del aniciu del clásicu Vocho en México. Enantes salieran otros modelos nuevos, como'l Phaeton, buque insignia de la marca, el Touran, un monovolume se siete places, y el Touareg, un touterrén de luxu pa usu en ciudá, carretera y en terrenos difíciles.

Nel añu 2002 Volkswagen apurrió cuasi 5000000 vehículos. El númberu d'emplegaos y trabayadores foi de 325000. La so participación nel mercáu mundial foi del 12,1%. Tamién en 2002 y dempués de 28 años en aniciándose, el Golf superó en ventes al llexendariu Escarabayu.

Fábriques[editar | editar la fonte]

El grupu dispón de 45 fábriques en 19 países y ta presente en 150 países con organizaciones comerciales propies.

Wolfsburg ye anguaño la sede cimera del Grupu Volkswagen. L'escudu d'armes de la ciudá (qu'ente 1951 y 1963 apaecería nes versiones d'esportación de los Volkswagen), foi diseñao por un dibuxante apellidáu Kern. Componíenlu la figura del tradicional castiellu de dos torres y puerta llevadiza con un estilizáu llobu nes almenes. Nel so vértice unes llinies ondulaes simbolizaben el Mittellandkanal.

Volkswagen anició nos postreros años en Dresde una fábrica dafechu nueva, de cristal, que permite a los visitantes ver en detalle tol procesu d'aniciu. En Wolfsburg edificó la Ciudá del Automóvil, un conxuntu d'edificios empobinaos al públicu, nos que se pueden ver esposiciones sobre la hestoria de la compañía y sobre'l mundu del automóvil, y na que los mercadores pueden recoyer personalmente los sos automóviles Volkswagen.

En 1994 Vw sorteó la crisis debida a una baxa demanda aplicando un modelu nel que los emplegaos alcordaron cola patronal amenorgar la xera y los salarios nun 20%. El resultáu inmediatu foi que llograron salvase 20000 puestos de trabayu. Sicasí nos postreros años la medida amosóse contraproducente.

De momentu, Volkswagen anunció que mercará un 19,9 % de participaciones na xaponesa Suzuki por un total de 1700 millones d'euros (unos 2500 millones de dólares), colo que postiará bultablemente la so posición n'Asia.

Víase tamién[editar | editar la fonte]

Enllaces externos[editar | editar la fonte]

Volkswagen
Wikimedia Commons tien archivos rellacionaos con: